Azərbaycanın Qarabağ bölgəsində sülhməramlıların müvəqqəti məsuliyyət zonasında separatçılar qondarma “Rusiya Mərkəzi” açıblar. Bu barədə erməni mediası xəbər yayıb.
Qarabağdakı ermənilərin qondarma rəhbəri Arayik Arutyunyan “Rus Mərkəzi” adı altında yaradılan yeni qurumun açılışını edib. Hələ bilmək olmaz bu “mərkəz” hansı məqsədlə açılıb və kimə xidmət edəcək.
Ruslar “mərkəz”lərinin sayını 10-a çatdırmaq fikrindədirlər, Qarabağın ermənilərin məskunlaşdığı hər yerində bu cür mərkəzlər açmaq planlaşdırılır.
Açıq-aşkar görünür ki, İran Zəngəzura, Rusiya Qarabağa “meyllənib”. Rusiyaya inteqrasiya cəhdləri davam edir.
Maraqlıdır ki, Rusiya sülhməramlıları bölgəyə yerləşəndən sonra onlar maraqlı addımlar atırlar. Əvvəlcə rus kilsəsi açdılar, sonra rus icmasının yaradıldığını elan etdilər, hətta ona Rusiya xüsusi xidmət orqanlarının sabiq bir əməkdaşını rəhbər təyin etdilər. Bununla da kifayətlənməyib, Qarabağdakı bütün ermənilərə rus pasportlarının paylanacağını bəyan etdilər, indi də rus mərkəzi açırlar. Həmin ərazidə barmaqla sayılacaq qədər erməni qaldığı halda, rusların sayı nə qədər ola bilər? Təbiidir ki, yox səviyyəsində. O halda rus adı ilə bu qədər təsisatların yaradılmasına nə ehtiyac var və bununla hansı məqsədlər güdülür?
Politoliq Yeganə Hacıyeva “Bakı-Xəbər”ə açıqlamasında bildirdi ki, Qarabağdakı inzibati erməni quruluşları həmin bölgə ilə bağlı gələcək ssenarilərin fərqindədilər: “Buradan da belə nəticə çıxarırlar ki, onların separatçı planları ilə bağlı ümidverici heç nə gözlənilmir. Buna görə də, müəyyən təsisatlar yaratmağa çalışırlar. Fransa, İran, Rusiyaya bağlı layihələri ortaya atmaqla, bölgəyə kənar maraqları cəlb etməklə gələcək üçün planlar cızırlar. Bunlardan da ən birincisi Rusiyaya bsğlıdır. Məsələ burdadır ki, artıq ikinci ildir Rusiya sülhməramlıları ora yerləşib. Həmin müddətdən sonra oranı bir “russkiy mir”ə çevirməyə çalışırlar. Qarabağdakı eks rejimin qırıntıları çox böyük həvəslə frankofoniya tədbirlərinə qatılırlar. Rus icması, rus kilsəsi, rus vətəndaşı ideyalarından sonra, indi də belə mərkəz açırlar. Bu addımlar Rusiyanın himayəsində olan separatçı rejimlərlə bağlı təcrübədən keçib. Onlardan da biri Abxaziyadır. Orda da rus icması, rus kilsəsi, rus vətəndaşlığı məsələləri istiqamətində addımlar atırdılar. Daxildə Gürcüstanla münasibətlərin yaxşılaşmasını istəyən cameəyə qarşı istifadə edirdilər. Bununla Gürcüstanla Abxaziyanın bütün təmaslarını bloklayırdılar. Sonda da Abxaziyanın Rusiyaya birləşdirilməsi ssenarisi ortaya atıldı. Azərbaycan Prezidenti aydın şəkildə deyir ki, biz Qarabağdakı vətəndaşlarımızla kommunikasiyalara hazırıq. Bunlar üçün müəyyən zəminlər də formalaşıb. Vardanyan adlı iş adamı açılmış kartdı. Bu məsələdə həm də rusların böyük marağı var. Mənim fikrimcə, bu məsələdə müştərək təşəbbüslər var. Ermənilərlə yanaşı, ruslar da bunda maraqlıdır. Rusiya bununla öz gələcək maraqlarını həyata keçirmək üçün dayaq nöqtələri formalaşdırır”.
Mhəmmədəli QƏRİBLİ
