Paris Azərbaycanda saxlanılan Fransa vətəndaşlarının azad edilməsini təmin etmək ümidi ilə rusiyalı-özbək əsilli biznesmen Əlişir Usmanovun sanksiya siyahısından çıxarılmasına çalışır.
Bu barədə Euronews danışıqlardan xəbərdar olan bir sıra rəsmi şəxslərin və diplomatların məlumatına istinadən yazır. Bildirilir ki, Fransanın bu mövqeyi Brüsseldə Rusiyaya qarşı tətbiq edilən Aİ sanksiyalarının müddətinin uzadılması ilə bağlı səyləri çətinləşdirib. Sözügedən sanksiyalar Rusiyanın Ukraynaya qarşı genişmiqyaslı işğalını dəstəkləməkdə ittiham olunan təxminən 3000 fiziki və hüquqi şəxsə şamil edilir və onların qüvvədə olma müddəti bu ay başa çatır. Yaranmış çıxılmaz vəziyyət isə, ilkin olaraq, Slovakiyanın mövqeyindən qaynaqlanıb; bu ölkə uzun müddətdir ki, özünün bildiyi səbəblərdən dolayı Usmanovun sanksiya siyahısından çıxarılmasını tələb edir.
Bazar ertəsi Aİ-yə üzv ölkələrin səfirləri sanksiyaların müddətini daha bir həftə - 22 sentyabra qədər uzatmaq barədə razılığa gəliblər. Bu addım üzv dövlətlərə kompromis əldə etmək üçün əlavə vaxt qazandırır. Razılıq əldə olunmasa, sözügedən bütün Rusiya vətəndaşları siyahıdan çıxarılacaq ki, bu da vəziyyətin təcili həllini tələb edir. Yəni Rusiya Ukraynada müharibə apardığı və Avropada hibrid hücumlarla bağlı narahatlıqların mövcud olduğu bir vaxtda üzv dövlətlərin əksəriyyəti sanksiya siyahısından hər hansı şəxsin çıxarılmasının əleyhinədir.
Bununla belə, bəzi rəsmi şəxslər etiraf edirlər ki, Fransa milli təhlükəsizliklə bağlı narahatlıqları əsas gətirir – bu, adətən xüsusilə həssas məsələlərdə istifadə olunan bir arqumentdir. Fransa hökuməti vəziyyətlə bağlı şərh verməkdən imtina edib. Buna baxmayaraq, sanksiya siyahısından hər hansı rusiyalının çıxarılmasına cəhd diplomatlar arasında narazılıq yaradıb.
Maraqlıdır ki, bütün bunlara rəğmən, Fransa Rusiyaya qarşı sanksiyaların tətbiqində Aİ-nin ən ardıcıl tərəfdarlarından biri olaraq qaldığını vurğulayır.
İş adamı Əlişir Usmanov Rusiyanın Ukraynaya qarşı genişmiqyaslı işğalının ilk günlərində Aİ-nin sanksiya siyahısına daxil edilib. Aİ Şurası buna səbəb kimi onun Rusiya Prezidenti Vladimir Putinlə "sıx əlaqələrini" və Rusiya iqtisadiyyatının "əsas sektorlarında" maraqlarının olmasını göstərib. Usmanov özü bu ittihamları rədd edir və adının siyahıdan çıxarılmasına israrla çalışır.
Slovakiya da uzun müddətdir ki, Usmanovun və digər rusiyalı iş adamı Mixail Fridmanın sanksiya siyahısından çıxarılmasını tələb edir. Aİ-nin digər ölkələri isə bu tələbi siyasi xarakterli hesab edərək indiyədək rədd ediblər.
Bu ilin əvvəlində aparılan araşdırma zamanı isə Türkiyə Prezidenti Rəcəb Tayyib Ərdoğanın Slovakiya Baş naziri Robert Fitsoya ünvanladığı iki səhifəlik məktub üzə çıxıb; həmin məktubda Ərdoğan Usmanovla bağlı "ədalətsiz təcrübə" adlandırdığı vəziyyətə son qoyulması üçün kömək istəyir...
Burada diqqət çəkən əsas məqam bu məsələdə Azərbaycanın adının hallanmasıdır. Sayı açıqlanmayan Fransa vətəndaşlarının Azərbaycanda həbsi, bəlli məsələdir ki, onların Azərbaycan qanunvericiliyinə uymayan fəaliyyətləri (casusluq) ilə bağlı olub və onlar layıq olduqları cəzanı alıblar. Rusiya vətəndaşı Əlişir Usmanov isə azərbaycanlı deyil, özbək əsillidir. Hərçənd, azərbaycanlı olsaydı belə, bu, casusluqda ittiham olunan iki fransız məhkumun onun sanksiya siyahısından çıxarılmasına qarşılıq sərbəst buraxıla biləcəyinə zəmanət vermirdi.
Elə isə, Fransa hansı arqument(sizliy)ə söykənərək Azərbaycanı bu məsələyə daxil etmək istəyir?..
SAMİRƏ
