Elşən Manafov: “Kremlə qarşı qiyama təhrik etməyə, Rusiya siyasi elitasını daxildən parçalamağa çalışır”
ABŞ-ın “Lukoyl” və “Rosneft”ə sanksiyalar tətbiq edəcəyini gözləmirdim. Bu sözləri Rusiya prezidenti Vladimir Putin Qırğızıstanda keçirdiyi mətbuat konfransında deyib.
“Danışıqlar zamanı bizdə belə bir təəssürat yarandı ki, ABŞ-la razılığa gəldik. Biz Ankoric platformasında qaldıq və birdən ABŞ sanksiyalar elan etdi. Mən nə baş verdiyini belə başa düşmədim”, - Putin bildirib.
Belə məlum olur ki, Putin ABŞ-ın “Lukoyl” və “Rosneft”ə sanksiyalar tətbiq edəcəyini gözləmirmiş. Maraqlıdır, nə baş verdi və Tramp niyə birdən-birə sözügedən neft şirkətlərinə qarşı sanksiya qərarını verdi? Deməli, iki ölkə prezidenti arasında razılaşma olub ki, sanksiya olmayacaq və o üzdən, Putin indi belə təəccüblənib. Bir sözlə, nə baş verdi ki, Tramp fikrini dəyişib sanksiya qərarını verdi?
“Rus neft və qazını Avropa bazarlarından sıxışdırıb çıxarmaqla ABŞ öz sıxılmış qazını Avropa ölkələrinə satmağa nail olur”
Sözügedən məsələyə aydınlıq gətirən politoloq Elşən Manafov “Bakı-Xəbər”ə açıqlamasında buna bir neçə aspektdən yanaşdı: “Trampın Rusiyanın neft şirkətlərinə sanksiyaların tətbiq edilə biləcəyi ilə bağlı məlum açıqlamaları Ukrayna müharibəsinin nizamlanması ilə bağlı ABŞ tərəfinin şərtlərini qəbul etməyən Rusiya iqtidarının mövqeyinə təsir imkanlarını gücləndirmək istəklərindən irəli gəlir. Danışıqların uzanması qısa zamanda Ukrayna-Rusiya müharibəsinin dayandırılacağı ilə bağlı imkanlarını həddən ziyadə yüksək qiymətləndirən Trampın nüfuzuna xələl gətirir. Bu səbəbdən Tramp Rusiya ilə münasibətlərdəki problemlərin həlli üçün sələfi Baydenin siyasətinə müvəqqəti də olsa müraciət etməyi vacib bilib. Digər tərəfdən, bu sanksiyalar əslində Avropa İttifaqındakı məlum dövlətlərin Rusiya ilə enerji təhlükəsizliyinin təmin olunması istiqamətində mövcud münasibətlərin məhdudlaşdırılmasına, Rusiyanın Avropanın enerji bazarlarından büsbütün sıxışdırılıb çıxarılmasına yönəlib. Məlumdur ki, Tramp Avropa İttifaqını Rusiya ilə neft satınalmalarında münasibətlərin hələ də saxlanılmasına görə ittiham edir. Həmçinin Rusiyanı neft və qaz hasilatı, bunun satışından əldə etdiyi gəlirlərlə müharibəni davam etdirmək iqtidarında qalmaqda qınayır. Bundan əlavə, Rusiya neft və qazını Avropa bazarlarından sıxışdırıb çıxarmaqla ABŞ öz sıxılmış qazını Avropa ölkələrinə satmağa nail olur. Bu isə Aİ-nin ABŞ-dan enerji asılılığının da güclənməsinə gətirib çıxarır. Nəhayət, Rusiya şirkətlərinə və oliqarxik dairələrə sanksiyaları gücləndirməklə Tramp oliqarxların Putin hakimiyyətindən narazılığının güclənəcəyinə ümid edir və oliqarxları Kremlə qarşı qiyama təhrik etməyə, Rusiya siyasi elitasını daxildən parçalamağa çalışır”.
Vidadi ORDAHALLI
