Samir Hümbətov: “Rusiya tərəfin bu açıqlaması Rusiyanın daxilində olan narahatlığın bir göstəricisidir”
Ukrayna Prezidenti Ofisinin rəhbəri Andrey Yermak istefa verib. Yermakın istefasına səbəb kimi onun evində korrupsiya ilə bağlı axtarışlar aparılması göstərilir. Qeyd edək ki, Yermaka qarşı cinayət işi açılıb.
Xarkov vilayətinin Hərbi-Mülki Administrasiyasının Daxili İşlər İdarəsinin yaydığı məlumatda o, “müharibənin planlaşdırılmasında, hazırlanmasında, başlanmasında, aparılmasında, o cümlədən qadağan olunmuş vasitə və metodlardan istifadəyə köməklik göstərməkdə şübhəli bilinir”, - deyə bildirilib.
Ukrayna prezidenti Volodimir Zelenski onu vəzifəsindən azad etmək barədə fərman imzalayıb.
Rusiya Xarici İşlər Nazirliyinin Kiyev rejiminin cinayətləri ilə bağlı xüsusi tapşırıqlar üzrə nümayəndəsi Rodion Miroşnik Ukrayna Prezident Ofisinin rəhbəri Andrey Yermakın istefasını şərh edərkən “Ukrayna lideri Vladimir Zelenski sadəlövhcəsinə inanır ki, tərəfdaşlarını təhvil verməklə öz gələcəyi ilə bağlı danışıqlar aparmaq üçün vaxt qazana bilər”-deyə bildirib.
Həqiqətən Zelenskinin Yermakı istefaya göndərməsi onun vaxt qazanmasına xidmət edir?
“Məqsəd sırf bu müharibədə psixoloji üstünlüyü ələ almaqdır”
Beynəlxalq Münasibətlər və Diplomatiya Araşdırmaları Mərkəzinin rəhbəri, politoloq Samir Hümbətov “Bakı-Xəbər”ə bildirdi ki, Rusiya tərəfinin Andrey Yermakla bağlı verdiyi açıqlama əslində onunla bağlı deyil: “Müharibənin ilk vaxtlarından bugünə qədər Rusiya tərəfin verdiyi açıqlama əslində hibrid müharibənin tərkib hissəsidir. Hər dəfə “Zelenski hakimiyyətdən gedir və getmək üçün də müxtəlif yolları yoxlayır” tipli fikirlər vurğulayırlar. Bu da Rusiyanın apardığı təbliğatın tərkib hissəsidir. Düşünmürən ki, Yermakın istefası sırf Zelenskinin onu (ları) vəzifədən uzaqlaşdırıb daha sonra özünün də hakimiyyətdən getməsi kimi dəyərləndirilə bilər. Zelenski hakimiyyətdən getmək istəsə, burada nə Andrey Yermak, nə də digər komanda üzvləri hər hansı formadasa ona təhdid yarada biləcək gücdə, çəkidədir. Yəni getmək istəsə çəkilib gedər və “mən bura qədər idarə etdim və bundan sonrası artıq mənlik deyil” deyər. Amma Rusiya tərəfin bu açıqlaması Rusiyanın daxilində olan narahatlığın bir göstəricisidir. Rusiya tərəfi hesab edir ki, Zelenski hakimiyyətdən gedəcəksə, bu birbaşa müharibənin dayanmasıdır və bu da Ukrayna kimi Rusiyanın da rahat nəfəs almasına gətirib çıxara bilər”.
S.Hümbətovun sözlərinə görə, baxmayaraq ki, Rusiya Ukraynada işğalçı müharibə aparır, amma özü daha çox yorulub, yorulan tərəfdən biri də məhz odur. “Ona görə də düşünürəm ki, bu açıqlama əslində bir növ hibrid müharibənin, informasiya savaşının bir təzahürüdür. Məqsəd sırf bu müharibədə psixoloji üstünlüyü ələ almaqdır. Bu belə dəyərləndirilməlidir. Fikrimcə, məsələ burada Zelenskinin vaxt qazanması məsələsi deyil, sırf daxildə olan korrupsiya halları ilə bağlı məsələdir. Çünki Andrey Yermakın üzərinə 110 milyon dollarlıq bir korrupsiya iddiası qoyulub. Ona görə də, hesab edirəm ki, bu bununla bağlıdır. Burada sırf siyasi məqsəd görsənmir”-deyə S.Hümbətov qeyd etdi.
İradə SARIYEVA
