Rəsul Cahangirli: "Əminliklə deyirəm ki, bu, gözdən pərdə asmaq üçün verilən məlumatdır"
Antiinhisar və İstehlak Bazarına Nəzarət Dövlət Xidməti tərəfindən genişzolaqlı İnternet xidmətləri bazarında Rəqabət Məcəlləsinin tələblərinin pozulması əlamətləri üzrə araşdırmalara başlanılıb.
Son dövrlərdə kütləvi informasiya vasitələrində, bəzi İnternet provayderlərinin rəsmi İnternet səhifələrində, habelə sosial şəbəkələrdə genişzolaqlı İnternet xidmətləri bazarında fəaliyyət göstərən təbii inhisar subyektləri və bir sıra özəl provayderlər tərəfindən İnternet xidmətlərinin minimum tariflərinin yüksəldilməsinə dair xəbərlər yer alır. Məsələ ilə əlaqədar İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə də çoxsaylı vətəndaş müraciətləri daxil olur.
Kütləvi informasiya vasitələrində yer alan məlumatların və Dövlət Xidmətinə daxil olan çoxsaylı vətəndaş müraciətlərinin ilkin təhlili nəticəsində İnternet xidmətlərinin yeni tariflərinin müvafiq bazarın əsas iştirakçıları olan təbii inhisar subyektləri və bir sıra özəl provayderlər tərəfindən kollektiv əsaslarla müəyyən edildiyi, eyni xidmətlərə (eyni sürət və paketlərə) görə eyni qiymətlərin təyin edildiyi və bu prosesin ölkədə fəaliyyət göstərən İnternet provayderləri tərəfindən əlaqəli bir şəkildə, uyğunlaşdırılmış hərəkətlər və ya kartel tipli münasibətlərlə həyata keçiriləcəyinin ilkin əlamətləri müşahidə olunur.
Məlum olduğu kimi, İnternet bazarında ciddi antiinhisar, sui-istifadə halları və qiymət şişirtmələri var. Bu da əhalinin, İnternet istifadəçilərinin ən narazı qaldığı məsələlərdən biridir. O baxımdan yoxlamadan ekspertlər nə gözləyir?
"Araşdırmaların praktiki baxımdan hansısa nəticəsinin olacağını, qiymətlərə yenidən baxılacağını düşünmürəm"
Sözügedən məsələyə aydınlıq gətirən ekspert Rəsul Cahangirli "Bakı-Xəbər"ə açıqlamasında yoxlamalardan nəsə gözləmədiyini bildirdi: "Əminliklə deyirəm ki, bu, gözdən pərdə asmaq üçün verilən məlumatdır. Ən azından ona görə ki, İnternet bazarında inhisarçılığın olduğu çoxlarına məlim idi. Araşdırmaların praktiki baxımdan hansısa nəticəsinin olacağını, qiymətlərə yenidən baxılacağını düşünmürəm. Əgər süni və əsassız qiymət artımının qarşısını almaq məqsədi olsaydı, bir ay əvvəl hansısa tədbirlər görülərdi. Çünki bir aydan çoxdur ki, qiymətin artırılacağı deyilirdi. Yaxşı, bəs o zaman niyə yoxlamalara qərar verilmədi? Məgər bilmirlər ki, bu, əhali arasında ciddi narazılığa səbəb olur? Özü də parlament seçkiləri ərəfəsində bunun baş verməsi İnternet istifadəçilərinin hissləri ilə oynamaq, əhalini narazı salmaq deməkdir. Sürəti qaldırmağı əsas gətirməklə qiyməti də bahalaşdırmaq düzgün siyasət deyil. Heç şübhəsiz ki, bu, kəndlərdə insanların İnternetə əlçatanlığını daha da aşağı salacaq. Kənd yerlərində yaşayan sadə vətəndaş əgər aylıq 10-12 manat ödəyirdisə, indi gərək 25 manat ödəsin. Nəzərə alsaq ki, kənd yerlərində əhalinin gəlirləri aşağıdır, bu, onların sosial durumuna mənfi təsir edəcək. Məgər kənddə yaşayanlara yüksək sürət lazımdır? Onlar üçün aşağı sürət də yetərli idi. Təəssüf ki, dövlət provayderləri onları da sahibkarlarla bir tutaraq İnternet tariflərini bahalaşdırır. Bu doğru deyil. Qiymətləri bu dərəcədə artırıb İnternet istifadəçilərinin cibinə girmək olmaz".
Vidadi ORDAHALLI
