Azər Həsrət: “Səfirlik mütləq o görüşün ayrıntıları haqda məlumat verməlidir”
Azərbaycanın Rusiyadakı səfirliyinin təşəbbüsü ilə Moskvada Dünya azərbaycanlılarının həmrəyliyi günü və Yeni il münasibətilə Azərbaycan və Rusiya ziyalılarının nümayəndələrinin görüşü baş tutub.
Mətbuatın yazdığına görə, görüşdə iki ölkə arasında humanitar əlaqələrin əhəmiyyəti xüsusi vurğulanıb.
Tədbirdə alimlərin, mədəniyyət və incəsənət xadimlərinin iştirak etdiyi bildirilir.
İki ölkənin ziyalıları, elm və mədəniyyət xadimləri arasında belə görüşlərin keçirilməsi müsbətdir. Amma məsələ ondadır ki, belə bir görüşün keçiriləcəyi ilə bağlı əvvəlcədən heç bir məlumat yayılmayıb, ictimaiyyətin bundan xəbəri olmayıb.
Bu görüşlər haqqında niyə geniş məlumat verilmir? Hansı ziyalılar iştirak edib, orada Azərbaycandan hansı ziyalılar olub? Rusiyadan hansı ziyalılar olub? Azərbaycandan hansı ziyalı nə kimi mövqe ifadə edib? Rusiyadan hansı ziyalı hansı mövqeni sərgiləyib?
Təbii, biz Azərbaycan ictimaiyyəti olaraq Rusiya ziyalılarının mövqeyinə bələdik. Bir çox hallarda şahidi oluruq ki, onlar bizə qarşı heç də xoş olmayan mövqe bildirirlər. Hətta həmin ziyalılar arasında Bakını bombardman etməyə, neft kəmərlərini vurmağa çağıranlar da, Heydər Əliyevin Rusiyadakı abidələrini sökməyi təklif edənlər də olub. Biz indi nə bilək ki, o görüşdə iştirak edənlər arasında o ziyalılardan, yaxud onlara yaxın olanlardan kimsə iştirak etməyib? Olmazdımı ki, bu ziyalıların tərkibi əvvəlcədən elan olunaydı, fikrimizcə, bu daha məntiqli olardı.
“O görüşdə iştirak edənlər adbaad sadalanmalıdır”
Siyasi şərhçi Azər Həsrət baki-xeber.com-a bildirdi ki, belə bir görüş olubsa, əlbəttə, bu görüş barədə ayrıntılı məlumat verilməsi zəruridir. “Hələ belə bir görüşün təşəbbüskarı Azərbaycanın Rusiyadakı səfirliyidirsə, səfirlik mütləq o görüşün ayrıntıları haqda məlumat verməlidir. Həm də o görüşdə iştirak edənlər adbaad sadalanmalıdır. Bu məxfi görüş deyil ki, adlar gizlədilsin. O kateqoriyadan olan görüş olsaydı bu başqa məsələ idi. Ziyalılar arasında hansısa görüşdən danışılır, adbadad hamı göstərilməli, şəkillər, videolar olmalı idi. Ondan sonra görüşdə nələrin müzakirə olunduğu, hansı fikirlərin səsləndirildiyi barədə məlumatlar mütləq açıqlanmalıdır. Ona görə də düşünürəm ki, Azərbaycanın Moskvadakı səfirliyi görüşlə bağlı bizim üçün qaranlıq, gizlin qalan suallara aydınlıq gətirməli, əlavə məlumat yaymalıdır. Bəlkə də yayıblar görməmişik...
Mən Rəhman Mustafayevi diplomat kimi uzun illərdir tanıyıram, kifayət qədər də uğurlu bir səfirdir. Onun belə bir səhv edəcəyini də düşünmürəm ki, görüş keçirilsin və nəyisə gizli tutsun. Səfirliklər bir qayda olaraq bu cür tədbirləri keçirəndə, təbii ki, Xarici İşlər Nazirliyindən müvafiq icazə və təlimatları alırlar, belə görüşlər onun çərçivəsində keçirilir”.
A.Həsrət düşünmür ki, Azərbaycan Xarici İşlər Nazirliyi və müvafiq olaraq da Prezident Adminstrasiyası belə bir görüşün keçirilməsinə icazə verə, amma onun ayrıntılarının açıqlanmasına icazə verməyə. “Bu mümkün deyil. Ona görə düşünürəm ki, jurnalist həmkarlarımız bu işin üstünə getməlidirlər və ayrıntılı məlumatlar əldə edilməlidir. Ondan sonra biz artıq dəyərləndirmə apara bilərik ki, kimlər iştirak etdi, hansı fikirlər səsləndirildi. Bunun ətrafında ondan sonra danışmaq olar. İndi biz konkret məlumata malik olmadığımız və yalnız görüşün olduğu faktını bildiyimiz üçün fikirimizi bununla yekunlaşdırırıq”.
İradə SARIYEVA
