Akif Nağı: “İnanmıram ki, Ermənistan AİİB-dən belə tezliklə əl çəkə bilər”
Ermənistanın xarici işlər naziri Ararat Mirzoyan deyib ki, Avropa İttifaqı (Aİ) ilə münasibətləri dərinləşdirmək Rusiya ilə münasibətləri kəsmək məqsədi daşımır.
O bildirib ki, Ermənistan hökumətinin məqsədi Rusiya ilə siyasi, iqtisadi və ya digər əlaqələri kəsmək deyil: “Avropa İttifaqı ilə münasibətlərimizi dərinləşdirmək Rusiya ilə əlaqələri kəsməyə yönəlməyib. Əgər bir gün Avropa İttifaqına qoşulmaq məsələsi ortaya çıxsa, Avrasiya İqtisadi Birliyi məsələsi də mütləq ortaya çıxacaq və bu an gələndə, biz əyləşib qərar qəbul edəcəyik. Avropa İttifaqı ilə münasibətlərimiz tədricən dərinləşir”.
“Ermənistan rəsmən bunu bəyan etməklə Rusiyanı təlaşa salmağa çalışır ki...”
Ermənistanın nə Aİ-dən, nə də AİİB-dən qopmaq istəməməsinə, hər ikisindən yapışmasına, seçim tələb olunarsa Aİ-ni seçə biləcəyinə şərh verən Azad Vətən Partiyasının sədri Akif Nağı baki-xeber.com-a bildirdi ki, ermənilər heç vaxt sədaqətli, etibarlı tərəfdaş olmayıblar. Əslində ermənilər üçün dövləti Rusiyanın yaratdığını deyən A.Nağının fikrincə, amma Ermənistan öz kiçik maraqlarına görə dərhal xəyanət edir. Osmanlı dönəmində Türkiyənin ermənilərə hədsiz hörmət göstərdiyini, onlara şərait yaratdığını deyən A.Nağı qeyd etdi ki, onlar Osmanlıya da xəyanət etdilər. “Ermənistan hər yerdə öz kiçik maraqlarını güdür. Görsələr ki, Avrasiya İqtisadi Birliyindən uzaqlaşmaq onlar üçün iqtisadi baxımından sərfəlidir, uzaqlaşacaqlar. Yəni bunu ölçüb-biçəcəklər. Əslində Ermənistan iqtisadi cəhətdən Rusiyadan asılıdır, onların iqtisadiyyatı əsasən Rusiyanın əlindədir. İnanmıram ki, Ermənistan AİİB-dən belə tezliklə əl çəkə bilər. Özləri də bilirlər ki, hələ Aİ ilə məsələ həll olunmur, Aİ də məsələləri onların qarşısında konkret qoymur. Məsələ belədir ki, Ermənistanla bağlı Rusiyanın da, Aİ-nin də, Qərbin də mövqeyi təxminən “başa düşmək” səviyyəsindədir. Rusiya başa düşür ki, Ermənistan həm də Avropa ilə əlaqə saxlamalıdır. Bununla razılaşır. Eyni zamanda Aİ-də də başa düşürlər ki, Ermənistanı birdən-birə tam şəkildə Rusiyadan qoparmaq məqsədəuyğun deyil. Ona görə də, onlar bunu nəzərdə saxlayırlar ki, Rusiya ilə əlaqələri qalsın. Hesab edirəm ki, ortada Ermənistanın Rusiyadan tam qopmaq məsələsi yoxdur. Mirzoyan da, başqaları da müəyyən açıqlamalar verirdilər ki, KTMT-dən də Ermənistanın çıxmaq fikri yoxdur. Eyni zamanda da AİİB-dən çıxmağı düşünmürlər. Rusiya ilə də münasibətləri normal saxlayırlar. Hətta son rəsmi açıqlamalarda deyirdilər ki, Rusiyanın hərbi bazasının Ermənistandan çıxarılması gündəmdə deyil. Rusiyaya güzəştə gedirlərsə, demək başqa məsələlərdə də Rusiyanın mövqeyini nəzərə alırlar. Ona görə də hesab edirəm ki, Ermənistan rəhbərliyi bu məsələdən kimlərdənsə nəsə almaq üçün təzyiq vasitəsi kimi istifadə edir.
Ermənistan hökuməti bütün addımları seçkilərlə bağlı atır. Seçki ərəfəsində Mirzoyanın belə ikibaşlı mövqe sərgiləməsi də təsadüfi deyil. Çünki həm ölkənin daxilində, həm də xaricində apardıqları siyasətdə, ayrı-ayrı dövlətlərlə münasibətlərində yalnız seçkiləri düşünürlər. Paşinyan və komandası nəyin bahasına olursa olsun hakimiyyətdə qalmaq istəyir. Eyni zamanda bunun üçün də Rusiyadan gələn hər hansı bir təhlükəni neytrallaşdırırlar. Həm də Avropadan ciddi dəstək almağa çalışırlar.
Ermənistan rəsmən bunu bəyan etməklə Rusiyanı təlaşa salmağa çalışır ki, “seçim qarşısında qalsaq AAİB-dən çıxa bilərik”. Onlar Rusiyanı seçkilərdə radikal müxalifəti, yaxud başqa bir namizədi dəstəkləməkdən çəkindirmək istəyirlər”.
A.Nağı hesab edir ki, bu əslində Rusiyaya bir mesajdır. O qeyd etdi ki, bu tezliklə Ermənistanın Aİ-yə üzv qəbul olunması real deyil, bu gün sadələşdirilmiş viza ilə gediş-gəliş gündəmdədir: “Ermənistanın Aİ-yə üzv qəbul ediləcəyi barədə ciddi söhbət yoxdur. Sadəcə olaraq, Rusiyaya mesaj göndərmək istəyirlər ki, əgər seçkilərdə Paşinyanın mövqeyinə zərbə vurarsa, başqa bir qüvvəni dəstəkləyərsə və Paşinyan hakimiyyətdə qalarsa Rusiyaya qarşı mövqe dəyişə bilər və sair. Bu açıqlama da Rusiayaya müəyyən bir təzyiq elementi ilə bağlıdır, Rusiyanı Ermənistanın daxilində gedən proseslərdən bir qədər çəkindirmək istəyidir”-deyə A.Nağı qeyd etdi.
İradə SARIYEVA
