“Prezident bu fikri vurğulamaqla bir neçə mühüm məqamı diqqətə çatdırdı”
Prezidenti İlham Əliyev dekabrın 24-də Ağdam şəhərində 2-ci yaşayış kompleksinin açılışında bura köçən sakinlərlə görüşündə Qərb təşkilatlarının ermənipərəst mövqeyindən də danışıb.
Prezident Əliyev bildirib: “Mən 17 il ərzində ATƏT-in Minsk qrupunun həmsədrləri ilə təmasda olmuşam, onlarla çoxsaylı görüşlər keçirmişəm. Hər dəfə görüşəndə illər keçdikcə görürdüm ki, bunların məqsədi məsələni həll etmək, işğala son qoymaq, BMT Təhlükəsizlik Şurasının qətnamələrinin icrasına nail olmaq yox, işğalı əbədi etmək idi. Sanki danışıqlar masasında bir tərəfdə Ermənistan və Minsk qrupunun həmsədrləri, digər tərəfdə isə Azərbaycan idi. Bax, bu 17 il ərzində keçirdiyim saysız-hesabsız görüşlərin nəticəsi budur. Hesab edirdilər ki, buna nail olacaqlar. Hesab edirdilər ki, bizi inandırmağa nail olacaqlar ki, biz öz əzəli torpaqlarımızdan əl çəkək. Ancaq yenə də Ermənistan dövləti kimi səhv etdilər. Mən işğal dövründə dəfələrlə demişdim ki, xalqımız və dövlətimiz heç vaxt işğalla barışmayacaq, nəyin bahasına olursa-olsun, öz doğma torpaqlarını qaytaracaq. Bunu Prezident kimi fəaliyyətə başladığım ilk dəqiqələrdə - birinci andiçmə mərasimindəki çıxışımda və ondan sonrakı dövrdə bildirmişəm. Bu illər ərzində biz bir məqsəd ətrafında birləşmişdik ki, bir nöqtəyə vuraraq xalqımız bu müqəddəs missiyanı yerinə yetirsin”.
Prezident İlham Əliyev qeyd edib ki, bu məsələdə Azərbaycan tək olub, ATƏT-in Minsk qrupu və Ermənistan isə eyni tərəfdə dayanıb, yəni ikisi də sanki bir ölkəni təmsil edirmişlər kimi mövqe sərgiləyiblər.
“44 günlük Vətən müharibəsi təkcə hərbi yox, siyasi-psixoloji qələbə idi; çünki bu qələbə ilə saxta vasitəçilik institutu ifşa olundu”
Siyasi ekspert Tural İsmayılov “Bakı-Xəbər”ə bildirdi ki, Prezident İlham Əliyevin Ağdamda səsləndirdiyi bu fikirlər əslində 30 ilə yaxın davam edən beynəlxalq riyakarlığın qısa, amma son dərəcə dəqiq diaqnozudur. “Dövlət başçısı burada emosional ittiham irəli sürmür, uzun illərin siyasi müşahidəsinə və faktlara söykənən nəticəni ortaya qoyur. ATƏT-in Minsk qrupunun fəaliyyətinə dair bu açıq qiymətləndirmə göstərir ki, söhbət sadəcə nəticəsiz vasitəçilikdən yox, məqsədli şəkildə status-kvonun qorunmasından gedirdi”.
T.İsmayılovun fikrincə, Prezidentin “danışıqlar masasında bir tərəfdə Ermənistan və həmsədrlər, digər tərəfdə Azərbaycan idi” deməsi beynəlxalq münasibətlərdə nadir hallarda bu qədər açıq etiraf edilən həqiqəti üzə çıxarır: işğalçı ilə “vasitəçi” arasında mahiyyət fərqi aradan qalxmışdı:“BMT Təhlükəsizlik Şurasının qətnamələrinin 27 il kağız üzərində qalması, Ermənistanın açıq şəkildə öhdəlikləri pozmasına baxmayaraq hər hansı təzyiqə məruz qalmaması bunu təsdiqləyirdi. Minsk qrupu problemin həllini yox, idarə olunmasını seçmişdi.
Prezident bu fikri vurğulamaqla bir neçə mühüm məqamı diqqətə çatdırdı. Birincisi, Azərbaycan beynəlxalq sistemdə ədalətə arxalanmadan, öz gücünə söykənərək nəticə əldə edib. İkincisi, 44 günlük Vətən müharibəsi təkcə hərbi yox, siyasi-psixoloji qələbə idi; çünki bu qələbə ilə saxta vasitəçilik institutu ifşa olundu. Üçüncüsü, Azərbaycan sübut etdi ki, beynəlxalq hüquq yalnız onu tətbiq etməyə iradən varsa işləyir”.
İradə SARIYEVA
