Azər Həsrət: “Prezident dünyaya bunu çatdırır ki, Azərbaycanın işğalla barışmağını istəyiblər, amma biz buna razı olmadıq”
Prezident İlham Əliyev İslam İnkişaf Bankı Qrupunun 2026-cı il üzrə İllik Toplantılarının açılış mərasimində çıxışında deyib ki, dünya siyasətində qərar verən qüvvələrin torpaqlarımızın qeyri-qanuni şəkildə əbədi işğal altında qalmasına qərar verdiyini anladığımız zaman, biz öz qərarımızı verdik:
“Biz deyirdik: “Haqq bizim tərəfimizdədir. Biz işğala məruz qalmışıq. Xəritəyə baxın, Ermənistan silahlı qüvvələrinin bizim ərazilərimizdə harada yerləşdiyini görün”. Bunun müqabilində isə yalnız bir cavab alırdıq: “Gedin razılaşın” birinci mesaj. İkinci mesaj: “Bu münaqişənin hərbi həlli yoxdur”. Üçüncü mesaj: “Siz müharibəyə başlaya bilməzsiniz”. Dördüncü mesaj: “Əgər müharibəyə başlasanız, sanksiyalara məruz qalacaqsınız” və bunun kimi çoxsaylı başqa mesajlar verilirdi, sadəcə, vaxtınızı çox almaq istəmirəm. Beləliklə, dünya siyasətində qərar verən qüvvələrin torpaqlarımızın qeyri-qanuni şəkildə əbədi işğal altında qalmasına qərar verdiyini anladığımız zaman, biz öz qərarımızı verdik və bütün planları dəyişdirdik. 2020-ci ildə torpaqlarımızın azad olunması uğrunda müharibə 44 gün davam etdi və Ermənistanın kapitulyasiyası ilə nəticələndi. Biz işğal altında olan ərazilərimizin böyük hissəsini azad etdik, lakin hamısını deyil. Daha sonra - 2023-cü ildə bu məsələyə tam və qəti nöqtə qoyduq”.
Sözügedən məsələ ilə bağlı fikirlərini baki-xeber.com-la bölüşən siyasi şərhçi Azər Həsrət hesab edir ki, Prezident Əliyev sadəcə olaraq dünyanın gözünü açmağa çalışır: “Yəni bir daha Azərbaycanın sülhə sadiq olduğunu göstərmək istəyir. Yəni qeyd edir ki, biz əlimizdən gələni etmişik. O mənada ki, məsələ sülh yolu ilə həll edilsin. Ancaq təəssüflər olsun ki, bunu bizim zəifliyimiz kimi qəbul ediblər və bizə “ağıl” verməyə çalışıblar. Ona görə də Azərbaycan məcburiyyət qarşısında bütün riskləri önünə alaraq müharibə yolu ilə torpaqları azad edib. Üstəlik, bu azad etmə dünya üçün bir örnək təşkil edir. Məsələ ondadır ki, 44 günlük müharibədə Azərbaycan ən humanist müharibə örnəyini ortaya qoyub. Yəni biz müharibə apararkən dinc insanların, yaxud da müharibəyə dəxli olmayan insanların zərər görməməsi üçün əlimizdən gələni etdik. Hətta mülki infrastrukturun dağıdılmaması üçün əlimizdən gələni etdik. Ancaq işğalçı Ermənistan isə, hətta müharibə bölgəsindən uzaqda olan Gəncəni, Mingəçeviri, Xızını belə hədəfə alırdı. Azərbaycan isə mülki hədəflərin zərər görməməsi üçün əlindən gələni edirdi. Prezident Əliyev dünyaya bunu çatdırır ki, sadəcə olaraq ədalətsizlik, haqsızlıq var. Azərbaycanın işğalla barışmağını istəyiblər, amma biz buna razı olmadıq. Azərbaycan xalqı olaraq bununla barışa da bilməzdik. Yəni öz gücümüz hesabına torpaqlarımızı azad etmişik. Azərbaycanın uğur modeli bir örnəkdir və bir sıra ölkələr bunu öyrənir. Hər kəs yadında saxlamalıdır ki, Azərbaycan torpaqlarını müvəqqəti olaraq işğal etmək mümkündür, amma əbədi olaraq heç kim əlində saxlaya bilməyəcək. Ona görə də kimlərinsə torpağımızda gözü varsa, kimlərsə torpağımızın hansısa hissəsini hələdə nəzarət altında saxlayırsa, iki dəfə düşünsünlər. Əvvəl-axır, gec-tez Azərbaycan bütün torpaqlarını azad edəcək. Bizim bir qarış torpağımız belə, düşmən tapdağında qala bilməz və qalmayacaqdır”.
Vidadi ORDAHALLI
