Türk dövlətləri üçün ortaq inkişaf bankı yaradıla bilər. "APA-Economics" xəbər verir ki, bunu Bakıda keçirilən Türk Dövlətləri Təşkilatının aparıcı milli analitik mərkəzlərinin II Beynəlxalq Konfransında Türkiyənin Ədalət və İnkişaf Partiyasının (AK Parti) sədr müavini, Ankara millət vəkili Kürşad Zorlu bildirib.
O qeyd edib ki, Türk İnvestisiya Fondu fəaliyyətini davam etdirir və artıq əhəmiyyətli həcmdə büdcə formalaşdırıb.
K.Zorlu bildirib ki, türk dünyasının maliyyə sahəsində qlobal miqyasda daha güclü mövqe qazanması üçün növbəti mühüm layihə ortaq inkişaf bankının yaradılması ola bilər.
“Biz Türkiyə olaraq bu istiqamətdə iş hazırlamışıq. Hazırladığımız sənədi digər türk dövlətlərinin dillərinə tərcümə etmişik və Türk Dövlətləri Təşkilatının Baş katibliyinə təqdim edəcəyik”, – deyə o vurğulayıb.
Onun sözlərinə görə, belə bir maliyyə qurumu mövcud büdcə imkanlarından istifadə etməklə yanaşı, yeni maliyyə imkanları yaratmağa, xüsusilə Orta Dəhlizin inkişafında iş adamlarına kredit və dəstək mexanizmləri təqdim etməyə imkan verəcək.
K.Zorlu həmçinin qeyd edib ki, türk dünyasının ortaq əlifba istiqamətində əməkdaşlığı da mühüm əhəmiyyət daşıyır.
O bildirib ki, Özbəkistan 34 hərfdən ibarət ortaq əlifba ilə uyğunlaşdırılan yeni dəyişiklik prosesinə başlayıb.
K.Zorlu əlavə edib ki, Türkiyə Orta Dəhlizi yalnız nəqliyyat marşrutu kimi deyil, daha geniş iqtisadi imkanlar yaradan platforma kimi qiymətləndirir.
Kürşad Zorlu "APA-Economics"ə açıqlamasında bildirib ki, türk dünyası üçün yaradılacaq İnkişaf Bankına ilkin olaraq 1 mlrd dollar kapital nəzərdə tutulur. O qeyd edib ki, Türk dünyası üçün ortaq İnkişaf Bankının yaradılması üzərində iş aparılır.
“Bu, yalnız Türkiyə ilə bağlı deyil. Məqsədimiz digər türk dövlətləri ilə birlikdə ortaq bank qurmaqdır. Hazırda bununla bağlı layihə üzərində çalışırıq. Hazırlıqlar tamamlandıqdan sonra digər dövlətlərlə müzakirələr aparacağıq”, – deyə K.Zorlu bildirib.
Onun sözlərinə görə, bu qərar son nəticədə türk dövlətlərinin liderləri səviyyəsində qəbul ediləcək.
K.Zorlu bildirib ki, Dünya Bankı, Beynəlxalq Valyuta Fondu, Avropa Yenidənqurma və İnkişaf Bankı və İslam İnkişaf Bankı kimi qlobal və regional maliyyə institutları mövcuddur:
“Biz də Türk dünyasında bir İnkişaf Bankı yaradaraq böyükmiqyaslı layihələri həyata keçirmək imkanına malik ola bilərik”.
O qeyd edib ki, Türkiyənin hazırladığı ilkin layihədə bankın başlanğıc kapitalı üçün ən azı 1 mlrd ABŞ dolları həcmində öz kapitalı nəzərdə tutulur.
K.Zorlu bildirib ki, kapitalın bölüşdürülməsi ilə bağlı müxtəlif variantlar müzakirə oluna bilər.
“Bunu əhali sayı, milli gəlir və digər meyarlar əsasında müəyyən etmək mümkündür. Bundan əlavə, bu banka yalnız dövlətlər deyil, özünü təsdiqləmiş beynəlxalq maliyyə qurumları və Türk İnvestisiya Fondu da tərəfdaş ola bilər”, – deyə o vurğulayıb.
Kürşad Zorlu əlavə edib ki, belə bir bankın yaradılması türk dövlətləri arasında ortaq və inteqrasiya olunmuş ödəniş sisteminin formalaşdırılması üçün də mühüm baza yarada bilər.
“Əgər bu bankı birlikdə qura bilsək, öz milli valyutalarımızla ticarəti daha güclü platforma üzərindən həyata keçirmək və valyutalarımızın regionda daha geniş istifadəsini təmin etmək imkanımız olacaq”, – deyə o qeyd edib.
