Deputatlığa namizəd Razi Nurullayevin sosial şəbəkə hesabında paylaşdığı video ictimaiyyətdə maraq doğurub.
O, sözügedən videoda gündəlik etdiyi idman hərəkətlərini göstərib.
1 sentyabr parlament seçkilərinə təbliğat-təşviqat prosesinin başladığı mərhələdə R.Nurullayevin bu addımı diqqət çəkib.
Qeyd edək ki, Azərbaycan Milli Cəbhə Partiyasının sədri Razi Nurullayevin 7 fevralda baş tutan Prezident seçkiləri ərəfəsində namizədliyi təsdiqləndikdən sonra sağlam qidalanmaqla bağlı Feysbuk hesabında paylaşdığı videolar da maraq doğurmuşdu.
Razi Nurullayevin son hərəkətlərinə isə münasibət birmənalı deyil. Onu həm tənqid, həm də müdafiə edənlər var.
ADP sədri Sərdar Cəlaloğlu Razi Nurullayevin seçkiöncəsi təbliğat kampaniyası dövründə paylaşdığı sonuncu videoya mübasibət bildirərkən deyib ki, siyasi fəaliyyətin siyasi müstəvisi, şəxsi həyatın da şəxsi həyat müstəvisi var: "Bu ikisini bir-birinə qarışdırmaq olmaz. Əgər özünü millət vəkili kimi təqdim edib bu hərəkətləri edirsə, bu yolverilməzdir, ancaq sadə bir Azərbaycan vətəndaşı, xəstəliyi olan bir insan kimi bunu edirsə, heç bir qəbahət yoxdur. Mən Razi Nurullayevi ciddi bir siyasətçi kimi qəbul etmirəm. Bu hərəkətlərlə guya özünü orijinal təqdim etmək istəyir. Hər bir xalqın özünəməxsus baxışı var. Amerikada, Avropada ola bilər ki, bu təqdir olunsun, Ancaq Azərbaycanda təqdir olunmasın. Biz bu videonu Azərbaycan xalqına təqdim ediriksə, onun zövqünə, dünyagörüşünə, mədəniyyətinə, tarixinə uyğun davranmalıyıq. Avropada belə millət vəkilləri olur, ancaq onu Azərbaycanda yamsılamaq effekt vermir".
Razi Nurullayev: "Məsələyə belə içi qurdlu yanaşanlar həyatdan kam almayanlar, uğursuz və şanssız adamlardır"
Razi Nurullayevin özü isə məsələyə belə münasibət bildirib: "Müalicə məqsədilə idman hərəkətləri etmək nə vaxtdan ayıb olub? Bura hoteldir, müalicəvi idman hərəkəti etmək üçün xüsusi zal tikməyə ehtiyac yoxdur. O cür yanaşanların əksəriyyətinin şəxsiyyətində və mənəviyyatında ciddi aşınma var. İçi qurdlu şəxslər var ki, bunu fərqli tərzdə təqdim edirlər. Həmin şəxslərin içində reket jurnalistika və reket jurnalistlər də var. Məsələyə belə içi qurdlu yanaşanlar həyatdan kam almayanlar, uğursuz və şanssız adamlardır. Allah onların taleyinə uğursuzluq, deyinmək, hər şeydən narazılıq, bəxtsizlik, şanssızlıq və bədbəxt olma yazıb. Qoy beləcə də uğursuz və şanssız həyatlarını davam etdirsinlər".
Təhmasib Novruzov: "Seçki kampaniyasında təbliğatın əsas məğzi və qayəsi xalqın problemləri ilə maraqlanmaq olmalıdır"
Azad Hərəkatçılar Birliyinin sədri Təhmasib Novruzov "Bakı-Xəbər"ə açıqlamasında bildirdi ki, biz bəzən hadisələrə məqsədli yanaşma ortaya qoyuruq: "Bu da bir anormallıqdır. Baş verən hadisəyə niyə başqa prizmadan yanaşmalıyıq? Razi Nurullayev gödək şalvarda deyil. Hansısa naməhrəm yerini nümayiş etdirmir. Hər bir insan idman etməlidir. Bunu niyə belə şişirdirlər? Görünür, Razi Nurullayevi xoşlamayanlar bu cür variantlardan məqsədli şəkildə istifadə edirlər. Bir dəfə Nemət Pənahlı canlı efirdə başını yerə qoyub, ayaqlarını göyə qaldırdı. Ona da belə sərt yanaşdılar. Biz bir tərəfdən demokratiyadan danışırıq, digər tərəfdən isə idman edənlərə qarşı hücuma keçirik. Təbiidir ki, seçki kampaniyasında təbliğatın əsas məğzi və qayəsi xalqın problemləri ilə maraqlanmaq olmalıdır. Amma istənilən halda, bu adamı linc etmək lazım deyil. Bəzən bizim müğənnilərimiz çıxıb sənət əvəzinə digər keyfiyyətlərini nümayiş etdirdiyi kimi, Razi Nurullayev də millət vəkili kimi nə edəcəyindən danışmaq əvəzinə, belə addımlar atır. Hesab edirəm ki, bu işin şişməsində Razi Nurullayevin alternativlərinin də rolu az deyil. Razi Nurullayevin deputat kimi fəaliyyətini yüksək qiymətləndirmirəm. Gələcəkdə də deputat olub nəyəsə nail olacağını gözləmirəm".
Məhəmmədəli QƏRİBLİ
