Prezident İlham Əliyev islamofobiyanın İslam dünyasına qarşı aparılan daha geniş, elan olunmamış müharibənin tərkib hissəsi olduğunu bildirib. O, müsəlmanların terrorla eyniləşdirilməsini, İslam dəyərlərinə və Qurani-Kərimə qarşı təhqirləri məqsədyönlü siyasət kimi qiymətləndirib və buna qarşı İslam dünyasının birliyinin vacibliyini vurğulayıb.
Prezident İlham Əliyevin İslam dünyasına qarşı elan olunmamış müharibə və islamofobiyanın bunun tərkib hissəsi olması ilə bağlı açıqlaması fonunda islamofobiyanın artmasının əsas səbəbləri nələrdir və müsəlman ölkələri buna qarşı hansı real addımları ata bilər?
Zeynal Əmrəliyev: "İslam ölkələri arasında əməkdaşlıq gücləndirilməlidir"
Politoloq Zeynal Əmrəliyev "Bakı-Xəbər"ə açıqlamasında bildirib ki, islamofobiyaya qarşı mübarizədə müsəlman ölkələri arasında əməkdaşlığın gücləndirilməsi və ortaq dialoqun aparılması mühüm əhəmiyyət daşıyır.
Onun sözlərinə görə, son dövrlərdə Qərbin bəzi dairələrində islamofob meyllər güclənib və terrorun İslam dini ilə əlaqələndirilməsi cəhdləri müşahidə olunur. Politoloq bunun qəbuledilməz olduğunu vurğulayaraq qeyd edib ki, İslamın əsas prinsipləri sülh, əminamanlıq və insanlara hörmət üzərində qurulub.
Zeynal Əmrəliyev bildirib ki, əhalisinin əksəriyyəti müsəlman olan Azərbaycan üçün islamofobiyanın istənilən təzahürü xüsusi həssaslıq doğurur. Onun sözlərinə görə, Azərbaycan özü də uzun illər bu məsələnin müxtəlif təzahürləri ilə üzləşib.
"Azərbaycan torpaqları işğal altında olduğu dövrdə Qarabağda məscidlərin dağıdılması, dini abidələrin xarabalığa çevrilməsi və İslam irsinə qarşı törədilən vandalizm aktları xalqımızın milli-mənəvi dəyərlərinə qarşı yönəlmiş hərəkətlər idi. Bu cür faktlar qəbuledilməzdir", – deyə politoloq bildirib.
O qeyd edib ki, İslam peyğəmbərinə qarşı təhqiramiz davranışlar, İslam dininə və müsəlmanların müqəddəs dəyərlərinə qarşı təhqir və ittihamlar cəmiyyətdə ciddi narazılıq yaradır. Politoloqun fikrincə, bu cür halların qarşısının alınması üçün yalnız ayrı-ayrı ölkələrin deyil, bütün İslam dünyasının koordinasiyalı mövqe nümayiş etdirməsi vacibdir.
Zeynal Əmrəliyev Prezident İlham Əliyevin Bakıda keçirilən beynəlxalq tədbirdə islamofobiya ilə bağlı səsləndirdiyi fikirlərə də toxunub. O bildirib ki, Azərbaycan rəhbərliyinin bu məsələ ilə bağlı mövqeyi ölkənin milli-mənəvi dəyərlərə və İslam həmrəyliyinə verdiyi əhəmiyyəti göstərir.
Politoloqun sözlərinə görə, İslam ölkələri arasında əməkdaşlığın gücləndirilməsi və bu istiqamətdə ortaq qərarların qəbul edilməsi üçün İslam Əməkdaşlıq Təşkilatının imkanlarından daha fəal istifadə olunmalıdır.
"İslam ölkələri arasında əməkdaşlıq gücləndirilməlidir. İslam Əməkdaşlıq Təşkilatı çərçivəsində daha sıx dialoqun aparılmasına, islamofobiyaya qarşı birgə mövqenin formalaşdırılmasına və konkret qərarların qəbul edilməsinə ciddi ehtiyac var. Azərbaycan da uzun müddətdir bu istiqamətdə əməkdaşlığın genişləndirilməsini dəstəkləyir", – deyə Zeynal Əmrəliyev vurğulayıb.
Akif NƏSİRLİ
