Zaur İbrahimli: “Bütün dünya bu təşkilatın hansı yuvanın quşu olduğunu görür”
“Human Rights Watch” yenə də anti-Azərbaycan fəaliyyətini davam etdirir. Bu təşkilat növbəti dəfə reallıqdan uzaq bəyanat verərək qeyd edib ki, Azərbaycan erməniləri Qarabağa qaytarmaq üçün heç bir addım atmayıb. Azərbaycan beynəlxalq öhtəlikləri guya pozub. Azərbaycanın ermənilər Qarabağa qayıtmalı olduğunu iddia ediblər. Guya ermənilərin haqqları pozulub və sair. Bu qurumun ölkəmizə qarşı böhtançı mövqeyi hələ də davam edir.
Azərbaycan dəfələrlə bəyan edib ki, kim istəyirsə geri qayıdıb Azərbaycan vətəndaşı kimi yaşaya bilər. Halbuki, ermənilər özləri könüllü şəkildə getmək istədiklərini bildirdilər və ərazilərimizi tərk etdilər. Qarabağda indi də ermənilər var, Azərbaycan onları qoruyur, saxlayır, qayğılarına qalır, onlar isə getməkdə israr edirlər. “Human Rights Watch” əvvəlki qərəzli möveyində qalması nə ilə bağlıdır? Hələ də bu qurumu müdafiə edən dövlət gücləri varmı? Ona görəmi onlar həmin qərəzli mövqedə qalırlar?
Azərbaycan Milli QHT Forumunun İdarə Heyətinin üzvü Zaur İbrahimli “Bakı-Xəbər”ə bildirdi ki, “Human Rights Watch” bir qayda olaraq anti-Azərbaycan mövqeyində durur. “Bu dəfəki mövqeyi isə tamamilə faktlardan, həqiqətdən, reallıqdan uzaqdır. Həm də özlərinin əvvəlki mövqeyinə ziddir. Belə ki, “Human Rights Watch”ın özü məhz Azərbaycanın Bərdə şəhərinə ballistik raketlə hücumu dinc əhaliyə edilən hücum kimi qiymətləndirmişdi və bununla bağlı mövqe ifadə etmirmişdi, onu öz hesabatında da əks etdirmişdi. Azərbaycanın dinc şəhər və kəndlərinə hücumun məhz indi barələrində hökm çıxarılan qondarma, separatçı, oyuncaq qurumun “rəhbərliyində” təmsil olunan şəxslər tərəfindən həyata keçirildiyi isə sirr deyil. Çünki bu şəxslər özləri açıq şəkildə kütləvi informasiya vasitələrinə müsahibələr verib bəyan etmişdilər ki, məhz onların əmri ilə bu zərbələr həyata keçirilib. Keçmiş “Dağlıq Qarabağın” keçmiş “prezidenti” Araik Hartunyunyan belə bir açıqlama vermişdi. İkincisi, cinayətkar milyarder, Azərbaycana qarşı təcəvüzkar müharibənin planlaşdırılması və həyata keçirilməsində bilavasitə iştirak edən, bu fəaliyyətləri maliyyələşdirən Ruben Vardanyanın özünün silsilə müsahibələri var. Orada Azərbaycana qarşı qanunsuz silahlı dəstələr yaratmaq, o silahlı dəstələri maliyyələşdirmək və Azərbaycana qarşı təcavüzkar müharibəni planlaşdırılmasında və həyata keçirilməsində iştirakını öz müsahibələrində təsdiqləyib. Bu baxımdan, “Human Rights Watch” təşkilatının bu cür mövqedən çıxış etməsi ilk növbədə insan hüquqları təşkilatının fəlsəfəsinə ziddir. Bu insan hüquqları hərəkatını gözdən salır.
Çox təəssüf ki, “Human Rights Watch” öz yaydığı hesabatla daban-dabana zidd mövqe nümayiş etdirir. Bu da o təşkilatın bir daha ikili mövqeyini, ikili standartlardan çıxış etdiyini bir daha ortaya qoyur. Bütün dünya bu təşkilatın hansı yuvanın quşu olduğunu görür. Bunu biz demirik, hazırda Tramp iqtidarı bəyan edir. Təsadüfi deyil ki, Tramp iqtidarının qərarı ilə “Human Rights Watch”ın əsas donorlarından olan ABŞ Beynəlxalq İnkişaf Agentliyi fəaliyyətini dayandırdı. O cümlədən bu yaxınlarda ABŞ Dövlət Departamenti bütün dünya üzrə guya insan hüquqlarının qorunması adı altında maliyyələşdirilən bir çox proqramların maliyyələşdirilməsini dayandırıb. Burada “bərabərlik”, cinsi azlıqların müdafiəsi və sairlə bağlı məsələlər var idi. Bu baxımdan, “Human Rights Watch” əvvəlki qədər nüfuzlu mövqeyə iddia edə bilməz”.
Z.İbrahimli vurğuladı ki, zaman keçdikcə mərhələ-mərhələ bu cür təşkilatların mövqeyi tamamilə zəifləyəcək. “Təsəvvür edin ki, bu təşkilatın bəyanatlarına dünyada əvvəlki qədər əhəmiyyət verilmir. Vaxtilə Azərbaycanla bağlı insan hüquqları dərsi keçən Torbyorn Yaqlandın “Epşteyn fayllarında” adının keçməsi də göstərdi ki, məhz bu cür insan hüquqları dərsləri keçən şəxslərin, təşkilatların bir çoxu çirkli pullarla əlaqəlidirlər. Onların arxasında silah alverçiləri durur, onlar beynəlxalq korrupsiya şəbəkəsi tərəfindən maliyyələşdirilir. Zaman keçdikcə bu həqiqətlər daha geniş şəkildə üzə çıxacaq. Bu baxımdan hesab edirəm ki, bu təşkilatın bu açıqlaması yalnız onların özləri üçün maraqlıdır, dünyada heç ciddi təşkilat bu hesabatları obyektiv hesab etmir və diqqətə almır. Lakin əlbəttə ki, onlar öz səylərini davam etdirəcəklər, bu qurum Azərbaycana reputasiya zərbələri vurmağa çalışır. Ancaq artıq dünya dəyişib, onlara qulaq asanların da sayı çox azalıb. Yaxşı olar ki, onlar da baş verənlərdən nəticə çıxarsınlar, obyektiv mövqeyə gəlsinlər. Azərbaycan obyektiv mövqe tutan istənilən beynəlxalq təşkilatla, insan hüquqları qurumu ilə əməkdaşlığa hazırdır. Bundan sonra da bu mövqe davam edəcək”-deyə Z.İbrahimli bildirdi.
İradə SARIYEVA
