Ukrayna Rusiya prezidenti Putinin tələbini rədd edib. Putin, Qırğızıstana səfərindən sonra keçirilən mətbuat konfransında ona ünvanlanan "Donbas məsələsini təxirə salmağa hazırsınızmı?" sualına cavab olaraq, Rusiyanın hələ də "orada-burada" atəşkəs təşəbbüsləri aldığını bildirmişdi: "Əgər Ukrayna qoşunları işğal olunmuş ərazilərdən çıxsa, döyüşlər dayanacaq. Çıxmasa, biz buna döyüş yolu ilə nail olacağıq".
Ukrayna Prezident Administrasiyasının rəhbəri Andrey Yermak isə ölkəsinin ərazi bütövlüyü ilə bağlı mövqeyinin dəyişmədiyini deyib.
"Zelenski prezident olduğu müddətcə heç kim bizdən ərazilərimizdən imtina etməyimizi gözləməməlidir. O, ərazi güzəştini imzalamayacaq" – deyən Yermak "The Atlantic" qəzetinə verdiyi müsahibəsində bunun Ukrayna Konstitusiyası ilə qadağan olunduğunu və xalqın iradəsinə zidd olduğunu vurğulayıb.
Yermak bildirib ki, Kiyev hökuməti ərazi məsələsi ilə bağlı yalnız bir məsələni müzakirə etməyə açıqdır: "Ukrayna tərəflər arasında bölücü xətləri (cəbhə xətlərini) müzakirə etməyə hazırdır". Bu bəyanat Ukraynanın 2014 və 2022-ci illərdə ilhaq edilmiş ərazilərə iddialarından əl çəkməyəcəyini, lakin mövcud hərbi vəziyyətə əsasən müvəqqəti nəzarət xəttinin müzakirə edilə biləcəyini göstərir. Bu mövqe Rusiyanın işğal edilmiş əraziləri öz ərazisi kimi tanımaq tələbinin rədd edilməsi deməkdir.
ABŞ-ın sülh planı Krım, Donetsk və Luqanskın Rusiya ərazisi kimi faktiki olaraq tanınmasını, Xerson və Zaporojyenin isə cəbhə xəttində "dondurulmasını" nəzərdə tutur. Bunun əksinə olaraq, AB-Ukraynanın birgə planı isə Kiyevin itirilmiş əraziləri hərbi yolla geri almaq hüququndan imtina etməsini və danışıqlar prosesinin mövcud təmas xəttindən başlamasını tələb edir.
Rusiya Prezidenti Vladimir Putin ABŞ planının danışıqlar üçün baza yarada biləcəyini bildirib, lakin o, Ukraynanın tam demilitarizasiyası və ilhaq edilmiş ərazilərin tanınması da daxil olmaqla, özünün fundamental şərtlərində israr etməkdə davam edir.
TAHİR
