Naxçıvan Muxtar Respublikasında Azərbaycanın qalan əraziləri ilə müqayisədə ümumi daxili məhsul daha çox artıb, amma inflyasiya da yüksəkdir, əvəzində orta aylıq nominal əməkhaqqı da azdır. Naxçıvan MR Dövlət Statistika Komitəsinin açıqlanan son aylıq hesabatının təhlili bu nəticəni ortaya çıxarıb. 2026-cı ilin yanvar-avqust aylarında Naxçıvan Muxtar Respublikasında 1 milyard 172 milyon 999,3 min manatlıq ümumi daxili məhsul istehsal olunub. Hesabata görə, bu ilin avqustunda ötən ilin eyni ayı ilə müqayisədə Naxçıvan Muxtar Respublikasında ÜDM 2.2 faiz artıb. Bütünlükdə Azərbaycanda bu artım həmin dövrdə 1.2 faiz olub. Əvəzində muxtar respublikada inflyasiya 9.1 faizə yüksəlib. Bütünlükdə Azərbaycanda isə bu rəqəm 5.7 faiz təşkil edib.
Naxçıvanda orta aylıq əməkhaqqının həcmi isə azdır. İyulun sonunda bu, 869.4 manat olub. Bütünlükdə Azərbaycanda isə həmin ay orta aylıq əməkhaqqı 1176.7 manata yüksəlib. Son rəsmi məlumatlara görə, Naxçıvan Muxtar Respublikasında 473 mindən çox əhali var. 1 avqust 2026-cı il tarixə muxtar respublikada əhalinin sayı 2025-ci ilin müvafiq dövrünə nisbətən 1235 nəfər və ya 0,3 faiz artaraq 473 146 nəfər olub. 2026-cı ilin yanvar-avqust aylarında Naxçıvan Muxtar Respublikasında 365 milyon 829,9 min manatlıq sənaye məhsulu istehsal edilib ki, bu da 2025-ci ilin müvafiq dövründəki göstəricidən 4,5 faiz çoxdur. Ümumi sənaye məhsulunun 0,2 faizi mədənçıxarma, 83,1 faizi emal, 15 faizi elektrik enerjisi, qaz və buxar istehsalı, bölüşdürülməsi və təchizatı, 1,7 faizi isə su təchizatı, tullantıların təmizlənməsi və emalı sektorlarında istehsal olunub. 2025-ci ilin sonunda muxtar respublikada rəsmi işsiz statusunda qeydiyyata alınan şəxslərin sayı 14 min 504 nəfərə çatıb. Amma yerli sakinlər deyir ki, Naxçıvan Muxtar Respublikasında real işsizlər daha çoxdur.
Samirə SƏFƏROVA
