Paşinyan BMT tribunasında “tər tökdü”, amma heç kimi inandıra bilmədi

img

Ermənistanın baş naziri Nikol Paşinyanın BMT Baş Assambleyasında çıxışı və bundan sonra atılan addımar rəsmi İrəvanın hələ də sülh prosesindən uzaq qaçdığını göstərir. Paşinyan 20 dəqiqəlik çıxışında əsasən Ermənistanın Azərbaycanla münasibətlərindən danışıb və rəsmi Bakının Ermənistanda yeni ərazilər ələ keçirmək niyyətində olduğunu iddia edib. Amma yenə də buna dair sübut göstərə bilməyib.

Burada onu da xatırladaq ki, Azərbaycan prezidenti İlham Əliyev  sentyabrın 21-də Laçın şəhərində çıxışında Ermənistanın təcavüz ittihamlarını rədd edib. O, sərhəddə son toqquşmalardan danışarkən deyib ki, delimitasiya olunmadan heç kəs sərhədin haradan keçdiyini deyə bilməz. Dövlət başçısı Azərbaycanın müzakirələrə hazır olduğunu, ikitərəfli delimitasiya komissiyalarının işinə məsuliyyətlə yanaşdığını vurğulayıb. Bununla yanaşı, prezident İlham Əliyev delimitasiya üçün bütün xəritələrin toplandığını da qeyd edib: “Bütün xəritələr, o cümlədən XIX əsrə, XX əsrə, ondan əvvəlki dövrə aid olan xəritələr bizdədir və o xəritələr açıq-aydın göstərir, kim hansı torpaqda yerləşibdir”. Sadəcə, Ermənistan sülh prosesini və sərhədlərin müəyyən edilməsini uzadır. Əksinə, sərhədlərin müəyyən edilməməsi fonunda Ermənistanın təxribatlarının artması da müşahidə edilir. Bunu BMT tribunasında təkzib etməyə çalışan Paşinyan iddia edir ki, Azərbaycandan Ermənistana yeni təcavüz təhdidi azalmayıb. Halbuki, Paşinyanın bu açıqlamaları fonunda Ermənistan yenə atəşkəsi pozmağa başlayıb. Belə ki, sentyabrın 22-si saat 23:45-dən sentyabrın 23-ü saat 08:30-dək Ermənistan silahlı qüvvələrinin bölmələri Azərbaycan-Ermənistan dövlət sərhədinin Tovuzqala rayonunun Çinarlı, Basarkeçər rayonunun Yuxarı Şorca, Günəşli və Zərkənd yaşayış məntəqələri istiqamətlərində yerləşən mövqelərindən Ordumuzun Tovuz rayonunun Koxanəbi, Kəlbəcər rayonunun Keşdək və Barmaqbinə, Daşkəsən rayonunun Təzəkənd yaşayış məntəqələri istiqamətlərində yerləşən mövqelərini müxtəlif çaplı atıcı silahlardan fasilələrlə atəşə tutub. Beləliklə, Paşinyan BMT tribunasından Azərbaycanın “yeni hücumu” haqda xəbərdarlıq edir, paralel olaraq, sərhəddə erməni diversiya qrupunun sızma təxribatı da daxil olmaqla hücumlar intensivləşir. Təxribatların daha da şiddətlənəcəyi istisna deyil. Ermənistan Azərbaycanı beynəlxalq ictimaiyyətə “təcavüzkar” kimi təqdim etmək və üçtərəfli razılaşmaların icrasını arxa plana keçirmək ssenarisini davam etdirir. Beləliklə, Ermənistan hər dəfə üçtərəfli danışıqların ruhuna zidd olaraq təxribatlar törədir, revanşist cəhdlər edir. Azərbaycan ərazilərinə diversiya sızmaları etməyə cəhd göstərir, əraziləri minalamağa çalışır. Bundan başqa, İrəvan  Rusiya sülhməramlılarının müvəqqəti nəzarətində olan Azərbaycan ərazilərindəki qanunsuz silahlı dəstələrə yardımını dayandırmır.

Beynəlxalq ictimaiyyəti aldadaraq yalan və riyakar bəyanatlar verən Ermənistan hərbi siyasi rəhbərliyi informasiya təxribatını da davam etdirir. Görünən budur ki, Ermənistan sərhəddə təxribatlara davam edərkən paralel olaraq siyasi-diplomatik həmlələri də hazırlayıb və hazırda bu istiqamətdə də fəaliyyətini davam etdirməkdədir. Rəsmi İrəvan müxtəlif bəhanələrlə sülh müqaviləsinin imzalanmasında, əməkdaşlıqda, regionun sabitliyi və təhlükəsizliyinin təmin olunmasında iştirakdan qaçır. Hadisələr, İrəvan rəsmilərinin mövqeyi, bəyanatı və bəhanələri Ermənistanın regionda və dünyada təhlükəsizliyə, sabitliyə və əməkdaşlığa qarşı olduğunu təsdiqləyir. Ermənistanın Tavus bölgəsindəki yeparxiyasının rəhbəri Baqrat Srbazan Qalstanyan bu vəziyyətdə uduzan yeganə tərəfin ölkəsi olacağını bildirir: “Bizim faciəmiz odur ki, biz həmişə gözümüzü kənar yardıma və ya xarici qüvvələrə dikmişik.
 Ermənistan xarici qüvvələrə güvənməməlidir. Onlar bizimlə nə qədər dost olmaq istəsələr də, təcrübə göstərdi ki, dünən dost olanlar bu gün düşmənə çevrilir, ertəsi gün yenə dost olacaqlar. Boynunu büküb kiminsə imdadına çatmasını gözləmək doğru deyil. Heç kim köməyə gəlməyəcək. Tariximiz göstərir ki, biz daim seçim etmək məcburiyyətindəyik: Şərq və ya Qərb, Şimal və ya Cənub? İstənilən oriyentasiyanı seçəndə uğursuzluğumuz ardınca gəlir. Təbii ki, dünyada təsir dairələri yaradan, böyük təsir gücünə malik böyük qüvvələr var, amma önəmli olan budur ki, sən nəyi və necə diqtə edirsən, millətini necə səfərbər edirsən, daxili gücün bütün vasitələrindən necə istifadə etməyi bacarırsan. Biz isə hər şeyi qoyub kiminsə qapısına düşdük, yalvardıq: KTMT, gəl kömək et, Rusiya, Amerika, gəl kömək et. Bəlkə sabah Türkiyəyə deyəcəklər ki, gəl kömək et, ya da Azərbaycana. Bu istisna deyil”. Qalstanyan bildirib ki, başqalarına güvənib Azərbaycanla savaş etmək Ermənistana baha başa gəlir. Bu səbəbdən mütləq sülhə getmək lazımdır. Onu da qeyd edək ki, Paşinyan 2020-ci ildə 44 günlük müharibədən öncə BMT Baş Assambleyasında çıxışında Qarabağın öz statusunu məhdudiyyətsiz müəyyənləşdirmək imkanının vacibliyindən danışmışdı. Amma sentyabrın 22-də etdiyi çıxışda bundan danışmayıb, müqəddəratı təyinetmənin isə heç adını çəkməyib.

Samirə SƏFƏROVA

Peşə etikası

Son xəbərlər