Məhəmməd Əsədullazadə: “Bu, ədalətsiz bir yanaşma idi”
Azərbaycan Prezidenti İlham Əliyev dekabrın 24-də Ağdam şəhərində 2-ci yaşayış kompleksinin açılışındakı çıxışında diqqət çəkən bəyanatlar verib. Prezident bildirdi ki, Azərbaycanın işğal olunmuş ərazilərində Ermənistan hərbi qüvvələrinin xidmət göstərdiyi hamıya bəlli olsa da, buna görə Ermənistana qarşı heç bir tədbir həyata keçirilmirdi.
Prezident bildirirdi: “…İşğalçıya qarşı heç bir sanksiya tətbiq olunmadı. Bu gün dünyada müxtəlif yerlərdə müharibələr, toqquşmalar, münaqişələr baş alıb gedir. Ya beynəlxalq təşkilatlar, ya böyük nüfuzlu ölkələr dərhal nə edirlər? Sanksiyalar tətbiq edirlər. Əlbəttə ki, sanksiyaların da böyük təsiri var. Xüsusilə Ermənistan kimi kiçik və zəngin olmayan, demək olar ki, kasıb ölkəyə əgər sanksiyalar tətbiq edilsəydi, əlbəttə, Ermənistan işğala son qoyardı. Ancaq nəinki sanksiyalar tətbiq edilmədi, əksinə, onlara bəziləri pulsuz silahlar verirdi, özü də bir milyon dollarlıq yox, milyardlarla dollar dəyərində…”
30 ildə o dövlətlər, beynəlxalq qurumlar nə üçün Ermənistana qarşı hansısa addım atmadılar?
“Ermənistanın Azərbaycan torpaqlarını işğal etməsi faktına göz yuman, susan dövlətlərin əksəriyyəti…”
Politoloq Məhəmməd Əsədullazadə “Bakı-Xəbər”ə bildirdi ki, Ermənistan 30 il Azərbaycanın ərazilərini işğalda saxladı və bu da bu ölkənin həyata keçirdiyi hərbi təcavüzə verilən siyasi və hərbi dəstəkdən irəli gəlirdi: “Ermənistana, xüsusilə Rusiya hərbi dəstək verirdi, Qərbin bir sıra ölkələri maddi yardım göstərirdi. Çox təəssüf ki, biz işğala məruz qalan dövlətlə işğalçı dövlətinin eyni səviyyədə tutulduğunu görürdük. Bu da ikili standartlardan irəli gəlirdi. Ona görə də münaqişə uzun illər öz həllini tapmadı. Baxmayaraq ki, bu münaqişə ilə bağlı BMT-nin 4 qətnaməsi də var, amma heç bir əməli addım atılmadı. Hesab edirəm ki, burada erməni lobbisi, xristian təəssübkeşliyi də rol oynayırdı. Cənab Prezident də bu məsələlərə bir daha diqqət yetirməklə, onu vurğulamaqla beynəlxalq birlik tərəfindən ədalətli yanaşma olmadığını, erməniləri bu müstəvidə dəstəklədiklərini bildirdi. Ermənistanın Azərbaycan torpaqlarını işğal etməsi faktına göz yuman, susan dövlətlərin əksəriyyəti Cənubi Qafazda maraqları olan ölkələr idi. Bu maraqlar çərçivəsində həmişə Ermənistana dəstək verir, Azərbaycana isə təzyiq göstərməyə çalışırdılar. Bu, ədalətsiz bir yanaşma idi. Amma Azərbaycan bu ədaləti bərpa etdi”.
M.Əsədullazadə qeyd etdi ki, 44 günlük müharibədə BMT-nin qətnamələri də icra edildi, beynəlxalq hüquq da bərpa edildi, Cənubi Qafqazda sabiqlik də yarandı. Ermənistanın da Rusiyanın forpostu olmaqdan azad olunmaq istiqamətində addımlar atmaqda olduğunu deyən M.Əsədullazadə bildirdi ki, müharibədən sonrakı proses regionda yeni mərhələnin başlanmasına gətirib çıxardı. “Bunun da müəllifi Azərbaycandır. Bu münaqişədən istifadə edən dövlətlər indi də regionda öz maraqlarını təmin etmək üçün bu siyasəti Ermənistan üzərindən həyata keçirmək istəyirlər. Xüsusilə burada Rusiyanın, Avropa İttifaqının siyasətini görürük ki, onların bu siyasətləri müsbət nəticə verməyəcək. Azərbaycan işğala son qoysa da, Ermənistanla barış istiqamətində müəyyən addımlar atsa da, beynəlxalq birliklə əməkdaşlıq etsə də Ermənistanın işğalını, beynəlxalq birliyin bu məsələdə ikili standartlar nümayiş etdirməsini, bu işğala dəstək verən dövlətləri və təşkilatları unutmur”-deyə M.Əsədullazadə bildirdi.
İradə SARIYEVA
