Avroparlament yol pulu və bilet pulu rüşvətindən batır...
Zaur İbrahimli: “Avropa Parlamentində rüşvət, korrupsiya halının olması sirr deyil”
Məlum olduğu kimi, Belçikada Avropa Parlamentinin binasında korrupsiyaya görə axtarışlar aparılıb. 2021-ci ildən bəri həyata keçirilən aktiv korrupsiya şübhələri ilə əlaqədar ölkə daxilində iyirmiyə yaxın əməliyyat keçirilib.
Araşdırma zamanı siyasi vəzifələrə görə mükafatlar, yemək və yol xərcləri kimi böyük miqdarda hədiyyələr, hətta futbol matçlarına müntəzəm dəvətlər kimi korrupsiya halları olub. Prokurorluq bildirib ki, belə hallarda məqsəd siyasi qərarların qəbulunda sırf şəxsi kommersiya maraqlarının təşviqi olub. Belə aydın olur ki, Avropa Parlamentinin binasında da yemək, yol pulu və digər adlar altında korrupsiya var imiş.
“Aşkarlanan dəlillər göstərir ki, bir sıra deputatlar, xüsusən də Azərbaycan əleyhinə çıxış edənlər müxtəlif fondlardan ianə alıblar”
Mövzu ilə bağlı fikir bildirən “Prioritet” Sosial İqtisadi Araşdırmalar Mərkəzi İctimai Birliyinin sədri, siyasi şərhçi Zaur İbrahimli “Bakı-Xəbər”ə açıqlamasında qeyd etdi ki, erməni diasporu Avropa Parlamentində çox geniş korrupsiya şəbəkəsi yaradıb: "Demək olar ki, hər sessiyada həqiqətdən uzaq, cəfəng qərarlar qəbul olunur, sağlam düşüncəyə sığmayan addımlar atılır. Avropa Parlamentində aşkarlanan korrupsiya halları bir daha göstərdi ki, bu qurumun Azərbaycana qarşı qəbul etdiyi qərar və qətnamələr qeyri-obyektivdi. Konkret siyasi qrupların verdiyi rüşvət müqabilində o cür qərarlar qəbul olunur. Məhz belə hallar yaşılların və liberalların, o cümlədən mərkəz mövqedən çıxış edənlərin siyasi manevrlərini sarsıdıb. Onları daha çox sağ mühafizəkarlar üstələyib. Bu onu göstərir ki, Avropa Parlamentinin Avropa ölkələrində belə nüfuzu yoxdur. Avropa Parlamentində böyük korrupsiya şəbəkəsinin olması barədə ilk aydın dəlillər 2022-ci ildə aşkarlanıb. Həmin dövrdə Avropa Parlamentinin vitse-prezidenti Eva Kayli şübhəli şəxs kimi saxlanıldı, onun ardınca isə bir neçə qeyri hökumət təşkilatının rəhbərləri də təqsirləndirilən şəxs qismində istintaqa cəb edildi. Həmin zaman barəsində axtarış aparılan adı çəkilməyən Avropa Parlamentinin deputatının 600 min evro dəyərində rüşvət verdiyi aşkarlandı. Xüsusən də Qətərdə futbol üzrə dünya çempionatı keçirilən zaman qərarların qəbulu məsələsində korrupsiya halı meydana çıxdı. Aydın olmuşdi ki, bir qrup Avropa parlamentinin deputatı rüşvət müqabilində qərarlara lobbiçilik edib. Ümumiyyətlə, Avropa parlamentində rüşvət, korrupsiya halının olması sirr deyil. Aşkarlanan dəlillər göstərir ki, bir sıra deputatlar, xüsusən də Azərbaycan əleyhinə çıxış edənlər müxtəlif fondlardan ianə alıblar. Bütün bunlar onu deməyə əsas verir ki, Avropa Parlamentinin özünün belə qəbul etdiyə qərarları analiz etmək lazımdır. Hesab edirəm ki, Azərbaycanla bağlı qərarların qəbulunda erməni diasporunun fəal iştirakı ilə korrupsiya halına yol verilir, böyük miqdarda rüşvət verilib”.
Həmsöhbətimizin fikrincə, növbəti qalmaqal Avropa Parlamentində Azərbaycanla bağlı qərarların qəbulunda müşahidə ediləcək. Gec-tez müvafiq araşdırmalar aparılacaq və Azərbaycan əlehinə qərarların qəbulunda edilən rüşvət, korrupsiya faktları aşkar olunacaq.
Günel CƏLİLOVA
