Şəmsəddin Əliyev: “Sualların yeni üsulla seçilməsi ən müxtəlif baxımlardan müsbət qiymətləndirilməlidir”
Azərbaycan Respublikasının Məhkəmə Hüquq Şurasının yaydığı məlumata görə, məhkəmə fəaliyyətinin təkmilləşdirilməsi üzrə görülən tədbirlər çərçivəsində hakim vəzifəsinə namizədlərin şəffaf şəraitdə və obyektiv meyarlar əsasında fasiləsiz seçimi davam etdirilir.
Növbəti müsabiqə çərçivəsində test imtahanında müvəffəqiyyət qazanmış 151 nəfər namizədlə 2025-ci il 30 noyabr tarixində Dövlət İmtahan Mərkəzinin elektron imtahanlar korpusunda yazılı imtahan keçirilib.
İmtahandan əvvəl Hakimlərin Seçki Komitəsi qapalı iclasında imtahanda istifadə edilməsi üçün cinayət və mülki sahələr üzrə kazus xarakterli suallar hazırlayıb və həmin suallar sırasından təsadüfi yolla biri cinayət, digəri isə mülki sahəyə aid suallar seçiblər.
4 saat davam edən imtahanda hakimliyə namizədlər kazusları həll edərkən kazusun faktiki hallarına uyğun düzgün maddi hüquq normasının müəyyən edilməsi və tətbiqi, mübahisənin həlli ilə bağlı zəruri olan prosessual hüquq normalarının tətbiqi, habelə tətbiq edilən normaların məzmununu kazusun halları baxımından izahını vermək bacarıqlarını nümayiş etdirməlidirlər.
Cavab vərəqələri ikiqat yoxlama üsulu ilə qiymətləndirilməklə nəticələr elan olunacaq.
İmtahan prosesi müşahidəçilər tərəfindən şəffaf prosedur kimi yüksək dəyərləndirilib.
Müsahibənin digər mərhələlərində olan 109 nəfər hakimliyə namizədlə isə müsahibələr artıq yekunlaşdırılıb. Yaxın zamanda nəticələr elan ediləcək, müvəffəqiyyət qazanmış namizədlərin qiymətləndirilməsinin nəticələri və ixtisaslaşmaları barədə rəylər Məhkəmə-Hüquq Şurasına təqdim ediləcək.
Həmçinin Hakimlərin Seçki Komitəsi bildirir ki, hakimliyə namizədlərin sənədlərinin qəbulu fasiləsiz olaraq davam edir. Hakim olmaq arzusunda olan hüquqşünaslar müvafiq sənədlərini təqdim edə bilərlər.
İmtahan prosesi zamanı təsadüfi yolla biri cinayət, biri isə mülki sahəyə aid suallar seçiblər. Yəni bir sual cinayət, bur sual mülki olub. Bu yeni üsul şəffaflığın daha çox olmasına təminat hesab edilir.
Hakimlərin seçilməsində yeni sualların tərtibat üsulunu necə dəyərləndirmək olar?
“...Onların erudisiyasının artırılması, yüksəldilməsi məqsədilə hüququn bütün sahələrinin əhatə edilməsi vəzifəsini qarşıya qoyur”
Hüquqşünas Şəmsəddin Əliyev “Bakı-Xəbər”ə bildirdi ki, belə bir üsulun tətbiq edilməsi normal haldır, müsbətdir: “Çünki bütün hallarda hakimlərə ilk növbədə sosial ədələtin bərpası istiqamətində addımlar atmaq lazımdır ki, demokratik, hüquqi dövlətin anlamına xələl gəlməsin. Hakimlər daha çox mülki, cinayət, inzibati, hətta kommersiya məsələləri ilə bağlı işlərə baxdıqları üçün kazusların bu şəkildə verilməsi və onların onu cavablandırması normal haldır. Sualların yeni üsulla seçilməsi ən müxtəlif baxımlardan müsbət qiymətləndirilməlidir”.
Ş.Əliyevin sözlərinə görə, bu, dünya təcrübəsində istifadə olunan metodlardandır. “Hakimlərin həm özlərinin hüquqi düşüncələrinə uyğun, həm də onların erudisiyasının artırılması, yüksəldilməsi məqsədilə hüququn bütün sahələrinin əhatə edilməsi vəzifəsini qarşıya qoyur. Bu çox normal haldır, hakimlər də öz üzərlərində işləməlidirlər ki, kifayət qədər bilikləri olsun və gələcəkdə onların icraatında olan məsələlərin həllində tərəddüdə qapılmadan addım atsınlar. Məhkəmənin qəbul etdiyi akt da ölkənin konstitusiyasına və beynəlxalq normalara, eyni zamanda məhkəmələr və hakimlər haqqında qanuna, digər hüquqi sahələrin tələblərinə uyğun olacaq. Bu da vətəndaşların məmnunluğu ilə yadda qalacaq”-deyə Ş.Əliyev qeyd etdi.
İradə SARIYEVA
