Azər Həsrət: "Hesab edirəm ki, bu məlumat inandırıcı görünür"
Facebook-un aid olduğu "Meta" şirkəti rüblük hesabatında ABŞ, Avropa, Azərbaycan və Malidə sosial media istifadəçilərini hədəf alan dörd Rusiya təsir əməliyyatını ləğv etdiyini bildirib. Həmin hesablardan Rusiyaya dəstək postları və Qərbin ünvanına tənqid dərc olunurdu. "Meta"nın məlumatına görə, Facebook və Instagramdakı 340 hesab və səhifədən yayımlanan məlumatların reklamına 150 000 dollardan çox pul xərclənib.
Rusiyanın ABŞ və Avropa ictimai rəyinə təsir etməyə çalışması yeni məlumat deyil. Müxtəlif vaxtlarda, əsasən də seçkilər dövründə bu, gündəmə gətirilib. Maraqlıdır, bəs Azərbaycanda ictimai rəyə təsir etmək haradan çıxdı? Axı iki ölkə münasibətləri normal müstəvidədir. O baxımdan Azərbaycanla bağlı belə məlumatlar nə dərəcədə realdır? Doğurdanmı belə cəhdlər ola bilər?
Sözügedən məsələyə aydınlıq gətirən siyasi şərhçi Azər Həsrət baki-xeber.com-a açıqlamasında buna bir neçə aspektdən yanaşdı: "Hesab edirəm ki, bu məlumat inandırıcı görünür. Çünki Rusiya xarakterinə görə elə dövlətdir ki, bu dövlət ən yaxın dostları ilə bağlı məsələlərdə də dinc durmur. Yəni Rusiyadan Azərbaycana bu cür müdaxilələrin ola biləcəyini istisna etmirəm. Belə də "Meta" şirkətinin nəyinə lazımdır ki, durub Azərbaycanla bağlı Rusiyanın belə bir şey etdiyi barədə məlumatı uydursun? Bu, onlara nəsə verirmi? Təbii ki, yox. Görünür ortada real faktlar var. Yaxud Rusiya ilə Azərbaycanın münasibətlərini gərginləşdirmək üçünmü belə deyirlər? Bu da inandırıcı görünmür. Rusiya-Azərbaycan münasibətləri prezidentlər, iki dövlət səviyyəsində ümumilikdə aparılan siyasət çərçivəsində tənzimlənir. Sadəcə olaraq Rusiya quruluş və tarixi irs baxımından elə bir dövlətdir ki, ən yaxın dövlətlərlə bağlı da bu cür addımlar ata bilər. Deməyim odur ki, iki ölkə arasında münasibətlər yaxşıdır deyə belə halları istisna etmək olmaz. Çünki Rusiya istəyir ki, post-sovet məkanında yerləşən ölkələr onun təsir dairəsində olsun. O baxımdan belə cəhdləri istisna etmirəm. Yəni iki ölkə arasında dost münasibətlərin olması o demək deyil ki, belə hallar baş vermir. Ona görə də "Meta" şirkətinə təşəkkür etmək lazımdır ki, belə bir məlumat yayıb. Həm də gərəkli bəzi addımlar atıb. Necə deyərlər, bizi ayıldıblar. Bəli, Rusiya qonşu və böyük dövlətdir. Bu ölkə ilə münasibətlərimiz normaldır. Bütün bunlarla yanaşı, Rusiya proqnozlaşdırılması çətin olan bir dövlətdir. Bunu heç vaxt nəzərdən qaçırmamalıyıq. Yəni bu gün dost dediyinə sabah hücum edə biləcək bir dövlətdir. Kiminsə təsəvvürünə gəlməzdi ki, iki slavyan dövləti olan Rusiya ilə Ukrayna arasında belə müharibə olacaq. Rusiyanın belə hücum edəcəyini kimsə gözləmirdi. Ona görə də elə məsələlər var ki, orada biz son dərəcə ayıq-sayıq olmalıyıq. Azərbaycanın dövlət maraqları hər zaman prioritet olmalıdır".
Vidadi ORDAHALLI
