Bəhruz Quliyev: “...Məmur dilində köhnə ehtiram formalarının qalması artıq suallar doğurur”
Ağır dövləti cinayətlərdə ittiham olunan və barəsində ev həbsi hökmü çıxarılan Prezident Administrasiyasının sabiq rəhbəri, AMEA-nın keçmiş prezidenti Ramiz Mehdiyevə münasibətdə bəzi məmurlar hələ də “qüsur” etmirlər. Hələ də bəzi dövlət məmurları Ramiz Mehdiyev barədə qəfil jurnalist suallarına cavab verərkən “Ramiz müəllim” ifadəsi işlədir, birdən çaşdıqlarını başa düşərək tez düzəliş edirlər. Bu nə deməkdi? Bu, o adamların canından R.Mehdiyevin qorxusunun çıxmamasının nəticəsidir, yoxsa ona qəlbən, ürəkdən bağlılığın əlamətidir?
“Burada söhbət yalnız qorxudan yox, həm də uzun illər formalaşdırılmış şəxsiyyətə pərəstlik idarəçilik ənənəsinin hələ də tam qırılmamasından gedir”
“Uzun illər Prezident Administrasiyasının rəhbəri olmuş Ramiz Mehdiyev haqqında jurnalist suallarına cavab verən bəzi məmurların hələ də qeyri-ixtiyari şəkildə “Ramiz müəllim” ifadəsini işlətməsi, ardınca isə bunu tələsik düzəltməsi sadəcə dil vərdişi deyil, daha dərin psixoloji və siyasi məna daşıyır.
Xatırlatmaq yerinə düşər ki, Ramiz Mehdiyevin adı təkcə keçmiş vəzifəsində işləyərkən qüsurları ilə deyil, həm də dövlətə xəyanət maddəsi üzrə irəli sürülmüş ittihamlar və bu istiqamətdə aparılmış istintaq müzakirələri ilə gündəmə gəlib. Söhbət dövlətin maraqlarına zidd fəaliyyət iddialarından, siyasi və ideoloji sabotaj ehtimallarından gedir. Belə ağır məzmunlu ittihamların cəmiyyətdə müzakirə olunduğu bir şəraitdə məmur dilində köhnə ehtiram formalarının qalması artıq suallar doğurur.
Bu vəziyyət göstərir ki, bəzi məmurlar üçün keçmiş statuslar hələ də hüquqi və siyasi reallıqlardan üstün tutulur. Halbuki dövlətə xəyanət kimi ağır bir maddə ilə ittiham olunmuş şəxsə münasibətdə terminologiyanın özü belə məsuliyyət tələb edir. Burada söhbət yalnız qorxudan yox, həm də uzun illər formalaşdırılmış şəxsiyyətə pərəstlik idarəçilik ənənəsinin hələ də tam qırılmamasından gedir." Bu fikirləri mövzu ilə əlaqədar baki-xeber.com-a “Səs” qəzetinin baş redaktoru, siyasi ekspert Bəhruz Quliyev deyib.
Baş redaktor qeyd edib ki, dövlət məmuru bilməlidir ki, onun dili artıq keçmiş fiqurların kölgəsində yox, qanunun və dövlət maraqlarının işığında formalaşmalıdır. “Dövlətə sədaqət sözlə yox, mövqe və davranışla ölçülür. Əgər bir zamanlar sistemin zirvəsində olmuş bir şəxs dövlətə xəyanət maddəsi ilə ittiham olunursa, bu, həmin sistemdə çalışmış hər kəs üçün ciddi dərs olmalıdır.
Bu cür “çaşmalar” cəmiyyətə açıq mesaj verir ki, bəzi başlar hələ də dünənin qorxusu və ya loyallığı ilə düşünür. Ancaq yeni mərhələdə dövlətçilik şəxslərə bağlılıq yox, qanuna və milli maraqlara sədaqət tələb edir. Əsl islahat da məhz buradan başlayır," - deyə, ekspert əlavə edib.
İradə SARIYEVA
