İlyas Hüseynov: “Cənab Prezident tərəfindən Ağdamda bu fikirlərin söylənilməsi heç də təsadüfi deyil”
Prezident İlham Əliyev dekabrın 24-də Ağdamda 2-ci yaşayış kompleksinin açılışı mərasimindəki çıxışında müxtəlif ölkələrin Ermənistana qadağan olunmuş silahlar verdiyini bildirib. Prezident Əliyev çıxışında qeyd edib:
“...Bizim həm İkinci Qarabağ müharibəsi, həm antiterror əməliyyatı nəticəsində Ermənistandan qənimət kimi götürdüyümüz və məhv etdiyimiz silahların pul dəyəri təqribən 5-6 milyard dollardır. Bunların dağılmış bəzi nümunələri Bakıda Hərbi Qənimətlər Parkında nümayiş etdirilir,
o cümlədən “İsgəndər M” ballistik raketi, hansı ki, ümumiyyətlə, Ermənistanda olmamalı idi. Çünki “İsgəndər M” raketinin ixracı qadağandır. Əgər belə demək mümkündürsə, ixraca açıq olan “İsgəndər E”, yəni eksport növüdür. “İsgəndər M” raketi necə Şuşaya zərbə endirdi? Elə bu, böyük sualdır. Yəni pulsuz silah, maliyyə yardımı...”
2016-cı il aprel döyüşlərindən sonra Rusiya Ermənistana ixracı qadağan olunan “İskəndər M” raketlərini verdi, müharibə dövründə həmin raketlə Şuşanı vurdular.
Yəni 44 günlük müharibədə həmin raketlərlə Ermənistan bizi vurdu.
Məlum odluğu kimi, 44 günlük müharibə dövründə İran ərazisindən Ermənistana silah-sursat göndərildi. Həmin dövrdə mediada getmiş silah daşıyan Rusiya təyyarələrinin uçuş trayektoriyasını əks etdirən xəritələr, Rusiyaya səfər edən Ermənistan rəsmilərinin təyyarələrində silah göndərilməsi, İran ərazisindən dəmir yolu ilə silah-sursat daşınması faktları mövcuddur.
Burada sual yaranır: cəmi 4 ay sonra nələr dəyişdi ki, Azərbaycanı məhv etmək üçün Ermənistana belə dağıdıcı sılah verən Rusiyanın mövqeyi dəyişdi?
“Azərbaycan Silahlı Qüvvələrinin düşmənə sarsıdıcı zərbələr endirməsi Rusiyanı da yenidən düşünməyə sövq etdi”
Politoloq İlyas Hüseynov “Bakı-Xəbər”ə bildirdi ki, 2016-cı ildə Aprel döyüşlərində Azərbaycan öz gücünü, qüdrətini və Silahlı Qüvvələrimizin peşəkarlığını nümayiş etdirdi: “Aprel döyüşlərində Azərbaycan Silahlı Qüvvələrinin düşmənə sarsıdıcı zərbələr endirməsi Rusiyanı da yenidən düşünməyə sövq etdi. Rusiyanın Ermənistana “İsgəndər-M” raketlərini verməsi Azərbaycanı ciddi surətdə narahat edirdi və biz nəinki qüvvələr balansını bərpa etmək, eləcə də üstünlüyə nail olmaq üçün yeni raket alışını həyata keçirdik. İsrail istehsalı olan “LORA”, Belarus istehsalı olan “Polonez” raketlərinin əldə olunması gücümüzə güc qatdı, Azərbaycan ordusunun silah arsenalını daha da genişləndirdi, eyni zamanda bu da siyasi sahəyə təsir edən amil idi. Düşünürəm ki, cənab Prezident tərəfindən Ağdamda bu fikirlərin söylənilməsi heç də təsadüfi deyil. Çünki Rusiyanın hər zaman Ermənistanı dəstəkləməsi, ona əvəzsiz silahlar verməsi bu gün də bizim yadımızdadır, yaddaşımızdadır, biz bunu unutmuruq. Aprel döyüşlərində Azərbaycanın gücünü görən Rusiya bu cür riyakar addım atdı və Ermənistana silah təchizatını davam etdirdi”.
İ.Hüseynovun sözlərinə görə, Rusiya belə şərait yaratmağa çalışırdı ki, Ermənistan Azərbaycandan daha da üstün olsun, hətta ixracı qadağan olunan raketlərin Ermənistana verilməsini həyata keçirdi: “Hətta 44 günlük Vətən müharibəsi dövründə bu raketlər vasitəsilə Şuşanın vurulması baş verdi. Ona görə bu gün postmüharibə reallıqlarında ərazi bütövlüyümüzü, suverenliyimizi təmin edən dövlət kimi yaxın keçmişimizdə baş verən prosesləri diqqətlə öyrənməli, nəzərdən keçirməli və təhlil etməliyik, buna obyektiv qiymət verməliyik”-deyə İ.Hüseynov qeyd etdi.
İradə SARIYEVA
