Məhərrəm Zülfüqarlı: “Əslində Rusiya üçün ən böyük təhlükə ABŞ-dan gəlir”
İrəvanın hazırkı kursu Rusiyanın maraqlarına qarşı konkret hərəkətlərə gətirib çıxarır. Bunu Rusiya Xarici İşlər Nazirliyinin sözçüsü Mariya Zaxarova bildirib.
O bu sıraya ABŞ dövlət katibi Marko Rubionun Ermənistana səfərini daxil edib: “Bu, rəsmi İrəvanın Qərb ölkələri ilə əməkdaşlığı artırmaq üçün atdığı konkret addımların sadəcə bir nümunəsidir. Amma praktikada bu addımlar Rusiyanın maraqlarına qarşı konkret hərəkətlərə gətirib çıxarır”.
Burada diqqəti çəkən məqam odur ki, Moskva daha çox Ermənistanın Avropa İttifaqı ilə yaxınlaşmasını hədəf alırdı. ABŞ-la yaxınlaşmanı şərh etməkdən yayınırdı. Bu dəfə isə ABŞ-la yaxınlaşmanın onların zərərinə olduğunu açıq vurğulayırlar. Maraqlıdır, Vaşinqtondan Paşinyan hakimiyyətinə dəstəyin artması Rusiya ilə ABŞ arasında gərginliyin yaranmasına, bunun kəskinləşməsinə səbəb ola bilərmi?
Sözügedən məsələni baki-xeber.com-a şərh edən tarix elmləri doktoru, professor Məhərrəm Zülfüqarlının fikrincə, Ermənistanda 7 iyunda keçiriləcək seçkilər dünyanın diqqət mərkəzindədir: “Xüsusən də Ermənistana qonşu olan ölkələr prosesləri diqqətlə izləyir. Çünki oradakı proseslərin regiona da təsiri ola bilər. Hazırda Rusiyapərəst qüvvələrlə, Qərbpərəst qüvvələr arasında mübarizə gedir. Sanki xeyirlə şər arasında mübarizə gedir. Məsələ ondadır ki, Ermənistan və erməni xalqı uzun illər Rusiyanın əlində oyuncaq olub. Sözügedən oyuncaq rejimlərdən Rusiya öz maraqları üçün istifadə edib. Bunu Paşinyanın komandası, erməni əhalisinin böyük hissəsi başa düşür. Məhz bundan çıxış edərək Rusiyadan uzaqlaşmaq və Qərbə inteqrasiya inteqrasiya mövqeyi tutmağa başlayıblar. Bunu biz Azərbaycanın 44 günlük Vətən müharibəsində qələbəsindən sonra da gördük. Belə ki, 2021-ci ilin iyununda keçirilən parlament seçkilərində erməni əhalisi məğlub Paşinyana səs verdi. Məlum oldu ki, erməni xalqı Rusiyanın məkrli siyasətindən bezib və oyuncaq olmaqdan azad olmaq istəyir. Rusiya məlum səbəblərdən 5 ildir Ukrayna ilə müharibə vəziyyətindədir. Əvvəlki mövqelərini itirib, iqtisadi-hərbi cəhətdən çöküb. Belə vəziyyətdə yenə də öz əvvəlki imperiya siyasətindən əl çəkmir. Moskva çalışır ki, 7 iyun seçkilərində Rusiyaya bağlı qüvvələri hakimiyyətə gətirsin. Nəticədə növbəti dəfə Ermənistandan forpost kimi istifadə etsinlər. ABŞ və Avropa İttifaqının Rusiya ilə münasibətlərinə gəldikdə isə, burada geosiyasi mübarizə gedir. Rusiya əsas Avropa İttifaqını ona görə hədəf alır və ABŞ-a sərt reaksiya vermir ki, bunların arasında müəyyən problemlər var. Söhbət Aİ ilə Birləşmiş Ştatlar arasında gedən problemlərdən gedir. Trampın Aİ-ni sərt tənqid etməsi, NATO-da müttəfiqlərinə yuxarıdan aşağı baxması Rusiyada belə bir fikir yaradır ki, ABŞ əsas hədəf kimi Aİ-ni seçsin. Bu minvalla Trampla yaxınlaşma yolunu tutsun. Çünki Tramp çox zaman ziddiyyətli çıxışları ilə Rusiyaya müəyyən ümidlər verir. Hətta İranla müharibəyə başlayandan sonra Rusiya nefti ilə bağlı sanksiyaları götürdü. Bu anlamda Rusiya Tramp hakimiyyəti ilə məsafə saxlamağa, onu qıcıqlandırmamağa çalışır. Məhz buna görə Rusiya əsas hədəf kimi Aİ-ni seçir. Ancaq yaddan çıxarır ki, Trampın Cənubi Qafqazda ən böyük layihəsi TRIPP yoludur. Bu dəhlizi ABŞ bilavasitə Cənubi Qafqazda nüfuzunun artması üçün himayə edir. Bunu gələcəkdə burada söz sahibi olması kimi dəyərləndirir. Əslində Rusiya üçün ən böyük təhlükə ABŞ-dan gəlir. Yəni Paşinyan qalib gələrsə, TRIPP açılarsa, Rusiyanın Cənubi Qafqazdan sürətlə çıxacağı qaçılmazdır. Rusiyanın Gümrüdəki hərbi bazaları da ləğv ediləcək. Bununla da Cənubi Qafqazda dayanıqlı sülh bərqərar olacaq. Regionda sülhün bərqərar olmasında maraqlı olmayan qüvvə Rusiyadır. Ona görə də belə manevrlər edir”.
Vidadi ORDAHALLI
