Tofiq Abbasov: "Bu adam işə başladıqdan dərhal sonra Rusiya ilə Ermənistanın münasibətlərinin sağlamlaşmasına səylər göstərəcək"
Avqustun 14-də Ermənistan prezidenti Vaaqn Xaçatryan baş nazirin təklifi ilə Qurgen Arsenyanı Ermənistanın Rusiyadakı fövqəladə və səlahiyyətli səfiri təyin edib.
Erməni mediası yazır ki, keçən ilə qədər Arsenyan Rusiyada biznes sahibi olub. Arsenyan ixtisasca iqtisadçıdır. Rəsmi tərcümeyi-halına görə, 1987-2000 və 2007-2012-ci illərdə bizneslə məşğul olub, 2000-2007, 2012-2017 və 2021-2024-cü illərdə isə Ermənistan Milli Assambleyasının deputatı olub. Üstəlik, parlamentdə müxtəlif qüvvələri təmsil edib.
Arsenyanın bəyannamələrinin araşdırılması onun Milli Assambleyanın ən zəngin deputatlarından biri olduğunu göstərib.
2023-cü ilin son bəyannaməsinə görə, Arsenyan 7-si Ermənistan, 1-i Rusiya olmaqla 8 şirkətdə səhmlərə sahib olub. Lakin onun 51% paya malik olduğu erməni şirkətlərindən biri olan "Eldorado-Armen" MMC 2020-ci ildə müflis elan edilib və 2023-cü ilin sonunda iflas işi onun ləğvi ilə başa çatıb.
Qeyd edək ki, Ermənistanın Rusiyadakı səfirini dəyişmək istəyi Azərbaycanın səfiri Polad Bülbüloğlunun vəzifəsi ilə vidalaşdığı dönəmlə üst-üstə düşür. Çünki Polad Bülbüloğlu hazırda keçirilən parlament seçkilərində namizəd olaraq iştirak edir və onun seçilmə ehtimalı az deyil. Belə olan təqdirdə, Polad Bülbüloğlu səfir postu ilə tam vidalaşmalı olacaq.
Bu baxımdan, Ermənistanın gedişi adi rotasiyadır, yoxsa Polad Bülbüloğlunun gedişinə cavabdır?
Siyasi şərhçi Tofiq Abbasov "Bakı-Xəbər"ə açıqlamasında bildirdi ki, bu təyinat həm rotasiya ilə, həm də hədəflə bağlıdır: "Birincisi, çoxdan məlumdur ki, artıq Ermənistanın indiki səfiri öz fəaliyyətini başa vurmaq üzrədir, yeni adam gəlməlidir. İkincisi isə hədəfin olmasıdır. Aydındır ki, indi Rusiya ilə Ermənistan arasında çox mübahisəli, təzadlı münasibətlər formalaşır. Bunların da səbəbkarı məhz Ermənistandır. Çünki Ermənistanın tələbkarlığı yerə - göyə sığmır. O, 44 günlük müharibədən sonra Rusiyaya bir ultimatum verdi ki, siz nə üçün bizə kömək etmədiz? Burada incə bir məqam var. Məsələ ondadır ki, Rusiya Azərbaycanın tərəfində deyildi, Ermənistanın tərəfində idi. Bir neçə Rusiyanın etdiyi təxribatın qarşısını Azərbaycan ordusu özü aldı. Sadəcə, Rusiya Azərbaycandan belə yüksək səviyyəli hazırlıq gözləmirdi. Digər tərəfdən, artıq Rusiyanın ətrafında formalaşan çətinliklər, Qərblə münasibətlərin gərginləşməsi bir növ Rusiyanı neytral mövqe tutmağa sövq etdi. Amma bir daha qeyd edirəm ki, Rusiya Azərbaycanla bağlı çox məkrli bir münasibət sərgiləmişdi. Amma onlar Azərbaycandan belə çeviklik gözləmirdilər. Ona görə də, indi Ermənistanın Rusiyaya narazılıq bildirməsi onun subyektiv yanaşmasıdır. Müttəfiq olduqları məlumdur. İndiki təyin olunacaq adam birbaşa Rusiya ilə əlaqəlidir və bu təyinatın da arxasında duran motiv ondan ibarətdir ki, yanaşmalarda, münasibətlərdə olan bu gərginlik aradan qaldırılsın. Eyni zamanda, anlaşılmaz məqamlarla bağlı tərəflər bir - birinə izahlar versinlər. Aydın məsələdir ki, bu adam Rusiyapərəstdir. Əgər onun biznesi Rusiyadadırsa, birgə müəssisələrdə səhmləri varsa, Rusiya elitası ilə, iqtisadi birlikləri ilə əlaqələri varsa, demək bu özünəməxsus bir gedişdir ki, Rusiya bu adamı tez qarşılayıb, şərait versin. Digər tərəfdən də bu adam işə başladıqdan dərhal sonra Rusiya ilə Ermənistanın münasibətlərinin sağlamlaşmasına səylər göstərəcək. Təbii ki, burada anti-Azərbaycan meylləri də özünü doğruldacaq. Buna şübhə etmək lazım deyil. Çalışacaqlar ki, orada Azərbaycanın mövqelərini zəiflətsinlər. Ancaq bu iş hədəfə çatmayacaq. Bilirsiz ki, bu yaxınlarda da Putin Bakıya səfərə gələcək. Bizim özümüzün münasibətlərimiz var. Rusiyanın da Azərbaycandan asılılığı hədsiz böyükdür. Xüsusən də Ukrayna ətrafında olan böhranla bağlı bunu deyə bilərəm".
Məhəmmədəli QƏRİBLİ
