Qulamhüseyn Əlibəyli: “Putinin söylədikləri bir tərəfdən onun psixoloji durumunda çox ciddi problemlər olduğunu göstərir...”
Rusiya prezidenti Vladimir Putin Ukraynada müharibənin dayandırılması üçün son şərtini açıqlayıb:
“Döyüş əməliyyatları Ukrayna qoşunları tutduqları mövqeləri tərk etdikdə dayandırılacaq. Ukrayna qoşunları işğal etdikləri ərazilərdən (söhbət Ukraynanın suveren ərazilərindən gedir) çıxacaq, bax onda döyüş əməliyyatları dayanacaq. Çıxmasalar, bunu silah gücü ilə təmin edəcəyik, vəssalam. Rusiya Ukrayna ilə, o cümlədən ərazi məsələlərində razılığa gəlmək istərdi, lakin bu, Kiyev üçün hazırda hüquqi baxımdan mümkün deyil. Buna görə də Moskva gələcək nizamlanmanın müddəalarının beynəlxalq səviyyədə tanınmasında israrlıdır”.
Həmçinin, Putin qeyd edib ki, Ukrayna ilə bağlı sülh planının hər bir kəlməsi ciddi müzakirə olunmalıdır.
Açıq görünür ki, Putin artıq əsəblərinə hakim ola bilmir. Məsələn, Putin deyir ki, “Ukrayna qoşunları işğal etdikləri ərazilərdən çıxacaq, bax onda döyüş əməliyyatları dayanacaq. Çıxmasalar, bunu silah gücü ilə təmin edəcəyik, vəssalam”. Göründüyü kimi, tam əsəbi formada danışır. Putinin belə əsəbi formada danışması, Ukraynanı az qala “işğalçılıqda” ittiham etməsi nəyin əlaməti, nəyin göstəricisidir?
“Trampın hazırda yeritdiyi siyasət sülh siyasəti yox, işğalçılığa bəraət qazandırmaq siyasətidir və...”
Sözügedən məsələ ilə bağlı fikirlərini “Bakı-Xəbər”lə bölüşən sabiq millət vəkili, hüquqşünas Qulamhüseyn Əlibəyli buna bir neçə aspektdən yanaşdı: “Ümumiyyətlə, Putinin söylədikləri bir tərəfdən onun psixoloji durumunda çox ciddi problemlər olduğunu göstərir. Digər tərəfdən, ümumiyyətlə, Rusiya dövlətinin siyasətinin prinsiplərə əsaslanmadığını, bu ölkənin yalnız işğalçılığa söykəndiyini bir daha göstərmiş olur. Hamıya məlumdur ki, Ukrayna təcavüzə məruz qalıb. Bu ölkənin ərazisi Rusiya tərəfindən işğal edilib. Ukrayna ərazisini işğal etməsi azmış kimi, Putin Kiyevdən Donbasın digər ərazilərindən də çıxmasını tələb edir. Belə absurd tələb olar? Bunu normal məntiqlə heç cür əsaslandırmaq mümkün deyil. Bu, rus siyasəti məntiqi ilə əsaslandırmaqdır ki, mən güclü olub torpağını ələ keçirmişəm. Müharibəni dayandırmaq istəyirsənsə, digər ərazilərini mənə ver. Bu, həm də ümumiyyətlə, dünya nizamının pozulması deməkdir. Dünyanın mövcud nizamı pozulub və hazırda cəngəllik qanunları hökm sürür. Ona görə də bu mövqe, birinci növbədə ABŞ-la Rusiya arasındakı münasibətlərdən irəli gələn bir növ həyasızlıqdır. Çünki prezident Donald Tramp faktiki olaraq Rusiyanı beynəlxalq təcriddən çıxartdı. Rusiya da bir növ bundan şirnikləndi. Bundan istifadə edib Ukraynada təsir dairəsini genişləndirdi. Trampın guya sülh müqaviləsi adıyla təqdim etdiyi sənəd də, məlum oldu ki, məhz Rusiya tərəfindən hazırlanıb. Sonra ABŞ tərəfinə ötürülüb tərcümə edilib. Bu mənada hesab edirəm ki, Trampın hazırda yeritdiyi siyasət sülh siyasəti yox, işğalçılığa bəraət qazandırmaq siyasətidir və bundan istifadə edib ABŞ-ın aqressiv maraqlarını təmin etməkdir. Bütün hallarda, Putinin isterik tələblərlə çıxış etməsi beynəlxalq münasibətlərdə cəngəllik qanunlarını ortaya qoyur. Hesab edirəm ki, Ukrayna xalqı bununla heç vaxt barışmayacaq və Rusiyanın cavabını verəcək. Təbii ki, vəziyyət ağırdır və Ukraynanın müdafiəyə, yardıma ehtiyacı var”.
Vidadi ORDAHALLI
