Hüseyn Səfərovun meyitini xarici müayinə edərkən çoxlu sayda travmalar aşkarladıq. Məhkəmə-Tibbi Ekspertiza və Patoloji Anatomiya Birliyinin gəldiyi qənaətə əsasən, onun ölüm səbəbi aldığı çoxsaylı xəsarətlər nəticəsində inkişaf edən posttravmatik və posthemoragik şokdur.
Bunu Səhiyyə Nazirliyinin Məhkəmə-Tibbi Ekspertiza və Patoloji Anatomiya Birliyinin baş direktoru Ədalət Həsənov iyunun 27-də Yekaterinburqda döyülərək öldürülən azərbaycanlılar - Ziyəddin və Hüseyn Səfərov qardaşlarının meyitlərinin ekspertizasının nəticələri ilə bağlı mətbuat konfransında deyib.
Baş direktor bildirib ki, xarici müayinə zamanı onun burun sümüklərinin yerini dəyişən sınığı aşkarlanıb. Döş qəfəsi deformasiyaya uğrayıb, asimmetrikdir. Sol gözətrafı nahiyədə hematoma aşkarlanıb. Üst və alt dodaqların selikli qişasında qançırlar var. Çöldən küt alətlə zərbə vurularkən, dodaqların selikli qişası dişlərə dəyib və orada xəsarətlər meydana çıxıb.
Ədalət Həsənov deyib: Alının sağ və sol qaşüstü nahiyələrində hematomadan başqa, həm də sıyrıqlar var idi. Alının sol nahiyəsində, döş qəfəsinin arxa səthinin sağ kürək nahiyəsində, hər iki yuxarı ətraflarda, əllərin arxa səthində qançırlar vardı. Xayalarda da qançır var idi. Hər iki sağrı nahiyəsində, hər iki budun arxa tərəfində çoxsaylı qançırlar və hematomalar, sol budda, sol bel nahiyəsində, sol baldırda sıyrıqlar aşkarlanıb.
Baş direktor meyitin daxili müayinəsi zamanı aşkarlarlanan xəsarətləri də qeyd edib: Küt alətin təsiri nəticəsində başın dərisinin iç səthində geniş qansızmalar izlənilib. Kəllə qapağı açıldıqdan sonra baş beynin həm səth qişasında, həm də yumşaq qişada qansızmalar, döş qəfəsinin küt travması ilə əlaqədar qabırğaların sınıqları, - təxminən hər tərəfdə 7-8 qabırğanın yerdəyişən sınıqları müşahidə olunub. Bu sınıqlar o dərəcədə kobud və yerdəyişən idi ki, sınıq ucları içəridə parietal plevranı və ağciyəri zədələmişdi. Yəqin ki, döş qəfəsinə həm qan tökülüb, həm də ağciyərin içinə hava daxil olub. Qabırğaarası əzələlərin qanla inhibisiyası baş verib. Diafraqmada və peritonda da geniş qansızmalar var idi. Qarın boşluğunda izlənilən qan bu xəsarətlərdən olub.
Qeyd edək ki, iyunun 27-də Rusiyanın Federal Təhlükəsizlik Xidməti Yekaterinburq şəhərində azərbaycanlıların yaşadığı evlərə basqın həyata keçirib. Nəticədə iki azərbaycanlı öldürülüb, bəziləri ağır bədən xəsarətləri nəticəsində yaralanıb, habelə 9 nəfər saxlanılıb.
İyunun 28-də Azərbaycanın Xarici İşlər Nazirliyi bəyanat yayıb. Bəyanatda hadisə ilə bağlı dərin narahatlıq ifadə olunub. "Rusiyanın məsələ ilə bağlı təxirəsalınmaz araşdırılma aparmasını və bu qəbuledilməz zorakılığı törədənlərin qısa müddət ərzində məsuliyyətə cəlb edilməsini gözləyirik", - deyə bəyanatda vurğulanıb.
ZÜMRÜD
