Ceyhun Məmmədov: “Azərbaycan bu istiqamətdə prosesi başladıb”
Qərbi Azərbaycan torpaqlarında yaradılan indiki Ermənistanda Azərbaycan xalqı zəngin tarixi-mədəni irsi yaratsa da, çox təəssüflər olsun ki, ermənilər bütün irsimizi, ulularımızın mirasını məhv ediblər.
O torpaqlardan xalqımızın izini silməyə hesablanan bu acı prosesə isə beynəlxalq qurumlar həmişə biganə qalıblar. Çox təəssüf ki, Ermənistanın mədəni irs cinayətlərinə beynəlxalq hüquq müstəvisində hələ də qiymət verilməyib. Bütün mütərəqqi bəşəriyyət bir xalqın digər xalqın mədəniyyətini məhv etməsinə, yer üzündən silməsinə biganə qalmamalıdır.
Azərbaycan Prezidenti İlham Əliyev Bakıda "Mədəni irs və qayıdış hüququ: Ermənistandan didərgin salınmış azərbaycanlıların mədəni irsinin bərpası - ədalətə, barışığa və sülhə aparan yol kimi" mövzusunda keçirilən III beynəlxalq konfransın iştirakçılarına müraciətində bu məsələyə xüsusi diqqət yetirib.
Prezident İlham Əliyevin müraciətində bildirilir ki, Ermənistan tarixən Qərbi Azərbaycanda yaşamış azərbaycanlıların zəngin maddi və qeyri-maddi mədəni irsini, müqəddəs inanc yerlərini, qəbiristanlıqlarını öz ərazisindən Azərbaycan xalqının izlərini silmək məqsədilə zaman-zaman məhv etmişdir. Azərbaycan Prezidenti bəyan edib ki, Ermənilərin azərbaycanlılara qarşı insanlıq əleyhinə cinayətlərinin beynəlxalq hüquq müstəvisində qiymətləndirilməsi üçün lazımi addımlar atılması və beynəlxalq ictimaiyyətin bu məsələdə bizə dəstəyi olduqca əhəmiyyətlidir.
Müraciətdə qeyd olunub: “Bu gün Ermənistandan zorla çıxarılmış azərbaycanlıların qayıdışının Ümumdünya İnsan Hüquqları Bəyannaməsində, Mülki və Siyasi Hüquqlar haqqında Beynəlxalq Paktda, Qaçqınların statusu haqqında Konvensiyada və digər mühüm beynəlxalq aktlarda təsbit olunmuş geriyə qayıdış hüququ çərçivəsində təmin edilməsi, eləcə də mədəni irsin bərpası və qorunması ilə bağlı beynəlxalq ictimaiyyətin, o cümlədən BMT-nin ixtisaslaşmış qurumlarının iştirakı ilə prosesin başladılması üçün səylərin artırılması vacibdir. Çünki qayıdış hüququ insan hüquqlarının təməl prinsiplərindən biridir. Bu hüququn təmin edilməsi təkcə doğma yurda fiziki dönüş deyil, həm də toplumun mənəvi bütövlüyünün, mədəni irsinin və tarixi yaddaşının bərpası deməkdir”.
Prezident Əliyev həmçinin bəyan edib ki, Ermənistandakı Azərbaycan mədəni irsinin bərpası və qorunması Azərbaycan xalqının legitim tələbi olmaqla, ümumbəşəri dəyərlərə hörmət, düşmənçilik səhifəsinin qapanması, xalqlar arasında qarşılıqlı anlaşma üçün zəruridir.
Prezidentin vurğuladığı bu məqam çox maraqlıdır. BMT-ni bu işə hansı formalarda cəlb etmək olar?
“Bu yöndə müəyyən uğurlar qazanıb”
Millət vəkili Ceyhun Məmmədov “Bakı-Xəbər”ə bildirdi ki, Azərbaycan artıq bu istiqamətdə prosesi başladıb: “Deyə bilərik ki, artıq Azərbaycan bu istiqamətdə çox fəal işlərə başlayıb və bu yöndə işlər aparır. Bir sıra hallarda Qərbi Azərbaycanla bağlı sənədlər BMT sənədləri kimi yayılır. Biz bunu da müşahidə edirik. Bu mənada deyə bilərik ki, Azərbaycan bu istiqamətdə prosesi başladıb. Onu biz necə daha uğurlu edə bilərik? Bu məsələni davamlı olaraq gündəmdə saxlayaraq, mötəbər tribunalarda qaldıraraq ona nail ola bilərik. Qeyd etdiyim kimi, əslində Azərbaycan bu məsələyə nail olub və bu yöndə müəyyən uğurlar qazanıb. Bu mənada cənab Prezidentin də müraciəti özündə bir çox məsələləri əks etdirir. Ölkə başçısı bu müraciətdə çox vacib və önəmli məsələlərə toxunub. Qərbi azərbaycanlıların öz yurdlarına qayıtması hər bir Azərbaycan vətəndaşının arzusu olmalıdır. Bu onların hüququdur”.
C.Məmmədov qeyd etdi ki, bu hüquqlar da mütləq şəkildə təmin olunmalıdır və həyata keçirilməlidir. “Azərbaycan bunun üçün uzun illərdir müxtəlif addımlar atır, müxtəlif tədbirlər həyata keçirir. Bu da bizim haqq işimizin daha mötəbər kürsülərdə qəbul edilməsinə və işıqlandırılmasına, bu prosesdə Azərbaycanın rolunun artmasına öz töhfəsini verir”-deyə millət vəkili qeyd etdi.
İradə SARIYEVA
