Əli Orucov: “Rusiya ilə gələcək danışıqlar üçün E5 adlı yeni bir formatın uğurlu olacağını düşünmürəm”
Polşa Ukrayna ilə bağlı danışıqlar masasında oturmağı tələb edir. Varşava Ukraynanın qonşusu olaraq sülh danışıqlarında iştirak etməli olduğunu bildirib. Almaniya hökuməti cavab olaraq danışıqlar prosesi hələ başlamadığı üçün iştirakçıların tərkibini müzakirə etməyin hələ tez olduğunu bildirib.
Polşa xarici işlər naziri Radoslav Sikorski Almaniya, Fransa və Birləşmiş Krallığın əsas rol oynadığı Ukrayna ilə bağlı məsləhətləşmələr formatını tənqid edib. O, alman mətbuatına verdiyi müsahibədə Polşanın "cəbhə xəttində" olduğunu və buna görə də gələcək sülh razılaşmasının müzakirələrində iştirak etməli olduğunu bildirib. Nazirin sözlərinə görə, Ukraynaya silah tədarükünün təxminən 90 faizi Polşa ərazisindən keçir və ölkənin özü həm Ukrayna, həm də Rusiyanın qonşusu olaraq əhəmiyyətli risklər daşıyır.
Polşa Baş naziri Donald Tusk da Varşavanın Ukraynanın gələcəyi ilə bağlı müzakirələrdə mühüm iştirakçı olduğunu bildirib. O, Polşanın iştirakı olmadan əldə edilən razılaşmaların region üçün hərtərəfli həllər kimi qəbul edilməsinin çətin olacağını deyib. Almaniya hökumətinin sözçüsü Stefan Kornelius bu mərhələdə potensial danışıqların tərkibini müzakirə etmək ehtiyacını rədd edib. O, qeyd etdi ki, real danışıqlar hələ başlamayıb və Rusiya onlara heç bir hazırlıq nümayiş etdirməyib. Lakin Berlin Ukrayna məsələsi ilə bağlı bütün addımların Polşa hökuməti ilə sıx əlaqələndirildiyini vurğulayıb. Bu həftə Almaniya kansleri Fridrix Merts E5 formatı çərçivəsində Berlində Fransa, Birləşmiş Krallıq, İtaliya və Polşa liderlərini qəbul edəcək. İştirakçıların Ukraynaya davamlı dəstək və Avropa təhlükəsizlik məsələlərini müzakirə etmələri gözlənilir.
Ümumiyyətlə, Ukrayna üzrə E-5 məsləhətləşmə formatı nə vəd edir?
Sözügedən məsələni baki-xeber.com-a şərh edən AMİP funksioneri Əli Orucov bu formatın uğurlu olacağına şübhə ilə yanaşdı: “Düşünmürəm ki, bu formada aparılan danışıqlar uğurlu olsun. Ən azından ona görə ki, Rusiya Avropa İttifaqına düşmən münasibət bəsləyir. Aİ-ni Ukrayna ilə aparılan müharibədə tərəf hesab edir. Xüsusən də Almaniya, Böyük Britaniya və Fransa Ukraynanın əsas silah təchizatçılarıdır. Polşaya münasibətə gəldikdə isə, Rusiyanın əzəldən bu dövlətə qarşı xüsusi nifrəti var. O üzdən, Rusiya ilə gələcək danışıqlar üçün E5 adlı yeni bir formatın uğurlu olacağını düşünmürəm. Rusiya ABŞ-ın, Türkiyənin və digər ölkələrin vasitəçiliyini qəbul edər, amma sözügedən ölkələrin vasitəçiliyini qəbul edəcəyini düşünmürəm. Moskva həm həmin dövlətləri tərəf hesab edir, həm də bu ölkələrlə münasibətlər çox gərgindir. O baxımdan bu təşəbbüsün real nəticə verəcəyi real görünmür. Vasitəçi olan ölkənin tərəfsiz olması önəmli faktordur”.
Vidadi ORDAHALLI
