Elşad Həsənov: “Bir belə uğura imza atan lider fəxr olunmağa tamamilə layiqdir”
ABŞ lideri Donald Tramp Azərbaycan Prezidenti İlham Əliyevlə fəxr etdiyini deyib. Bu barədə o, sentyabrın 23-də Nyu-Yorkda BMT Baş Assambleyasının 80-ci sessiyası ilə əlaqədar keçirdiyi rəsmi qəbulda çıxış edərkən deyib.
“Mən Sizinlə, həqiqətən, fəxr edirəm. Siz çox gözəl insansınız”, - ABŞ Prezidenti əlavə edib.
D.Tramp qəbul iştirakçıları ilə birgəliyin onun üçün şərəf olduğunu vurğulayıb: “Mən bu zalda olan bəziləriniz ilə görüşmüşəm, bir çoxunuzu yaxşı tanıyıram. Siz möhtəşəm insanlarsınız, ən yüksək səviyyəli liderlərsiniz. Sizin gördüyünüz işlər möhtəşəmdir. Düşünün, ölkələrinizin milyonlarla əhalisi var və siz bu ölkələrə uğurla rəhbərlik edirsiniz, dünya miqyasında liderlik edirsiniz. Məhz buna görə də buradasınız. Sadəcə demək istəyirəm ki, sizinlə bir yerdə olmaq mənim üçün şərəfdir. Sizinlə əl sıxmağı səbrsizliklə gözləyirəm. Bu işlərdən birlikdə zövq alacağıq. Biz dinc dünyada yaşayacağıq”.
“Bu baxımdan, Trampın fikirləri sıradan xoş fikirlər deyil və bütün bunların tutarlı əsasları var”
Sözügedən məsələ ilə bağlı fikirlərini “Bakı-Xəbər”lə bölüşən siyasi ekspert Elşad Həsənov hesab edir ki, prezident Trampın cənab İlham Əliyevi yüksək qiymətləndirməsi, onunla fəxr etməsi gözlənilən idi: “Çünki məhz Prezident Əliyevin apardığı siyasət nəticəsində Azərbaycanla Ermənistan arasında sülh sazişinin bəndləri paraflandı. Bu, sözün həqiqi mənasında böyük bir hadisədir. Prezident İlham Əliyev 2003-cü ildən üzübəri Azərbaycanı yenidən qurdu. Onun prezidentliyi dövründə çadır şəhərcikləri ləğv edildi. İnfrastruktur yenidən quruldu, iqtisadi artım təmin edildi, əhalinin sosial vəziyyəti yaxşılaşdırıldı. Azərbaycan güclü ordu yaratdı. Nəticədə Ali Baş Komandanın rəhbərliyi altında 30 illik işğala son qoyuldu. İlham Əliyev dövlət başçısı olandan sonra regionda bir sıra layihələr həyata keçirildi. Bütün bunların sayəsində bu gün Azərbaycan Avropanın 10 ölkəsinə qaz ixrac edir. Cənub Qaz Dəhlizi vasitəsi ilə Azərbaycan dünyanın 13 ölkəsinə qaz ixrac edir. Azərbaycan ərazi bütövlüyünü və suverenliyini təmin edəndən sonra Ermənistana sülh əlini uzatdı. Əlbəttə ki, bir belə uğura imza atan lider fəxr olunmağa tamamilə layiqdir. İlham Əliyev adını Azərbaycan tarixinə qızıl hərflərlə yazdı. Çünki 250 il idi ki, Azərbaycan torpaq ala bilmirdi, ərazilərimiz qoparılırdı. Əliyev buna son qoydu. Ərazi bütövlüyünü təmin etdi. Bu gün Azərbaycan Avropa ilə Mərkəzi Asiya arasında əsas tranzit halqasına çevrilir. Zəngəzur dəhlizi (Tramp yolu) işə düşəndən sonra biz bunun praktiki əhəmiyyətini daha çox görəcəyik. Bütün bunlar Prezident İlham Əliyevin incə və uzaqgörən siyasəti nəticəsində ərsəyə gəlib. Bu baxımdan Trampın fikirləri sıradan xoş fikirlər deyil və bütün bunların tutarlı əsasları var. İndiki çətin dövrdə İlham Əliyevin böyük liderliyi Azərbaycanın möhtəşəm uğurlarını təmin etdi. Halbuki, ermənilərin arxasında böyük güclər dayanırdı. Əliyev kimi böyük liderlər xalqı öz ətrafında birləşdirə bilir. Məhz onun sayəsində Azərbaycan Cənubi Qafqazın lider dövləti oldu”.
Vidadi ORDAHALLI
