Hazırda Adnan Əhmədzadənin xaricdəki əlaqələri və SOCAR-dakı əməkdaşları ilə bağlı istintaq davam edir
Adnan Əhmədzadənin neft daşımaları sahəsindəki fəaliyyəti və bu fəaliyyətin geosiyasi təsirləri çox ciddi fəsadlara səbəb olub. Əhmədzadə SOCAR-ın İnvestisiya və satış Departamentinin sabiq rəhbər müavini olaraq tanınır və neft ixracı sahəsindəki fəaliyyəti ilə diqqət çəkir.
Onun sanksiya tətbiq olunmuş İran neftini dünya bazarlarına daşımaqla yüz milyonlarla dollar gəlir əldə etdiyi bildirilir. Bu prosesdə onun, ofşor zonalarda təsis etdiyi şirkətlərdən istifadə edərək, tankerlərə “su qiymətinə” vurulan İran neftini digər ölkələrin xammalı kimi dünya bazarlarına çıxardığı aşkarlanıb. 2022-ci ildə Rusiyanın Ukraynaya təcavüzü ilə əlaqədar Qərbin bu ölkəyə tətbiq etdiyi sanksiyalar Əhmədzadə kimi işbazlara yeni imkanlar yaradıb. Dünya mediasında Rusiya neftinin başqa ölkələrə məxsus xammal adı altında daşınması və satılması barədə kifayət qədər fakt mövcuddur. Əhmədzadə İran nefti sayəsində topladığı təcrübəni istifadə edərək, fəaliyyətini daha da genişləndirib, ofşor zonalarda geniş şirkətlər şəbəkəsi yaradıb və saxta sertifikatlarla Rusiya neftini Avropaya daşıyıb.
Hazırda məlum olayla əlaqədar Azərbaycanın enerji sektoru ilə bağlı beynəlxalq təzyiqlər və dezinformasiya kampaniyaları da müzakirə mövzusuna çevrilib. Rusiya mətbuatı və “Qazprom”a bağlı informasiya şəbəkələri Azərbaycanın enerji tədarükünün etibarlılığına dair mənfi xəbərləri tirajlamağa başlayıb. Bu kampaniyanın Avropanın Rusiya qazından asılılığını azaltmaq və Cənub Qaz Dəhlizi layihəsi vasitəsilə Azərbaycanla əməkdaşlığı gücləndirmək siyasəti fonunda daha da intensivləşdiyi vurğulanır. Analitiklərin fikrincə, bu tip xəbərlər Azərbaycanın enerji sahəsində artan rolunu zəiflətmək və Avropanın diqqətini etibarlılıq məsələlərinə yönəltmək məqsədi daşıyır.
Əlavə olaraq, 2025-ci ilin avqust ayında Ukraynada yerləşən SOCAR-ın infrastrukturlarına iki hücum, ölkənin dövlət qurumları və kritik infrastrukturlarını internetlə təmin edən ən iri magistral operatoruna kiberhücumlar təşkil olunmuşdu. Bu təxribatlar Rusiyanın regionda və qlobal miqyasda geosiyasi və iqtisadi təsirini qoruyub saxlamağa yönələn düşünülmüş strategiyanın bir hissəsidir.
Ümumiyyətlə, Adnan Əhmədzadənin neft ixracı sahəsindəki fəaliyyətləri, bu fəaliyyətlərin geosiyasi fəsadları Azərbaycanın enerji sektoruna beynəlxalq təzyiqləri artırır. Lakin əsas odur ki, Adnan Əhmədzadə bu fəaliyyəti tək həyata keçirməyib, cinayətkar bir qrupun içində olub. Ehtimal ki, onun cinayət ortaqları, xaricdə olduğu kimi, Azərbaycanda - SOCAR-da da var.
Adnan Əhmədzadə SOCAR-da müxtəlif vəzifələrdə çalışıb, o cümlədən 2010–2019-cu illərdə Marketinq və İqtisadi Əməliyyatlar Departamentinin rəhbəri, 2018–2019-cu illərdə SOCAR Trading-in icraçı direktoru və 2019–2023-cü illərdə İnvestisiya və Marketinq üzrə vitse-prezident müavini olub. 2018-ci ildən sonra “Caspian Logistics Solutions” şirkətini təsis edib və bu şirkət Dubayda yerləşir.
Onun adı, həmçinin, SOCAR-ın xarici bazarlara neft satışı ilə bağlı baş verən qaranlıq məsələlərdə çəkilir. Bəzi məlumatlara görə, Adnan Əhmədzadə ilə yanaşı, SOCAR-ın keçmiş prezidenti Rövnəq Abdullayevin dayısı oğlu Anar Əlizadənin də adı bu məsələlərdə hallanır.
SOCAR daxilində, xüsusilə texniki nəzarət və keyfiyyətə cavabdeh olan şəxslərin məsuliyyəti məsələsi də gündəmə gəlib. Bəzi mütəxəssislər bu cür əməliyyatların yalnız bir nəfərin deyil, həm də digər müvafiq şəxslərin iştirakı ilə həyata keçirildiyini vurğulayır.
Bəzi iddialara görə, Adnan Əhmədzadə Avropada azərbaycanlı bloggerləri hədəf alıb və onun yaxın ətrafında olan şəxslərin də bu məsələlərdə rolu olub. Lakin bu iddiaların rəsmi təsdiqi yoxdur və daha ətraflı məlumatlar mövcud deyil.
Hazırda Adnan Əhmədzadənin xaricdəki əlaqələri və SOCAR-dakı əməkdaşları ilə bağlı istintaq davam edir. Onun barəsindəki cinayət işi ilə bağlı əlavə məlumatlar əldə edildikcə, bu barədə ictimaiyyətə məlumat veriləcək.
Akif NƏSİRLİ
