Azər Həsrət: “Bu şəbəkə Rusiyaya, İrana və İranın fars-molla rejiminə bağlıdır”
Son günlər Azərbaycanla bağlı beynəlxalq media orqanlarında yalan məlumatlar yer alır, xüsusən də Türkiyəyə yaxın media orqanlarında belə dezinformasiyalara rast gəlinir ki, guya Azərbaycan "İsraili Avroviziyaya buraxmadınız, biz də iştirak etməyəcəyik " kimi mövqe sərgiləyib. Halbuki, iddialar tamamilə yalandır.
Medianın İnkişafı Agentliyi də bu istiqamətdə açıqlama yayıb. Açıqlamada bildirilir ki, son dövrlər bir sıra xarici ölkələrin informasiya resurslarında və sosial media seqmentlərində Azərbaycana qarşı növbəti dezinformasiya kampaniyasının başlanması müşahidə olunur. Yayılan məlumatların bir qismində guya Azərbaycanın üçüncü ölkə vasitəsilə Ukraynanı silahlandırmasına dair saxta xəbər, digər qismində isə Azərbaycanın İsrailə görə Avroviziya Mahnı Müsabiqəsində iştirakdan imtinası ilə bağlı həqiqəti əks etdirməyən iddialar yer alır.
Qeyd olunur ki, Azərbaycana qarşı dezinformasiya yayan yuxarıda qeyd olunmuş media resurslarının saxta xəbərlərinin təsiri altında Türkiyə mediasında və sosial media seqmentində bu kimi materialların yenidən tirajlanması dərin təəssüf hissi doğurur.
Agentliyin açıqlamasında beynəlxalq ictimaiyyət, media resursları, jurnalistlər və ictimai fəallar bu kimi dezinformasiya və saxta xəbərlərə inanmamağa, belə hallara qarşı prinsipiallıq, sayıqlıq nümayiş etdirməyə çağırılır.
Bu yalan məlumatların yayılması nəyə xidmət edir? Bunlar nə məqsədlə ortalığa atılır? Təbii ki, heç bir nəticə vermir, məqsəd də bəllidir - Türkiyə ilə Azərbaycanın birliyini sarsıtmaq. Belə məlumatların ömrünün çox qısa sürəcəyini bilə-bilə niyə dezinformasiya yayırlar? Xüsusilə də Türkiyə mediasında və sosial media seqmentlərində buna niyə gedilir?
“Bunların bir neçəsini tutub faş etsələr, mənə elə gəlir ki, o kampaniyaları səngitmək mümkün olacaq”
Siyasi şərhçi Azər Həsrət “Bakı-Xəbər”ə bildirdi ki, bu yalan məlumatlar məqsədli şəkildə yayılır: “Buna alışmışıq, o qədər də əsəbiləşmirik. Çünki hər tərəfdə, özəlliklə də ermənilər antiazərbaycan kampaniyası aparır. Yəni görmədiyimiz bir şey deyil. Bizi narahat edən əsas məsələ qardaş Türkiyədə zaman-zaman bu cür kampaniyaların ayaq açıb yeriməsidir. Həqiqətən də uzun illərdir şəxsən müşahidə edirəm ki, Türkiyədə bir kəsim var, onlar birincisi, özlərindən yalanlar uydururlar, ikincisi də həmin yalanları şəbəkə halında çox geniş tirajlayırlar. Yəni faktiki olaraq peşəkar bir şəbəkə oturub, məhz Azərbaycana qarşı işləyir, Azərbaycan-Türkiyə münasibətlərini vurur, Türkiyənin digər türk dövlətləri ilə münasibətlərini hədəfə alır. Yəni bu şəbəkə hara bağlıdır? Əlbəttə ki, bu şəbəkə Rusiyaya, İrana və İranın fars-molla rejiminə bağlıdır”.
A.Həsrətin fikrincə, bu qüvvələrdən həm Rusiya, həm də İran gen-bol istifadə edir. O hesab edir ki, burda ermənilərin də rolu yox deyil: “Şəxsən öz müşahidəmə və gəldiyim qənaətə görə, əsas rol İrana, İranın fars-molla rejiminə düşür, bunu da məzhəb üzərindən edirlər. Yəni bilirsiz ki, Türkiyədə daha çox sünni müsəlmanlar yaşayır, amma şiə, yaxud şiəliyə yaxın məzhəb daşıyıcıları da az deyil. Bax, onların üzərindən antiazərbaycan kampaniyaları aparırlar. Bu kampaniyalar üçün qidanı da Rusiya onlar üçün istehsal edir. Yəni Rusiya ilə İran ermənilərlə həmahəng bu təbliğatları məhz qardaş Türkiyədə aparırlar. Ona görə də Türkiyə dövləti gərək bu cür məsələlərdə həssas davrana. Yəni bunların bir neçəsini tutub faş etsələr, mənə elə gəlir ki, o kampaniyaları səngitmək mümkün olacaq. Yoxsa baxırıq, on illərdir onlar bu işləri görürlər, Türkiyə dövləti isə heç nə etmir. Halbuki, qardaş dövlətdən gözləntimiz odur ki, buna qarşı tədbir görsün. Misal üçün, Azərbaycanda antitürkiyə kampaniyasını davamlı şəkildə aparan adamların cavabını elə Azərbaycan cəmiyyəti dərhal verir. Biz burda heç kimə izn vermirik ki, Türkiyənin əleyhinə kampaniya aparsın. Amma baxırıq ki, Türkiyədə bu kampaniyalar gen-bol yayımlanır. Hətta bunların televiziya kanalları, ayrı-ayrı media qurumları var və dövlət də faktiki heç nə etmir. Məncə, etməsi lazımdır”.
İradə SARIYEVA
