Bəhruz Quliyev: “Əslində bu, Prezident İlham Əliyevin illərdir gündəmə gətirdiyi haqlı mövqeyin təsdiqidir”
ABŞ prezidenti Donald Tramp BMT-ni dünyadakı münaqişələrin həlli məsələsində fəaliyyətsizlikdə ittiham edib. Nyu-Yorkda keçirilən Baş Assambleyanın yüksək səviyyəli həftəsində çıxış edən Tramp bildirib ki, təşkilatın “nəhəng potensialı var, amma o, bunu həyata keçirməyə yaxın belə deyil”.
Prezident İlham Əliyev dəfələrlə ən mötəbər tədbirlərdə, beynəlxalq konfranslarda BMT-nin dişsiz, qərarlarını icra edə bilməyən təşkilat olduğunu bildirib. Təhlükəsizlik Şurasının qərarları gah icra olunur, gah olunmur və s. Hətta Prezident İlham Əliyev BMT-nin 75 illiyinə həsr edilmiş Yüksək Səviyyəli İclasda çıxış edərək, TŞ-də islahatların aparılmasının vacibliyini bəyan etmişdi: “BMT universal üzvlüyü təmin edən yeganə qlobal təsisatdır və beləliklə də dayanıqlı inkişafa nail olunması məqsədilə qlobal iqtisadi idarəçiliyi əhatə etmək iqtidarındadır. Bu səbəbdən BMT-nin qlobal iqtisadi idarəçilikdə rolu gücləndirilməlidir. Qlobal iqtisadi idarəçilikdə müvafiq rolu oynamaq üçün təşkilat çərçivəsindəki proseslərə, multilateralizmə və onun təməl dəyərlərinə sadiqlik baxımından bütün üzvlərin siyasi iradəsi olduqca əhəmiyyətlidir”.
Yəni Trampın dedikləri yeni deyil və zaman-zaman Prezident Əliyev bu məsələləri gündəmə gətirib. Şəxsən Prezident İlham Əliyevin illərdir haqqında bəhs etdiyi məqamı BMT-nin Baş katibi cənab Antoni Quterreş indi daha qətiyyətli şəkildə diqqətə çatdırır. Təhlükəsizlik Şurasında islahatların məntiqliliyi üzərində dayanan baş katib, qurumun hazırkı tərkibinin müasir dünyaya uyğun olmadığını vurğulayır, həmin tərkibin 1945-ci ilin reallıqlarını əks etdirdiyini və bunun legitimlik və səmərəliliklə bağlı problemlər yaratdığını bildirir. Bütün bunlar Azərbaycanın BMT-də köklü islahatların əsas təşəbbüskar qüvvəsi olaraq təsdiqlənir.
“Ədalətli beynəlxalq nizam yalnız gücün yox, hüququn aliliyinə əsaslanmalıdır”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyev hesab edir ki, Trampın bu gün dediklərini Prezident İlham Əliyev illərdir ən yüksək səviyyədə bəyan edir: “ABŞ Prezidenti Donald Trampın BMT-ni fəaliyyətsizlikdə ittiham etməsi əslində yeni fikir deyil. Prezident İlham Əliyev illərdir ən mötəbər beynəlxalq tribunalardan bu reallığı dünyaya bəyan edir ki, BMT Təhlükəsizlik Şurası bəzən qərar qəbul edir, lakin onların icrasına nəzarət edilmir. Bu isə təşkilatın nüfuzuna ciddi xələl gətirir. Xatırlatmaq kifayətdir ki, Prezident İlham Əliyev BMT-nin 75 illiyinə həsr olunmuş Yüksək Səviyyəli İclasda açıq şəkildə bəyan etmişdi: “BMT universal üzvlüyü təmin edən yeganə qlobal təsisatdır, lakin bu institutun qlobal idarəçilikdə rolu daha gücləndirilməli, Təhlükəsizlik Şurasında islahatlar aparılmalıdır. Çünki mövcud struktur 1945-ci ilin reallıqlarına uyğun formalaşıb və bu günün çağırışlarına cavab vermir”. Bu gün BMT Baş katibi Antonio Quterreşin eyni fikirləri dilə gətirməsi də təsadüfi deyil. O cümlədən, Trampın fikirləri də təsadüfü deyil. Əslində bu, Prezident İlham Əliyevin illərdir gündəmə gətirdiyi haqlı mövqeyin təsdiqidir. Azərbaycan lideri daim bildirirdi ki, ədalətli beynəlxalq nizam yalnız gücün yox, hüququn aliliyinə əsaslanmalıdır. Təəssüf ki, biz bunun əksini müşahidə edirik. Bəzi ölkələrin maraqlarına toxunmayan qətnamələr dərhal icra olunur, lakin Azərbaycan torpaqları ilə bağlı 30 il kağız üzərində qalan qətnamələr buna ən bariz nümunədir. Azərbaycanın təşəbbüskarı olduğu mövqenin bu gün dünya liderləri tərəfindən dəstəklənməsi təsdiq edir ki, BMT-də islahatların aparılması qaçılmazdır. Əks halda, təşkilat müasir dünyanın reallıqlarına cavab verə bilməyəcək. Prezident İlham Əliyev hər zaman beynəlxalq münasibətlər sistemində ədalətin, multilateralizmin və hüququn müdafiəçisi olub. Məhz Azərbaycanın bu prinsipial mövqeyi BMT-də köklü islahatların aparılması məsələsində ölkəmizi aparıcı təşəbbüskar dövlətlərdən birinə çevirib. Bu realıq artıq daha qabarıq şəkildə gündəmə gəlib”.
Vidadi ORDAHALLI
