Fransa Milli Assambleyasının sədri Yael Braun-Pive Ermənistana səfər edəcək. Erməni mediasının verdiyi məlumata görə, fransız spiker bu barədə tvitter səhifəsində məlumat verib:
“Milad bayramı zamanı fikrim ermənilərə yönəlib, onlara ümid və sülh arzulayıram. Fransa Milli Assambleyasının dəstəyini bir daha ifadə etmək üçün gələn həftə Ermənistana gələcəm”. O, Fransa nümayəndə heyətinin tərkibində qanunverici orqanın təmsilçilərinin də olacağını bildirib. Qeyd edək ki, ötən il Fransa Milli Assambleyası Azərbaycana qarşı qətnamə qəbul edib.
Fransalı parlamentarilərin səfəri olduqca maraqlı dönəmə təsadüf edir. Hazırda Ermənistan paytaxtında və Gümrüdə Rusiya əleyhinə aksiyalar intensiv hal almağa başlayıb. Həmin aksiyaların əsas şuarı kimi rus qoşunlarının Ermənistandan çıxarılması tələb olunur. Məhz belə məqamda Fransanı təmsil edən yüksək nümayəndə heyətinin Ermənistana səfəri nə ilə izah edilə bilər?
Politoloq Elşən Mustafayev “Bakı-Xəbər”ə açıqlamasında bildirdi ki, 2022-ci ilin son günlərində Fransa BMT Təhlükəsizlik Şurasının müzakirəsinə təqdim etdiyi Azərbaycan əleyhinə yönəlmiş qərəzli sənədi geri çəkməli oldu: “Qarabağ münaqişəsinin həll edilməsində vasitəçilik missiyasını yerinə yetirən ATƏT-in Minsk qrupunun üzvlərindən biri olan Fransa Qarabağ müharibəsində bitərəfliyini pozaraq açıq şəkildə Ermənistanın yanında olub. Fransa öz prezidentinin timsalında beynəlxalq hüquqda vasitəçilər üçün müəyyən edilmiş norma və prinsiplərə məhəl qoymayaraq açıq şəkildə ermənipərəstlik edib.
Qədim tarixə malik Fransa diplomatiyası nisbətən gənc Azərbaycan diplomatiyası qarşısında uğursuzluğa düçar oldu. Bu, təkcə fransız və erməni diplomatlarının deyil, ümumilikdə Emmanuel Makronun və dünya erməni diasporunun Azərbaycana qarşı apardıqları mübarizənin iflasa uğraması idi. Ermənistanın müttəfiqi olan Moskvanın başı üzərindən Avropa İttifaqı, xüsusən də Fransaya üz tutması Kreml, o cümlədən Rusiyanın prezidenti və administrasiyası tərəfindən heç də xoş qarşılanmır. Artıq Rusiyanın siyasi dairələrində, mediasinda Nikol Paşinyan iqtidarının siyasəti sərt tənqid olunur və onun fikirlərini cəfəngiyat adlandırırlar.
Qeyd edilənlər fonunda Ermənistanın Avropa İttifaqı mülki missiyasını öz ərazilərinə dəvət etməsi bu ölkənin Rusiya ilə münasibətlərinin yaxşı olmayacağını deməyə əsas verir.
Ermənistanda və Cənubi Qafqazın digər respublikalarında NATO ölkələrinin aktiv “xeyirxahlığı” bu regiondakı ölkələri Vaşinqtonun orbitinə gətirmək cəhdləridir. Pentaqon və ittifaqa real situasiyada cənuba doğru İrana qarşı, şimala doğru Rusiyaya qarşı uyğun regional platforma lazımdır. Digər mənalar ikinci dərəcəlidir. Fransa da “bacısı” Ermənistanla buna çalışır. Ona görə də, antirus ovqatı artmaqdadır.
Bu gün Fransanın apardığı siyasət Azərbaycan və Ermənistan arasında sülh prosesinə xələl gətirir və bölgəni yeni xaosa sürükləyir. Lakin həm Ermənistan, həm Fransa, həm də separatçılar odla oynadıqlarının fərqində olmalıdır. Hadisələr Azərbaycanın dəmir yumruğunun işə düşməsini bir daha labüd edə bilər. Bir sözlə, hazırda Ermənistanı Rusiyadan qoparmağın baş dirijorluğunu Paris edir. Bu iki hadisə arasında birbaşa bağlılıq görürəm. Ancaq Rusiya da asanlıqla bu təhdidlərə baş əyən deyil. Sadəcə, Avropa adından çıxış edən Fransa bu məsələdə Rusiyanın Ukraynada başının qarışdığını əsas götürərərək fəallığını bir az da artırır”.
Məhəmmədəli QƏRİBLİ
