Azər Allahverənov: “Azərbaycanlılar qanunsuz miqrant qismində Rusiya ərazisində yaşayırsa, bunu özü üçün bir cıxılmaz vəziyyət kimi görürsə…”
Rusiyada miqrantlara qarşı yeni qanun layihəsi hazırlanır. Rusiya Liberal-Demokrat Partiyasının (LDPR) irəli sürdüyü təklifdə qeyd edilir ki, miqrantların qeyri-qanuni fəaliyyətlərinin qarşısını almaq məqsədi ilə onlara pnevmatik silahların, elektroşokların, qaz və digər spreylərin satışı qadağan edilməlidir. Qanun layihəsi yaxın günlərdə Dövlət Dumasına təqdim olunacaq. Maraqlıdır, məlum təklif qüvvəyə minərsə, azərbaycanlı miqrantları hansı çətinliklər gözləyir?
“Miqrant həqiqətən də hansısa səbəblərdən - şəxsi təhlükəsizlik və ya digər səbəblərdən həmin vasitələri əldə etmək niyyətindədirsə, onda…”
Millət vəkili Azər Allahverənov baki-xeber.com-a şərhində bildirdi ki, bu kimi qadağaları təklif edən siyasi mərkəzlər, yaxud da partiyalar müəyyən vəziyyəti dəyərləndirib onların əsasında müvafiq qaydada əsaslanma etməklə bu və digər formada qadağaların tətbiq olunması təklifi ilə çıxış edirlər: “Miqrant real olaraq qanunsuzdursa, qeyri-qanuni əsaslarla ölkə ərazisində yaşayırsa, həmin vasitələri əldə edə bilməz. Bununla da miqrantın statusunun leqallaşdırılması tələb olunur. Miqrant həqiqətən də hansısa səbəblərdən, ya şəxsi təhlükəsizlik və ya digər səbəblərdən həmin vasitələri əldə etmək niyyətindədirsə, onda bu birbaşa gəlib çıxır qanunsuz miqrantın statusunun leqallaşdırıması məsələsinə. Ümumiyyətlə, Rusiya üçün bu gün qanunsuz miqrasiya ilə mübarizə sahəsi olduqca aktualdır. Ölkə ərazisində çoxsaylı qanunsuz miqrantın yaşadığı bildirilir. Düzdür, son bir il ərzində həyata keçirilən tədbirlər nəticəsində ciddi azalma müşahidə olunur. Məlum qadağaların azərbaycanlı miqrantlara təsirinə gəlincə, deyə bilərəm ki, bu hal bizim miqrantlarla bağlı deyil. Qanunsuz miqrasiyaya qarşı yönələn təklifdir. Azərbaycanlılar qanunsuz miqrant qismində Rusiya ərazisində yaşayırsa, bunu özü üçün bir cıxılmaz vəziyyət kimi görürsə, yaxşı olar ki, istənilən halda müəyyən olunan qaydalara uyğun davransınlar. Nəticə etibarı ilə öz statusunu leqallaşdırmağa çalışmalı, ya da ölkə ərazisini tərk etməlidir. Belə olanda şəxsin başqa çarəsi qalmır".
Günel CƏLİLOVA
