Elşən Manafov: “Konkret olaraq indidən hansı kəndlərlə mübadilə olacağını demək çətindir”
Başkənd məsələsinin həlli variantlarından biri mübadilə ola bilər. Bunu Paşinyan Göyçə vilayətində seçkiqabağı kampaniyası zamanı deyib. Onun sözlərinə görə, Ermənistan tərəfi üçün bu məsələ artıq gərginlik səbəbi deyil.
“Prinsip budur: Ermənistan və Azərbaycan delimitasiya prosesi ilə bir-birinə zərər vermək, yoxsa bizim və onların övladlarının artıq bu problemlərlə məşğul olmamaları üçün bu məsələləri həll etmək istəyirlər? Bizim vəzifəmiz uşaqlarımıza kadastr sənədi olan bir ölkə qoymaqdır. Qalan tək şey kadastr sənədindəki planları yekunlaşdırmaq və bu kadastr sənədi ilə təsdiqlənmiş bir dövləti nəsildən-nəslə ötürməkdir. Təhlükəsizlik olacaq və Ermənistanın müdafiə qabiliyyəti daim inkişaf edəcək”, - Paşinyan bildirib.
Məlumat üçün qeyd edək ki, Gədəbəy rayonunda yerləşən Başkənd kəndi SSRİ dövründə Ermənistanın Azərbaycandakı eksklavı olub və 1992-ci ildən Azərbaycanın nəzarətindədir. Anklav və eksklavların taleyi Azərbaycan-Ermənistan sərhədlərinin delimitasiyası üzrə danışıqlarda açıq qalan məsələlərdən biri hesab olunur.
Maraqlıdır, Paşinyan Başkəndi Azərbaycanın hansı ankılav kəndi ilə dəyişmək istəyir? Axı bizim 4 ankılav kəndimiz Ermənistanın işğalı altındadır.
Sözügedən məsələ ilə bağlı fikirlərini baki-xeber.com-la bölüşən politoloq Elşən Manafov bununla bağlı bir sıra məqamlara toxundu: “2020-ci ildə İkinci Qarabağ müharibəsi və 2023-cü ildə keçirilən antiterror əməliyyatlarından sonra ərazi bütövlüyümüz və suverenliyimiz tam təmin edilib. Bundan sonra münaqişə tərəfləri arasında problemlərin nizamlanması məqsədilə demarkasiya və delimitasiyası mövzusunda aparılan danışıqlarda hər iki tərəfin anklavları, onların statusu ilə bağlı məsələlər müzakirə edilir. Anklavlar qarşılıqlı iddiaları müzakirələrdə gərginlik doğuran məsələlərdən biri kimi qalmaqdadır. Ermənistan ərazi konteksində ona aid olan Başkəndin, Azərbaycan isə hazırda Ermənistanın Ararat vadisində olan və Naxçıvanla həmsərhəd bölgədə yerləşən Kərki kəndinin, habelə Qazax rayonun ərazisində olan sonralar isə işğal nəticəsində Ermənistanın nəzarətinə keçən Yuxarı Əskipara, Sofulu və Barxudarlı kəndlərinin ona qaytarılması mövqeyindən çıxış edir. Rəsmi Bakı ümumiyyətlə ona aid olan 8 anklavın adını çəkir. Hazırda, Başkənd Azərbaycanın nəzarətindədir. Burada məskunlaşan azərbaycanlılar kəndin ərazisindən maldarlıq, habelə əkinçilik məqsədləri ilə istifadə edirlər. Zamanında Gədəbəyə aid olan bu kənd əsasən ermənilərlə məskunlaşdığından onun kənd təsərrüfatı məqsədləri ilə hələ 1920-ci ildə Ermənistana verilməsi barədə Sovet rəhbərliyi tərəfindən qərar qəbul edilib. Azərbaycan özünə aid bildiyi anklavların ərazisindən Ermənistan Silahlı Qüvvələrinin çıxarılmasını tələb edir. Bu il aprelin 19-da hər iki tərəfdə demarkasiya məsələlərinin həlli ilə məşğul olan hökumət komissiyalarının birgə iclasında 4 anklavın Azərbaycana verilməsi ilə bağlı qərar qəbul edilib. Qalan anklavlarla bağlı erməni tərəfi ərazi mübadilələrinin həyata keçirilməsini təklif edir. Başkəndlə bağlı məsələ daha kəskindir. Bu kənd 1992-ci ildə Azərbaycanın nəzarətinə keçib”.
Politoloqun fikrincə, Paşinyan bu günlərdə Ermənistanda parlament seçkiləri ilə bağlı seçicilərlə görüşü zamanı Başkəndin Ermənistana aidiyyəti ilə bağlı fikirlər səsləndirib: “Bu da Azərbaycanda ciddi polemika və müzakirələrə səbəb olub. Paşinyan mövcud problemin danışıqlarda konfrantasiya deyil, qarşılıqlı anlaşma çərçivəsində həllinin tərəfdarı olduğunu bildirib. Müxalifət isə buna görə onu təslimçilikdə və Azərbaycana güzəştlərdə ittiham edir. Aydındır ki, qarşı tərəf siyasi opponentini nüfuzdan salmaq və əksinə özlərinin guya ki, vətənpərvər olması ilə bağlı divident toplamaq kampaniyası aparırlar. Ümumiyyətlə isə anklavlarla bağlı problemlərin nizamı hər iki tərəfdə referendumların keçirilməsi zərurətini doğuracaq. Konkret olaraq indidən hansı kəndlərlə mübadilə olacağını demək çətindir”.
Vidadi ORDAHALLI
