Hüseyn İbrahimov: “Hansısa fors-major vəziyyət yaranmasa, 2028-ci ildə keçiriləcək seçkilərin vaxtı dəyişməyəcək”
Türkiyənin müxalif Cumhuriyyət Xalq Partiyasının (CHP) növbədənkənar qurultayı keçirilib. Qurultayda partiya sədrliyinə seçkilər baş tutub. Səsvermənin nəticələrinə əsasən, hazırkı sədr Özgür Özəl yenidən partiyanın lideri seçilib.
Özəlin yenidən seçilməsi məhkəmə çəkişməsi fonunda baş verir. Bundan əvvəl Türkiyə məhkəməsi Özəlin sədr seçildiyi CHP-nin 2023-cü ilin noyabrında keçirilən qurultayının nəticələrinin ləğvi məsələsinə baxmağa başlayıb. Partiya hesab edir ki, onun növbəti qurultayda yenidən seçilməsi partiyaya qarşı iddianın hüquqi əsaslarını aradan qaldırmalıdır. Özgür Özəl bunu belə dəyərləndirib: “Hüquq ekspertlərimiz buna qarşı ən uyğun tədbirləri görür. Bu konqreslə onların (prokurorluğun) bütün hüquqi arqumentləri ortadan qalxır”. O, səsverməni “sırf texniki və hüquqi manevr” kimi qiymətləndirib.
Məhkəmə CHP qurultayının nəticələrini etibarsız sayarsa, Özəl vəzifəsindən uzaqlaşdırıla bilər ki, bu da öz növbəsində 2028-ci ildə Türkiyədə keçiriləcək prezident seçkilərinin vaxtına təsir göstərə və ölkənin ana müxalifət partiyası daxilində kadr dəyişikliyinə səbəb ola bilər.
Maraqlıdır, proseslərin sonrası necə ola bilər? 2023-cü ildə keçirilən qurultayın saxta olması ilə bağlı ittihamlar necə olacaq? 2028-ci ildə keçiriləcək prezident seçkilərinin vaxtı dəyişəcəkmi?
“CHP-də də nöqsanlar az deyil, bələdiyyələrdə korrupsiya, pis idarəçilik halları mövcuddur”
Sözügedən məsələni “Bakı-Xəbər”ə şərh edən İdarəçilik Akademiyasının müəllimi, sosioloq Hüseyn İbrahimov hesab edir ki, sadalanan məsələlərlə bağlı Türkiyədə istənilən sürpriz baş verə bilər: “Ona görə də konkret proqnoz vermək çox çətindir. Biz nəzərə almalıyıq ki, Türkiyə demokratik dövlətdir. Ancaq ötən illər ərzində Türkiyə siyasətində ciddi təbəddülatlar yaşanıb. İki dəfə ölkədə hərbi çevriliş olub, iki dəfə ordunun siyasi təzyiqi ilə hakimiyyət dəyişib. Dəfələrlə Türkiyədə siyasi partiyalar qapadılıb. Yəni bir növ belə hallar Türkiyə siyasəti üçün xarakterik haldır. Bəli, son illər müxalif partiya olaraq CHP-nin nüfuzu xeyli artıb. 2024-cü ilin martında keçirilən bələdiyyə seçkilərində CHP əksər böyük şəhərlərdə qalib gəldi. Ancaq bu, heç də o demək deyil ki, səs verənlərin hamısı CHP-çi olub. Bu belə deyil. Sosial çətinliklər səbəbindən və s. hakim partiyadan narazı olanlar həmin vaxt CHP-yə səs verib. Düzdür, baş verənlərdə AKP-nin öz siyasi maraqları var. Onlar maraqlıdılar ki, ana müxalifət zəifləsin. Ancaq məlum olur ki, bu, tək siyasi məsələlərlə bağlı deyil. CHP-də də nöqsanlar az deyil, bələdiyyələrdə korrupsiya, pis idarəçilik halları mövcuddur. Son dövrlər CHP sədri Özgür Özəlin siyasi nüfuzu artsa da, o, Əkrəm İmamoğlu qədər böyük siyasi reytinqə malik deyil. Məsələnin bu tərəfi də var. Qurultayda daha çox ona görə səs aldı ki, 2023-cü il seçkiləri ilə bağlı araşdırma gedir. Bunu önləmək üçün Özələ daha çox səs verildi. O baxımdan hesab edirəm ki, Özəlin 2028-ci il prezident seçkilərində hakim partiyaya ciddi rəqib ola biləcəyini demək çətindir. Bir sözlə, hansısa fors-major vəziyyət yaranmasa, 2028-ci ildə keçiriləcək prezident seçkilərinin vaxtı dəyişməyəcək”.
Vidadi ORDAHALLI
