Akif Nağı: "Antiazərbaycan ölkələrin nümayəndələri Avropa Parlamentində belə bir absurd qətnamə qəbul etməklə özlərini növbəti dəfə biabır ediblər"
Avropa təşkilatlarının əsas mövqeyi ədalətin müdafiəsi olmalı olduğu halda, təəssüf ki, bu qurumlarda təmsil olunanlar bir qayda olaraq haqsızın tərəfini tutmaqda davam edir, işğalçını, müharibə canilərini dəstəkləyir.
Biz həmin təşkilatların dəfələrlə bu cür qəbuledilməz mövqe sərgilədiyinin şahidi olmuşuq.
İndi də Avropa Parlamenti (AP) Bakıda məhkəməsi gedən separatçılarla bağlı qətnamə qəbul edib. AP-nin qəbul etdiyi qətnamədə Azərbaycan məhkəməsində mühakimə olunan erməni əsilli şəxslər "girov" və "hərbi əsir", separatçıların məhkəməsi isə "saxta" məhkəmə adlandırılıb.
Bu qurumun Azərbaycanı insanlıq əleyhinə və müharibə cinayətləri törətmiş şəxsləri azadlığa buraxmağa çağırması, eyni zamanda ittiham olunan şəxsləri "əsir" və "girov" adlandırması heç cür qəbul edilən hal deyil.
"İttiham olunan şəxslərin "əsir" və "girov" adlandırılması, məhkəmə prosesinə qarşı qarayaxma aparılması Avropa Parlamentinin həm antiazərbaycan mövqeyinin, həm də cinayəti, terroru dəstəkləməsinin göstəricidir"
Azad Vətən Partiyasının sədri Akif Nağı "Bakı-Xəbər" ə şərhində bildirdi ki, Avroparlamentin qəbul etdiyi qətnamə tamamilə absurddur.
A.Nağı bildirdi, Avropa Parlamenti ermənipərəst bir qurumdur və orda ədalət yox, erməni lobbisinin təsir mexanizmləri işləyir.
A.Nağının sözlərinə görə, Avropa İttifaqının Azərbaycana qarşı qərəzli mövqeyi məlumdur. "Xüsusilə də xristian dəstəsinin toplaşdığı Avropa Parlamenti ancaq qərəzli qətnamələr qəbul etməklə məşğuldur. Bu qurum, o cümlədən, Azərbaycana qarşı daim qərəzli mövqedən çıxış edib. Xüsusilə də onlar Avropa Parlamenti deyilən, əslində isə bir xristian dəstəsinin toplaşdığı məkanda ancaq qərəzli qətnamələr qəbul etməklə məşğuldurlar. O cümlədən, Azərbaycana qarşı daim Avropa Parlamenti qərəzli mövqedən çıxış edib.
Avropanın ən qərəzli, ən ədalətsiz, qeyri-obyektiv nümayəndələri ora toplaşıb. Ordan da özlərini göstərməyə, daha çox çox populist mövqe tutmağa çalışırlar. Avropa Parlamenti antiazərbaycan qüvvələrin yığışdığı bir yerdir və get-gedə də mənasını itirir. Necə ki, Avropa Şurası Parlament Assambleyası öz əhəmiyyətini getdikcə itirir, heç kəs onlara ciddi qurum kimi baxmır, eləcə də buna ciddi yanaşılmır".
Azərbaycana qarşı qəbul edilən qətnaməyə gəlincə, A.Nağı bildirdi ki, Azərbaycan Avropa Parlamentinin bu cür qətnamələrinə fikir verməməlidir. A. Nağının sözlərinə görə, ağır cinayətlərdə ittiham olunan R.Vardanyanla, eləcə də başqaları ilə Avropa Parlamentinin bəzi deputatlarının fikirləri üst-üstə düşür. "Avropa Parlamenti vaxtilə Azərbaycana qarşı cinayət törədən hərbi caniləri, quldur dəstəsini, işğalçı Ermənistanı da dəstəkləyib, bunu indi də davam etdirirlər. Həm ermənilərə öz dəstəklərini göstərmək istəyirlər, həm də Azərbaycana qarşı nifrət və qərəzli mövqe nümayiş etdirirlər. Bunun başqa heç bir adı yoxdur. Bu heç bir obyektiv sənədə söykənmir. Hərbi canilərə, terrorçulara qarşı bütün dünyada münasibət eyni olmalıdır. Dünyanın qəbul etdiyi bir normadır ki, terrorçuya heç bir vaxt bəraət qazandırıla bilməz. Bu şəxslərin cinayətləri açıq şəkidə ortada olduğu halda Avropa Parlamenti onları müdafiə edir. İttiham olunan şəxslərin "əsir" və "girov" adlandırılması, məhkəmə prosesinə qarşı qarayaxma aparılması Avropa Parlamentinin həm antiazərbaycan mövqeyinin, həm də cinayəti, terroru dəstəkləməsinin göstəricidir. Bu adamlar Azərbaycan dövləti əleyhinə üsyan qaldırıblar, onların hər birinin hərbi cinayətlərdə iştirakı olub. İkincisi, onlar Qarabağ müharibəsinin gedişində dinc əhaliyə qarşı terror aktları törədiblər. Gəncəni, Bərdəni, Naftalanı, Tərtəri raket atəşinə tutublar, nəticədə böyük bir insan faciəsi baş verib. Avropa Parlamentinin deputatları bu faktları necə görməyə bilərlər? Sadəcə, görmək istəmirlər. Bu qəbul edilən qətnamənin heç bir əhəmiyyəti yoxdur, biz ona fikir vermirik, lazımsız bir kağız parçasıdır, kənara atılmalıdır. Azərbaycanın hərəkətlərinə tarix özü qiymət verəcək. Avropada bu işin üzərinə xorla gedirlər, xordan kənara çıxa bilmirlər. Müəyyən ölkələr və onların nümayəndələri var ki, Azərbaycanın haqlı mövqeyinə anlayışla yanaşır, biz də onlarla əməkdaşlıq edirik.
Başqalarının qərəzli mövqeyini Azərbaycan heç vaxt nəzərə almamalıdır.
Antiazərbaycan ölkələrin nümayəndələri Avropa Parlamentində toplaşıb belə bir absurd qətnamə qəbul etməklə özlərini növbəti dəfə biabır ediblər"-deyə A. Nağı bildirdi.
İradə SARIYEVA
