Bu il dekabrın 20-21-də Fransa və Ermənistan Laçın yolundakı vəziyyətlə bağlı BMT TŞ-nın iclasını çağırmağa nail oldu. Həmin müzakirələrdən dərhal sonra Fransa BMT TŞ-nın daimi üzvü və hazırda TŞ-nın sədri kimi Laçın-Xankəndi yolundakı vəziyyəti “humanitar fəlakət” kimi təqdim edən riyakar və tam ermənipərəst mətn hazırlamışdı.
Həmin tarixdən mətn üzərində sözün əsl mənasında gərgin müzakirələr gedirdi. Prosesləri bilavasitə Fransa Prezident Administrasiyası və Makronun xarici siyasət məsələləri üzrə müşavirləri yönləndirir, hər vəchlə məqsədlərinə çatmaq istəyirdi. BMT TŞ-nın daimi üzvü və hazırda TŞ-nın sədri Fransa bütün resurslarını səfərbər etsə də, Azərbaycan əleyhinə olan bəyanatı qəbul etdirə bilmədi. Azərbaycanın ardıcıl, məqsədyönlü diplomatik addımları, xüsusilə qətiyyətli, uzaqgörən lider, mahir siyasətçi kimi Prezident İlham Əliyevin şəxsi nüfuzu, onun diplomatiyası sayəsində Azərbaycanın dünyada qazandığı dost ölkələr Fransanın bu cəhdlərini sıfırladı, cütlüyün cəhdlərini iflasa uğratdı.
Beləliklə, hazırladığı sənədin özünə qarşı yönəldiyini görən Fransa rəsmən məktubla müraciət edərək prosesi dayandırdığını bəyan etmək məcburiyyətində qaldı.
Paris növbəti dəfə dünyanın gözü qarşısında aciz, rəzil duruma düşdü.
Bu prosesdə bəzi dövlətlər Azərbaycanın haqlı mövqeyini sonadək dəstəklədi. Böyük Britaniya, BƏƏ, Rusiya və Albaniya Fransanın təşəbbüsünün əleyhinə çıxış etdi.
Azərbaycan dostları ilə birgə bu parlaq qələbəni qeyd edərkən Fransa Prezident Administrasiyasının xarici siyasət-diplomatiya şöbəsi acınacaqlı məğlubiyyətin isterikasını yaşayır. Hətta Fransanın BMT yanında Daimi nümayəndəsi və onun müavininin bu rüsvayçılığa görə geri çağırılmaq məsələsi belə gündəmə gəlib.
Fransa bu addımı ilə həm də BMT-nin adını rüsvay edir. BMT TŞ-dəki dönəm sədrliyindən istifadə edərək, öz çirkin maraqlarının təmin olunmasına çalışır. Vaxtilə Azərbaycan da TŞ-yə sədrlik edib, ancaq heç vaxt öz şəxsi maraqlarının təmin olunması üçün həmin platformadan istifadə etməyib.
Belə olan təqdirdə, Fransanın BMT TŞ-nin sədrliyindən vaxtından əvvəl uzaqlaşdırılması və onun bu sayaq cəhdlərinin qarşısının alınması hansı şərtlər daxilində mümkün ola bilər?
Azərbaycan Naminə Aıyans Partiyasının sədri Abutalıb Səmədov “Bakı-Xəbər”ə bildirdi ki, Fransa BMT Təhlükəsizlik Şurasında sədrlik etdiyində əsas fəaliyyətini Azərbaycan əleyhinə qurdu: “Bu müddətdə bir neçə dəfə Azərbaycana qarşı sənədlərin qəbul olunmasına cəhd göstərdi. Demək olar ki, dekabrın son günlərinə qədər sonuncu sənədin də qəbul olmasının qarşısını Rusiya, Böyük Britaniya və Almaniya aldı. Burada bizim üçün yeni heç nə yox idi. Biz Fransanın belə mövqe tutmasına adət etmişik. Və çox təəssüf ki, təkcə Fransa deyil, bəzən ABŞ da onun yanında yer alır. Fransanı Təhlükəsizlik Şurasının sədrliyindən vaxtından əvvəl azad etmək barədə addımlar atıla bilərdimi? Təcrübədə belə bir şey yoxdur. Ən azından son illər. Çünki Təhlükəsizlik Şurasının üzvləri adətən, BMT-də qəbul olunmuş qaydaya görə, bir ay şurada sədrlik edirlər. 5 daimi üzv və 10 müvəqqəti üzv arasından ingilis əlifba sırasına görə hər ay bir dövlət Təhlükəsizlik Şurasına sədrlik edir və artıq yanvar ayının 1 - dən yeni sədr fəaliyyətə başlayıb. Yeni sədr də Yaponiyadır. Fransanın bu cəhdlərinin yanvar ayında da davam edəcəyinə şübhəmiz yoxdur. Adətən bu məsələlərin müzakirə olunmasına imkan verilir. Müzakirə mərhələsində qaldırılan məsələlərin qarşısı əksər hallarda alınmır. Ancaq sənədlərin qəbul olunmasına mane olurlar. Dekabr ayında olduğu kimi, yanvar ayında da çox güman ki, Fransanın cəhdləri davam edəcək və ona qarşı Azərbaycanın dostu olan dövlətlər, yaxud maraqları Azərbaycanın maraqları ilə üst-üstə düşən dövlətlər bu cür sənədlərin qəbul olunmasına imkan verməyəcəklər”.
Azərbaycanın uzun illər ərzində həyata keçirdiyi xarici siyasəti və diplomatiyası bu cür həyati əhəmiyyətli məsələlərdə özünü büruzə verdi. Prezident İlham Əliyevin müdrik siyasəti və qlobal təfəkkürü də burada öz rolunu oynadı.
Əminliklə deyə bilərik ki, ölkəmiz bu siyasi kursla gələcəkdə də yeni-yeni uğurlar əldə edəcək.
Azərbaycana qarşı mənfi davranışlar Fransanın beynəlxalq nüfuzuna xələl gətirdi. Bütün dünya ictimaiyyəti, BMT-yə üzv dövlətlər də Fransanın necə qərəzli və ədalətsiz olduğunu bir daha gördülər.
Məhəmmədəli QƏRİBLİ
