Ermənistanda hakimiyyət daxilində son dövrlərdə ciddi çaxnaşma qeydə alınır. Eyni zamanda, gələn aydan müxalifətin kütləvi aksiyaları bərpa etmək niyyətinə də hakimiyyət indidən ciddi şəkildə hazırlaşır.
Bunlar fonunda Ermənistanın "Joxovurd" qəzeti yazır: "Mənbələrimiz bildirir ki, 2026-cı il parlament seçkilərində qələbəni təmin etmək üçün hakim partiya artıq sıralarını təmizləməyə başlayıb. Hakim partiyanın İdarə Heyətinin sədri Nikol Paşinyanın sədrliyi ilə keçirilən iclasında Şenqavit ərazi təşkilatı şurasının rəhbəri vəzifəsinə namizəd təsdiqlənib. "Vətəndaş müqaviləsi"nin İdarə Heyəti həmçinin Abovyanın ərazi təşkilatı Şurasının sədri vəzifəsinə Hovhannes Abramyanın və ərazi təşkilatı Şurasının sədri vəzifəsinə Sevak Badalyanın namizədliyini təsdiqləyib. Mənbələrimizin bildirdiyinə görə, Paşinyan bölgələrdə və inzibati rayonlarda səlahiyyətdən istifadə edən və onlara verilən tapşırıqları pozmayacaq adamları vəzifəyə keçirməyə çalışır. Hökumət başçısının mütəmadi olaraq rayonlara, paytaxtın müxtəlif inzibati rayonlarına səfər etməsinin başqa səbəbi də budur. Məlumata görə, yaxın vaxtlarda Dövlət Dumasının üzvləri müxtəlif yerlərdə yenidən kənarlaşdırılacaq və onların yerinə yeniləri gətiriləcək".
Bütün bunlar həm də ona görə edilir ki, hakimiyyət radikal müxalifətdən gələcək bütün təhdidləri aradan qaldıra bilsin. Radikal müxaliflər isə yeni aksiyalara hazırlaışır. Ermənistanda hökumətə qarşı etiraz aksiyaları keçirən keşiş Baqrat Qalstanyan yenidən tərəfdarları ilə görüşür. O bildirib ki, hakimiyyətə qarşı mübarizənin yeni mərhələsinə hazırlıq gedir. Baqrat Qalstanyan əlavə edib ki, hərəkatın aktivləşmə mərhələsi sentyabrın əvvəlində başlayacaq. Bundan başqa, Qarabağdakı keçmiş qondarma rejimin separatçılarından Samvel Babayan Ermənistanda seçkiöncəsi hazırlıqlara başlayıb. "Qraparak" nəşri yazır ki, Babayan artıq Ermənistandakı digər separatçılarla görüşlər keçirir. O, Qarabağdan köçən ermənilərlə ittifaq yaratmağı və 2026-cı ildə keçiriləcəyi deyilən parlament seçkilərinə birlikdə qatılmağı təklif edib. Babayanın son zamanlar bir neçə dəfə belə görüşlər keçirdiyi bildirilir. Məlumata görə, Samvel keçmiş qondarma rejimin "parlament üzvləri" ilə görüşdə seçkilərə ciddi şəkildə hazırlaşdığını, lakin vahid cəbhə halında iştiraka üstünlük verdiyini deyib. Digərləri bu təklifə müsbət yanaşmayıb, risq və təhlükələrin olduğunu bildiriblər. Bunlardan biri isə Qarabağdan gələn ermənilərlə Ermənistan vətəndaşları arasında ayrı-seçkiliyin olmasıdır. Separatçılar Babayana deyiblər ki, Qarabağdan gələn ermənilərə birləşərək seçkiyə qatılsalar, bu, iki kəsim arasında daha ciddi bölünməyə səbəb ola, Qarabağdan gələnlərin Ermənistanda hakimiyyətə iddia etməsi kimi anlaşıla bilər. Həmçinin Ermənistana köçənlərin əksəriyyəti bu ölkənin vətəndaşlığına sahib deyil. Bu səbəbdən səsvermə prosesində gözlənilən nəticə əldə edilməz. Ermənistan parlament nümayəndələri də Babayanın Qarabağ erməniləri üçün xüsusi ittifaq yaratmaq fikri ilə razılaşmayıblar. Onlar "Hayastan" və "Şərəfim var" kimi partiyaların bu istiqamətdə çalışdığını bildiriblər. Lakin Babayan geri çəkilməyib və yeni bir qurum yaratmağı təklif edib. Baş verənləri şərh edən "armenianreport" portalı yazır: "Ermənistanda köhnə rejimlərə - Robert Köçəryana və Serj Sarkisyana nifrət var. O səbəbdən Ermənistanın köhnə və yeni hakimiyyət orqanları arasında mübahisədə biz açıq şəkildə yeniləri dəstəkləyirik. Ermənistanda hazırda hakimiyyətdə olan qüvvə cəsarət göstərib Rusiyaya və onun ətrafında yaradılmış süni təşkilatlara, ilk növbədə KTMT-yə öz narazılığını bildirirsə, təbii ki, biz Paşinyan və onun əlaltılarının tərəfindəyik. Əgər Ermənistan hakimiyyəti Ermənistanda həqiqətən bizə kömək etmək istəyən ölkələri və geosiyasi mərkəzləri gücləndirməyə yönəlmiş addımlar atırsa, biz "Vətəndaş müqaviləsi" nin tərəfindəyik. Əgər "məxməri inqilab"a qədər milyonlarla dollar oğurlayan oliqarxlar ciblərindən "qazanclar"ı çıxarmaq üçün Baş Prokurorluğa dəvət edilirlərsə, korrupsionerlər həbsdədirsə, biz mütləq bunun tərəfdarıyıq!
Amma bu o demək deyil ki, biz indiki hakimiyyəti bütləşdiririk və səhv edəndə onları ört-basdır edəcəyik. Heç də yox! Biz şəxsiyyətlərlə deyil, fenomenlərlə savaşırıq. Hakim qüvvə "respublikaçılar"ın işlətdiyi eyni iş üsullarını mənimsəməyə çalışanda şəxsən biz xüsusilə qəzəblənirik. Məlum olub ki, hədə-qorxu və şantaj üsulları da Paşinyan tərəfdarlarına yad deyil. Bəli, təbii ki, başı qırxılmış oğlanların müxalifətçiləri döyməsi o həddə çatmadı, amma "qürurlu vətəndaşlarımız" artıq kollektiv xarakterli ultimatumlarla qarşılaşırlar. Məsələn, bura baxın. "Qraparak" qəzeti yazır ki, Paşinyanın rəsmiləri üsyançı keşiş Baqrat Qalstanyanın mitinqlərinə vətəndaşların getməsini gizli şəkildə qadağan etməyə başlayıb. Yoxsa, deyirlər camaatı subsidiyalardan məhrum edəcəyik... Xüsusən də icma başçılarına, inzibati rəhbərlərə təzyiqlər edilir. Bu barədə jurnalistlərə Ararat bölgəsində icmaya rəhbərlik edən şəxslərdən biri məlumat verib. Bəzi məlumatlara görə, təqaüdçüləri hətta təqaüdlərindən məhrum edilməklə qorxudublar! Nə baş verir, əziz həmvətənlər? Sosial təminat və kənd dəstəyi kəndlilərin siyasi əqidəsindən asılıdırmı? Ermənistan hakimiyyəti kollektiv məsuliyyət prinsipini tətbiq edir və hətta siyasətə qarışmayan, bəlkə də Paşinyana dəstək verən, lakin müxalif fikirli bir cəmiyyətdə yaşamaq bədbəxtliyinə düçar olan insanları belə problemlə hədələyir. Hə, düzdü... Qonşunuz Baqrat Srbazanı dinləməyə getdi, siz getmədiniz, amma siz də daxil olmaqla bütün kənd cəzalandırılacaq: nə yolu təmir edəcəklər, nə su çəkəcəklər, qazı, təcili yardım məntəqəsini bağlayacaqlar. Deyirlər, yerini bil! Kəndliləri subsidiyasız qoyacaqları ilə hədələyirlər. İcma rəhbərlərini "mehriban söhbətə" çağıran ağıllı adamlar düşünürlər ki, subsidiyasız qalan fermerlər müflis olacaq, borc içində qalacaq, əmlakını itirəcək və sonda fəal iqtisadi əhalinin bir hissəsi olmaqdan çıxacaq. Onlar marjinallaşdırıla, İrəvana köçə, orada qeyri-adi işlərlə məşğul ola bilərlər. Yaxud İrəvana yox, Ermənistandan kənarda hardasa - Şərqi Avropada müharibə başa çatdıqdan sonra həm Ukraynaya, həm də Rusiyaya işçi lazım olacaq. "Vətəndaş müqaviləsi"nin ağıllı adamları buna nail olmağa çalışırlarmı? Burada, mediaya görə, artıq təmizləmələr başlayır və görünür, bu partiyanın bəzi üzvləri sırf Paşinyanın xoşuna gəlmək üçün ən böyük canfəşanlıq nümayiş etdirmək qərarına gəliblər. Rəhbərliyin özü də, göründüyü kimi, əsəbiləşib. Partiyanın reytinqi düşür, "Vətəndaş müqaviləsi"nin əvvəlki populyarlığı getdikcə azalır. Ermənistan başı aslanın ağzında olan sirk ifaçısı kimidir. Həm cənubda, həm də şimalda vəziyyət heç bir nikbinlik yaratmır. Əhalinin zənginlikdən uzaq olduğunu nəzərə alsaq, nədənsə mükafatlar məmurlara səxavətlə paylanır. Vətəndaşlar üçün xaricdən malların rüsumsuz idxal həddi 500 avrodan 200 avroya və 25 kiloqramdan 10 kq-a endirilib. Bəzi vergi pozuntularına görə cinayət məsuliyyəti nəzərdə tutulur - 3 ilə qədər həbs. Dövlət Gəlirləri Komitəsinin təklif etdiyi vergilərin sərtləşdirilməsi təklfi xüsusilə bu və ya digər şəkildə müxalifəti dəstəkləməyə çalışan iş adamlarına hesablanıb. Bunu necə bəyənirsiniz? Erməni xalqı axmaq deyil və bütün bunları görür: damla-damla olsa da, xalqın qəzəbi toplanır. Əgər Nikol Paşinyanın tabeliyində olanlar belə yöndəmsiz üsullarla xalqı "əymək" iqtidarında olduqlarını düşünürlərsə, dərindən yanılırlar".
Samirə SƏFƏROVA
