Azərbaycan prezidentinin köməkçisi Hikmət Hacıyevin Dilicana səfəri Ermənistanın baş naziri Nikol Paşinyanın deyil, Azərbaycanın təşəbbüsü idi.
Bunu erməni politoloq Akop Badalyan bildirib.
Xatırladaq ki, iyunun 14-də Ermənistan Təhlükəsizlik Şurasının katibi Armen Qriqoryan və Azərbaycan prezidenti İlham Əliyevin köməkçisi Hikmət Hacıyev Dilicanda görüşüblər. Rəsmi açıqlamaya görə, tərəflər Ermənistan və Azərbaycan arasında sülh gündəliyi ilə bağlı məsələləri müzakirə ediblər. İyunun 18-də baş nazir Nikol Paşinyan Qriqoryana Hacıyevlə görüşmək imkanını müzakirə etməyi tapşırdığını açıqlayıb. Badalyanın sözlərinə görə, Hacıyevin səfərinə parlament seçkilərinin nəticələri və “Çiçəklənən Ermənistan” Partiyasının taleyi səbəb olub. O hesab edir ki, Paşinyanın müharibə risklərinin idarə olunması ilə bağlı açıqlamaları və görüş ehtimalını müzakirə etmək əmri sadəcə "məlumat paketidir", çünki ekspertin fikrincə, bu cür addımların vacibliyini İrəvan deyil, Bakı müəyyən edir:
"Son illərdə Ermənistan-Azərbaycan danışıqlarının bütün prosesinin məntiqi göstərir ki, onların gündəliyi, diqqəti və şərtləri Azərbaycanda formalaşır, Ermənistan isə sadəcə "paketləmə" üçün seçimlər edir. Eyni prinsip Bakı nümayəndəsinin Ermənistana səfərinə də tətbiq olunurdu". Ekspertin sözlərinə görə, Azərbaycanın narahatlığı “Çiçəklənən Ermənistan” Partiyasının Ermənistan parlamentində peyda olma ehtimalı ilə bağlı idi, çünki bu, ölkənin idarəetmə modelini birbaşa dəyişdirəcəkdi: "Əgər “Çiçəklənən Ermənistan” Partiyası parlamentə daxil olsaydı, qanunverici orqan səslərin beşdə üçünü qazanmazdı. Lakin bu baş vermədi və Nikol Paşinyan əksəriyyəti tutur, yəni mövcud rəhbərliyin baxış bucağından onun müxalifətlə danışıqlar aparmağa ehtiyacı yoxdur və olmayacaq".
Badalyanın sözlərinə görə, Ermənistanda siyasi mənzərənin dəyişməsinin qarşısını almaq Azərbaycan üçün vacib idi, çünki digər qüvvələrlə danışıqlar aparmaq zərurəti qaçılmaz olaraq Ermənistan-Azərbaycan sülh prosesi ilə bağlı məsələlərə təsir edəcəkdi. Hakimiyyətin müharibə risklərini idarə etmək qabiliyyətindən danışan ekspert hökumətin bu məsələ ilə bağlı açıqlamalarını şişirdilmiş hesab edir. O qeyd edir ki, Paşinyan bu cür riskləri idarə etməkdə acizdir və bu, 2020-ci ildə aydın oldu. Analitikin sözlərinə görə, bu gün vəziyyət daha da mürəkkəbləşib və Ermənistan baş nazirinin diplomatik bacarıqları heç bir irəliləyiş göstərməyib: "Geosiyasi oyunçuların Paşinyana dəstəyi Ermənistanın siyasi proseslərdən bir aktor kimi kənarlaşdırılmasını asanlaşdırmaq deməkdir və bu, təəssüf ki, xüsusilə müharibə və sülh məsələsinə aiddir". Ermənistanla Azərbaycan arasında müharibə ehtimalına gəldikdə, Badalyan əmindir ki, bu məsələlər geosiyasi oyunçular səviyyəsində həll olunur, çünki hazırkı Ermənistan hökuməti ölkəni həlledici amil olmaq imkanından faktiki olaraq məhrum edib.
Samirə SƏFƏROVA
