Xaqani Cəfərli: “Avropa İttifaqına üzvlük yalnız imkanlar demək deyil, həm də öhdəliklər deməkdir”
Ermənistan Avropa Birliyinə (AB) üzv ola bilməz. Bunu baş nazir Nikol Paşinyan sentyabrın 23-də Ermənistan Demokratiya Forumunda keçirilən panel müzakirəsində deyib: “Bizim məqsədimiz bütün sahələrdə AB standartlarını təmin etməkdir".
O qeyd edib ki, Ermənistanın Avropa Birliyinə üzvlüyünün nə dərəcədə real və ya qeyri-real olması ilə bağlı ictimai müzakirələr gedir.
“Hökumət və siyasi çoxluq deyir ki, bizim məqsədimiz bütün sahələrdə Aİ standartlarına nail olmaqdır. Bu, çox vacibdir, çünki çoxları bunun müəyyən geosiyasi nəticələri görür”, - Paşinyan qeyd edib. Ermənistanın baş nazir vurğulayıb ki, demokratik islahatlar planında növbəti addım Ermənistanın Avropa Birliyi dəyərlərinə sadiqliyinin danılmaz və sarsılmaz olduğunun qəbul edilməsi olacaq.
Qeyd edək ki, bu yaxınlarda Ermənistan parlamenti Ermənistanın Avropa Birliyinə üzvlüyü haqqında qanun da qəbul edib. Paşinyan da dəfələrlə bəyan edib ki, məqsədi Avropa Birliyinin üzvü olmaqdır. Onu da vurğulayırdı, biz başa düşürük ki, eyni vaxtda həm Avropa Birliyinin, həm də Avrasiya İqtisadi Birliyinin üzvü olmaq olmaz, seçim edəcəyik. Paşinyan qəti şəkildə özünü Avropa Birliyi istiqamətinə yönəltmişdi, indi də deyir ki, Avropa Birliyinə üzv olmaya da bilərik, vacib olan odur ki, onun standartlarına yiyələnək.
Ola bilərmi ki, ölkənin daxilində seçki ərəfəsində opponentlərini qızışdırmaq, yaxud Rusiyanı qıcıqlandırmaq istəmir? Ola bilərmi ki, Paşinyan bir manevr, siyasi gediş edir? Ermənistan Avropa Birliyinə üzv olmaya bilər?
“Paşinyan da cəmiyyətindəki tərəddüdü görür və seçkiqabağı siyasi manevr etməyə çalışır”
Politoloq Xaqani Cəfərli “Bakı-Xəbər”ə bildirdi ki, Rusiya və onun liderliyi ilə qurulan bütün birliklər, Avrasiya İqtisadi Birliyi və Kollektiv Təhlükəsizlik Müqaviləsi Təşkilatı könüllü birliklər olmadığı üçün üzv təşkilatların bu təsisatlarda iştirakı məcburiyyətin nəticəsidir: “Bu məcburiyyəti doğuran səbəb, yəni Rusiyanın postsovet məkanının hakimi olması faktı aradan qalxan kimi üzv ölkələr Moskvanın qurduğu ittifaqları tərk etməyə çalışırlar. Ukraynada ağır hərbi-siyasi uğursuzluğa məruz qalan Rusiya artıq postsovet məkanının hakimi statusunu itirib. Buna görə də Ermənistan Rusiyanın qurduğu birlikləri tərk etmək istəyir. Ancaq Ukrayna, Moldova və Gürcüstanın Avroatlantik strukturlara inteqrasiyasının asan olmaması Ermənistanı da düşünməyə vadar edir. Postsovet respublikaları hələ də anlamayıblar ki, Avropa İttifaqına üzvlük yalnız imkanlar demək deyil, həm də öhdəliklər deməkdir”.
X.Cəfərli qeyd etdi ki, digər tərəfdən, güclü iqtisadiyyata malik dövlətlərlə eyni birlikdə olmaq sərt rəqabət şəraitində güclü iqtisadiyyatı olmayan ölkələr üçün fəsadlar yaradır: “Bunu Şərqi Avropa ölkələrinin timsalında aydın görmək olur. Ona görə də postsovet respublikaları, xüsusən Ermənistan, Gürcüstan və Moldova kimi kiçik respublikaların cəmiyyətləri tərəddüd edirlər. Paşinyan da cəmiyyətindəki tərəddüdü görür və seçkiqabağı siyasi manevr etməyə çalışır”.
İradə SARIYEVA
