Ermənistanda keçirilən və ölkənin geosiyasi istiqaməti ilə bağlı referendum kimi qəbul edilən kritik parlament seçkiləri mütəşəkkil kiber əməliyyatlar və seçki məntəqələrində saxta bomba təhdidlərinin kölgəsində keçirilir.
Ermənistan Daxili İşlər Nazirliyinin və polis mətbuat xidmətinin açıqlamasına görə, Ermənistan vətəndaşları bəzi seçki məntəqələrində və ofislərində bomba qoyulması barədə yalan məlumatlar ehtiva edən mütəşəkkil zənglər və mesajlar alırlar.
Polis bu təhdid mesajlarının və saxta zənglərin xarici telefon nömrələri və elektron poçt ünvanları vasitəsilə yayıldığını açıqlayıb.
Təhlükəsizlik qüvvələrinin yerində apardığı sürətli və diqqətli iş nəticəsində bütün bu təhdidlərin tamamilə əsassız olduğu və həqiqəti əks etdirmədiyi müəyyən edilib. Hakimiyyət orqanları ictimaiyyəti, çaxnaşma yaratmaq məqsədi daşıyan bu dezinformasiya dalğası qarşısında sakit olmağa çağırıb.
Sosial mediada bütün bunların arxasında Rusiyanın ola biləcəyinə dair söz-söhbətlər dolaşır. Bu da səbəbsiz deyil. 2018-ci ildə küçə etirazları ilə hakimiyyətə gələn Paşinyan özünü Moskvadan uzaqlaşdırmaqla, Ermənistanın Kollektiv Təhlükəsizlik Müqaviləsi Təşkilatında (KTMT) iştirakını donduraraq Qərblə münasibətlərini dərinləşdirmək kursu seçərək Kremli qəzəbləndirib. Rusiya prezidenti Vladimir Putin bu yaxınlarda İrəvanın mövqeyinə işarə edərək, Ermənistanı dolayı yolla "Ukrayna ssenarisi" ilə üzləşə biləcəyi ilə hədələyib.
Qərb kəşfiyyatının hesabatlarına və “Reuters”in hərtərəfli araşdırmasına görə, Moskva Paşinyanın Vətəndaş Müqaviləsi Partiyasının seçkilərdə qalib gəlməsinin və Qərbyönlü istiqamətini möhkəmləndirməsinin qarşısını almaq üçün çoxşaxəli təzyiq kampaniyası aparır. Kremllə əlaqəli aktyorların dezinformasiya şəbəkələri qurduğu, saxta media təşəbbüsləri vasitəsilə müəyyən manipulyasiya kampaniyası apardığı və Rusiyada yaşayan çox sayda Ermənistan vətəndaşını Paşinyanın rəqiblərinə səs vermək üçün Ermənistana göndərdiyi iddia edilir.
Moskvanın bu prosesdə üstünlük verdiyi namizəd isə hazırda Ermənistanda hökuməti devirməyə cəhd ittihamı ilə mühakimə olunan erməni əsilli rusiyalı milyarder iş adamı Samvel Karapetyandır.
Siyasi manevrlərlə yanaşı, Rusiya son aylarda Ermənistanın təbii qaza endirimli çıxışını dayandıra biləcəyi barədə xəbərdarlıq edərək, eyni zamanda meyvə, tərəvəz, çiçək və brendi kimi həyati əhəmiyyətli Ermənistan məhsullarının idxalına ardıcıl məhdudiyyətlər tətbiq edərək Yerevana qarşı iqtisadi kart oynayıb.
Siyasi manevrlərlə yanaşı, Rusiya son aylarda Ermənistanın endirimli təbii qaza çıxışını dayandıra biləcəyi barədə xəbərdarlıq edərək, eyni zamanda meyvə, tərəvəz, çiçək kimi həyati əhəmiyyətli Ermənistan məhsullarının idxalına ardıcıl məhdudiyyətlər tətbiq edərək İrəvana qarşı iqtisadi kartdan da istifadə edir.
Ermənistanda səsvermədən əvvəl Vaşinqtondan İrəvana çox güclü dəstək mesajı gəlib. ABŞ Dövlət Departamenti xarici müdaxilə və Baş nazir Paşinyanın nüfuzunu sarsıtmaq məqsədi daşıyan dezinformasiya kampaniyaları iddialarından sonra Ermənistanın suverenliyinə və demokratik təsisatlarına sadiqliyini bir daha təsdiqləyib.
Dövlət Departamentinin sözçüsü Ermənistanın siyasi proseslərinə xarici müdaxilə ilə bağlı mediada yayılan məlumatlardan xəbərdar olduqlarını bildirib. O, qeyd edib ki, erməni xalqının öz rəhbərliyini seçmək və öz gələcəyini formalaşdırmaq hüququ var.
ABŞ Dövlət Katibi Marko Rubio isə Senatın Xarici Əlaqələr Komitəsindəki çıxışında Rusiyanın fəaliyyətinə toxunaraq bildirib: "Ruslar oradakı varlığımızdan və Ermənistanla artan münasibətlərimizdən qətiyyən məmnun deyillər. Açıq mənbə məlumatları və əlimizdə olan dəlillər göstərir ki, onlar hazırkı baş nazirin bu seçkilərdə uduzmasını çox istəyirlər. Bizim məqsədimiz Ermənistanın suverenliyini pozmaq deyil, əksinə, onların müstəqil xarici siyasət yürütmək qabiliyyətini dəstəkləməkdir".
Tahir TAĞIYEV
