Akif Nəsirli: “Bu sazişin əhəmiyyəti ondan ibarətdir ki, Naxçıvanın mineral-xammal potensialının daha geniş miqyasda və müasir texnologiyalarla araşdırılmasına xarici tərəfdaş cəlb olunur”
“AzerGold" QSC Naxçıvan Muxtar Respublikasının mineral-xammal potensialının öyrənilməsi və perspektivli faydalı qazıntı yataqlarının müəyyənləşdirilməsi məqsədilə Birləşmiş Ərəb Əmirliklərinin International Resources Holding (IRH) şirkəti ilə əməkdaşlıq edəcək.
Əməkdaşlıq çərçivəsində Naxçıvan ərazisində, ilk növbədə, strateji əhəmiyyət daşıyan və iri miqyaslı kritik metal perspektivlərinin müəyyənləşdirilməsi və qiymətləndirilməsi istiqamətində birgə geoloji kəşfiyyat işlərinin aparılması nəzərdə tutulur.
Bu məqsədlə "AzerGold" QSC IRH-in törəmə şirkəti "Terra Mining Ltd" arasında "Azərbaycan Respublikasının Naxçıvan Muxtar Respublikası ərazisində mineral-xammal potensialının və mədən sahələrinin birgə qiymətləndirilməsi və kəşfiyyatı haqqında Saziş" imzalanıb.
Sənəd 14 sentyabr 2026-cı il tarixində Azərbaycan Prezidenti İlham Əliyevin və Əbu-Dabi Əmirliyi hakiminin müavini, milli təhlükəsizlik müşaviri cənab Şeyx Tahnun bin Zayed Al Nəhyanın iştirakı ilə iki ölkə arasında bir sıra mühüm sənədlərin imzalanması mərasimi zamanı rəsmiləşdirilib. Sazişi "AzerGold" QSC-nin İdarə Heyətinin sədri Zakir İbrahimov və IRH-in Baş icraçı direktoru Əli Rəşid Əl-Rəşdi imzalayıblar.
Bu müqavilənin imzalanmasının iqtisadi və digər yönlərdə əhəmiyyəti nədir?
Ekdspertlər qeyd edir ki, “AzerGold” QSC ilə “Terra Mining Ltd” arasında imzalanmış saziş Naxçıvan Muxtar Respublikasının mineral-xammal potensialının müasir beynəlxalq standartlara uyğun şəkildə öyrənilməsinə və ölkə iqtisadiyyatına xarici investisiyaların cəlb olunmasına xidmət edir. Naxçıvan ərazisində strateji əhəmiyyət daşıyan kritik metalların və faydalı qazıntı yataqlarının müəyyənləşdirilməsi və qiymətləndirilməsi istiqamətində birgə geoloji tədqiqatlar aparılacaq.
Birləşmiş Ərəb Əmirliklərinin mədən aktivlərinin idarə edilməsi sahəsində qabaqcıl təcrübəyə malik International Resources Holding (IRH) şirkətinin törəmə qurumu olan “Terra Mining Ltd”nin texniki və maliyyə imkanları “AzerGold” QSC təcrübəsi ilə birləşdirilir.
İşlər ilkin geoloji məlumatların təhlili ilə başlayır, müsbət nəticə olacağı təqdirdə dəqiq kəşfiyyat və gələcəkdə birgə hasilat imkanlarının müzakirəsi ilə davam edəcək. Layihənin uğurlu icrası Naxçıvanda yeni investisiya mühitinin yaranmasına, mədən sənayesində əlavə dəyərin formalaşmasına, yeni iş yerlərinin açılmasına və qeyri-neft sektorunun inkişafına əlavə töhfə verəcək.
Liberal İqtisadçılar Birliyinin rəhbəri Akif Nəsirli baki-xeber.com-a bildirdi ki, bu sazişin imzalanması böyük əhəmiyyətə malikdir: “Bu sazişin əhəmiyyəti ondan ibarətdir ki, Naxçıvanın mineral-xammal potensialının daha geniş miqyasda və müasir texnologiyalarla araşdırılmasına xarici tərəfdaş cəlb olunur. Saziş “AzerGold” ilə BƏƏ-nin “Terra Mining Ltd” şirkəti arasında Naxçıvanda mineral-xammal potensialının və mədən sahələrinin birgə qiymətləndirilməsi və kəşfiyyatını nəzərdə tutur.
Burada əsas məsələ hazırda qızıl hasilatından əldə olunacaq gəlirdən daha çox, yeni ehtiyatların aşkar edilməsi və onların iqtisadi dövriyyəyə cəlb olunmasıdır. Naxçıvanda artıq Ortakənd qızıl yatağında 424 min unsiya təsdiqlənmiş ehtiyat, Başkənd və Göydağ sahələrində isə ümumilikdə təxminən 173 min ton mis ehtiyatı hesablanıb. Yeni kəşfiyyat bu potensialın daha da genişlənməsinə imkan yarada bilər”.
A.Nəsirilinin fikrincə, iqtisadi baxımdan bu, Azərbaycanın qeyri-neft sektorunun şaxələndirilməsi, mədən sənayesinə xarici investisiya və texnologiyanın cəlb edilməsi, gələcəkdə ixrac və büdcə gəlirlərinin artırılması baxımından əhəmiyyətlidir. “Əgər kəşfiyyat nəticəsində kommersiya baxımından rentabelli yataqlar müəyyən edilərsə, Naxçıvanda yeni mədən və emal müəssisələrinin yaradılması, məşğulluğun artması və yerli iqtisadi fəallığın canlanması mümkündür.
Digər tərəfdən, BƏƏ kimi maliyyə və investisiya imkanları geniş olan ölkə ilə dağ-mədən sahəsində əməkdaşlığın qurulması Azərbaycanın mineral ehtiyatlarının beynəlxalq kapital üçün də cəlbedici olduğunu göstərir. Bununla yanaşı, əsas nəticə yalnız yataqların tapılması deyil, həmin ehtiyatların ekoloji tələblərə uyğun, yüksək əlavə dəyər yaradan emal zənciri ilə ölkə daxilində iqtisadi dövriyyəyə gətirilməsindən asılı olacaq”-deyə A.Nəsirli qeyd etdi.
İradə SARIYEVA
