Bünyamin Qəmbərli: "Bu məlumatların Naxçıvan MSK-nın saytında verilməməsi qanuna ziddir, seçici hüquqlarının pozulmasıdır"
Sentyabrın 1-də Azərbaycan Milli Məclisi ilə yanaşı Naxçıvan Muxtar Respublikası Ali Məclisinə də növbədənkənar seçkilər keçiriləcək. Azərbaycan Mərkəzi Seçki Komissiyası qeydə alınmış namizədlərin siyahısını öz elektron ünvanında (msk.gov.az) yerləşdirib. Amma maraqlıdır ki, muxtar bölgədə seçkiləri təşkil edən Naxçıvan Mərkəzi Seçki Komissiyası bu addımı atmayıb.
Qurumun nmsk.gov.az ünvanında 1 sentyabr seçkiləri ilə bağlı bölümdə ancaq seçkilərin təyin olunması, seçki dairələri, seçicilərlə görüş yerləri və s. texniki xarakterli informasiya yerləşdirilib. Dairələr üzrə namizədlərlə bağlı məlumat isə yoxdur.
Qeyd edək ki, Naxçıvan Ali Məclisi 45 deputatdan ibarətdir, Konstitusiyaya görə, Muxtar Respublikanın ali orqanı bu qurumdur. Seçkilərdən sonra deputatlar Ali Məclisin sədrini və onun müavinlərini seçirlər.
Ehtimal edilir ki, Naxçıvan Mərkəzi Seçki Komissiyasının namizədlərə dair məlumatları, o cümlədən seçki prosesi ilə bağlı məlumatları ictimaiyyətdən gizlətməsi faktiki olaraq Naxçıvanın konstitusion rəhbərinin – Ali Məclisin sədrinin kim olacağını təxmin etməyi də mümkün etmir.
Naxçıvan Ali Məclisinə keçirilən seçkilərlə bağlı bu vəziyyəti necə izah etmək olar?
Naxçıvan Ali Məclisinin sabiq deputatı, müstəqil siyasətçi Bünyamin Qəmbərli "Bakı-Xəbər" - ə açıqlamasında bildirdi ki, Azərbaycanda seçkilərin keçirilməsi ilə bağlı müəyyən narazılıqlar var: "Elə bir vəziyyətdə, təbiidir ki, Naxçıvan parlamenti ilə bağlı yaşananlar kölgədə qalır. Bunun bir neçə səbəbi var. Əvvəllər Naxçıvan parlamentinin müəyyən çərçivədə müstəqilliyi var idi. Yerli səviyyədə olsa da, müəyyən məsələləri həll etmək iqtidarında idi. Hazırda Naxçıvan parlamentinin səlahiyyətləri kağız üzərində qalsa da, özü bələdiyyələr səviyyəsində bir təşkilata çevrilib. Bələdiyyələrin də sənəd üzərində səlahiyyətləri olsa da, faktiki olaraq icra hakimiyyətlərin arxasınca sürünən quruma çevriliblər. Naxçıvan parlamenti də təxminən bu vəziyyətdədir. Başqa bir səbəb odur ki, parlamentə seçiləcək adamları onlar müəyyən etmək istəyir. Siyasi partiyalarla bağlı məsələyə gələndə, bu təsisatlar Azərbaycanın özündəki seçkilərdə belə zəif iştirak edir. Əgər Azərbaycanda vəziyyət belədirsə, Naxçıvanda daha acınacaqlıdır. Naxçıvandakı siyasi partiyaların böyük bir qisminin yerli təşkilatları yoxdur. Olan təşkilatlar isə namizədlərini irəli sürə bilmir. Bu baxımdan da YAP - ın monolit siyahı ilə çıxış etməsi bir qədər pis görünərdi. Bu məlumatların Naxçıvan MSK - nın saytında verilməməsi qanuna ziddir, seçici hüquqlarının pozulmasıdır. Hər bir seçici öz namizədinin kim olduğunu bilməlidir. Ali Məclisin sədrinin kim olacağını təxmin etmək asan deyil. Düşünürəm ki, mərkəzi hakimiyyət kimi məsləhət biləcəksə, o da sədr olacaq. Ordakı qruplaşmaların bu qərarı verməyə gücü çatmaz".
Məhəmmədəli QƏRİBLİ
