Arzuxan Əlizadə: “Onun həbsi Rusiyanın sanksiyalardan yayınmasına zərbə olduğu üçün onlar susur”
Məlum olduğu kimi, iş adamı Adnan Əhmədzadə həbs edilib. Bakı şəhəri Səbail Rayon Məhkəməsinin qərarı ilə onun barəsində 4 aylıq həbs qətimkan tədbiri seçilib. Dövlət Təhlükəsizliyi Xidmətində aparılan cinayət işi çərçivəsində A.Əhmədzadə iqtisadi təhlükəsizliyə qarşı təxribat və xüsusilə külli miqdarda mənimsəmədə ittiham olunur.
Onun həbsi “Azeri Light” markalı nefti digər xam neft məhsulları ilə qarışdırmaqda günahlandırılması ilə əlaqələndirilir. Bu hərəkət Azərbaycanın neft sənayesinin etibarlılığına və bazar şəffaflığına ciddi zərbə kimi qiymətləndirilir.
Adnan Əhmədzadənin əməllərinin motivləri, bu cinayətin gətirib çıxardığı nəticələr hələ araşdırılacaq və prosesdə iştirak edən oyunçuların tam ifşa olunacağına heç bir şübhə yoxdur. Amma bu məsələdə maraq doğuran məqam təkcə iqtisadi təxribat deyil, həm də Adnan Əhmədzadənin malik olduğu imkanlar hesabına həyata keçirdiyi genişmiqyaslı dezinformasiya fəaliyyətidir. Onun həbsi az qala bütün dünya mediasında əksini tapdı, amma Rusiya mediası bu xəbərə susqun yanaşır. Halbuki, Adnanın Rusiyadan Azərbaycan neftinə qarşı təxribata yönəldildiyi barədə informasiyalar yayılıb. İnternet axtarış sistemləri, o cümlədən geogle Rusiya KİV-də Adnan Əhmədzadənin həbsi ilə bağlı dərc edilmiş heç bir məlumat göstərmir. Halbuki, Adnanın artıq Rusiya ilə gizli və cinayətkar əlaqələri ilə bağlı ciddi informasiyalar var. Adnan Rusiya neftini sanksiyalardan yayındıraraq satışını təşkil edən əsas simalardan biri kimi tanınıb. Rusiya tərəfindən ələ alınaraq bu cinayətlərdə iştirak edib. Elə Rusiya mediasının, Adnanı idarə edən o bossların susması da, çox güman ki, bununla bağlıdır. Çünki onların layihəsi iflasa uğradı.
“Deməli, bunların arasında gizli və qanunsuz əlaqə olub”
Sözügedən məsələ ilə bağlı fikirlərini “Bakı-Xəbər”lə bölüşən AMİP sədri, millət vəkili Arzuxan Əlizadə hesab edir ki, Adnanın həbsi Rusiyanın sanksiyalardan yayınmasına zərbə olduğu üçün onlar susur: “Çox güman ki, bu səbəbdən Rusiya mediası susur və bu barədə bir kəlmə də məlumat vermir. Hesab edirəm ki, bu versiyanın ciddi əsası var. Necə olur ki, bu məlumat heç bir rus mediasında dərc edilmir? Deməli, bunların arasında gizli və qanunsuz əlaqə olub. Nəzərə almaq lazımdır ki, Adnan Əhmədzadənin həbsi kifayət qədər ciddi məsələdir. Ona görə ki, burada Azərbaycanın neft strategiyası ilə bağlı siyasətinə qarşı edilən təxribatdan, dövlət imicini aşağı salmağa yönəlik addımların atılmasından söhbət gedir. Təbii ki, bunlar istintaqın ilkin versiyalarıdır. Məsələyə tam məlumat olmadan əvvəlcədən birmənalı münasibət bildirmək doğru deyil. Bu, istintaqın düzgün aparılmasına təsir kimi görünə bilər. Aidiyyəti orqanlar məsələ ilə bağlı ciddi araşdırmalara başlayıblar. Bu uzantılar hara gedib çıxır, haradan idarə olunub, irəli sürülən ilkin versiya və ittihamlar nə dərəcədə özünü doğruldacaq, bütün bunlara istintaq cavab verəcək. Yalnız bundan sonra məsələyə köklü münasibət bildirmək mümkündür. Ancaq təbii ki, Rusiya mediasının Adnanın həbsini susqunluqla qarşılamasını əsla təsadüf hesab etmək olmaz. Belə məlum olur ki, Adnan sanksiya altında olan Rusiya neftini ixrac edib. O cümlədən, Azərbaycanın etibarlı enerji tərəfdaşı imicinə zərər vurmağa çalışıb. Rusiya da maraqlıdır ki, Azərbaycanın imicinə zərbə dəysin, ölkəmiz üzərindən neft ixrac edilməsin. Ən nəhayət, Adnan Əhmədzadənin qısa müddət ərzində yetərincə böyük sərvətlərə sahib olduğu da bəllidir. Bunlar hansı yolla - biznes fəaliyyəti ilə, ya qanundankənar fəaliyyətlə əldə edilib? Hər biri araşdırma mövzusudur”.
Vidadi ORDAHALLI
