Əpoş Vəliyev: “Məmurun övladının bahalı toy etməsi öz-özlüyündə dövlətin, hökumətin məsuliyyəti deyil”
İlqar Hüseynli: “Bir dövlət məmurunun övladının toyuna milyonlarla vəsait xərclənirsə sözsüz ki, burada korrupsiya faktoru var”
Bakıda yerləşən Böyük Sarayda baş tutan dəbdəbəli, bahalı toyla bağlı müzakirələr səngimir, əksinə daha da qızışır. Nicat və Sitarə adlı cütlüyün toy məclisinə Azərbaycan və Türkiyədən məşhurlar da qatılıb. Məlum olub ki, Nicat adlı bəylə ailə həyatı quran xanım Dövlət Əmək Müfəttişliyi Xidmətinin Bakı şəhər İdarəsinin rəis müavini Elgün Feyzullayevin qızıdır.
Sitarə xanım özü isə Azərbaycan Respublikası Dövlət Neft Şirkətinin (SOCAR) Dubay şəhərindəki SOCAR International DMCC-də (Dubai Multi Commodities) ticarət üzrə analitik vəzifəsində çalışır.
Qeyd edək ki, Dövlət Əmək Müfəttişliyi Xidmətindən mətbuata E. Feyzullayevin 1 ildən çoxdur ki, vəzifədən azad olunduğu bildirilsə də, bu dəqiqələrə qədər onun adı qurumun saytında görünürdü. Xəbər yayılandan sonra isə onun adı və vəzifəsi saytdan çıxarılıb.
Məlumata görə, Sitarə adlı xanımla evlənən Nicat Qurbanov Dövlət Gömrük Komitəsinin (DGK) sabiq idarə rəisi Nüsrət Qurbanovun oğludur.
İki məmur (sabiq) övladlarına bahalı toy edir, milyonlarla pul xərcləyir, maraqlıdır ki, ittihamlar onlara yox, hökumətə qarşı yönəlir. Bu qəribə deyilmi? İki məmur övladına 100 milyonlarla pul xərcləyib toy edirsə burada hökumət niyə hədəfə alınır? Bu nə dərəcədə doğrudur?
Filologiya üzrə fəlsəfə doktoru Əpoş Vəliyev baki-xeber.com-a bildirdi ki, burada məsələyə emosiyadan yox, məntiqlə yanaşmaq lazımdır.
“Əgər iki məmur övladına həqiqətən yüz milyonlarla vəsait hesabına toy edibsə, ilk sual “hökumət niyə hədəfə alınır?” yox, bu qədər böyük sərvətin mənbəyi nədir? olmalıdır.
Məmurun övladının bahalı toy etməsi öz-özlüyündə dövlətin, hökumətin məsuliyyəti deyil. Əgər həmin pul qanuni şəxsi vəsaitdirsə, insanın öz qazancı ilə necə yaşaması ayrıca məsələdir. Amma söhbət dövlət vəzifəsi daşıyan şəxslərdən gedirsə və nümayiş etdirilən həyat tərzi onların rəsmi gəlirləri ilə açıq-aşkar uyğun gəlmirsə, cəmiyyətin sual verməsi tamamilə təbiidir.
Hökumətin hədəfə alınması da burada avtomatik olaraq yanlış deyil. Çünki məmur dövlət adından səlahiyyət həyata keçirir. Əgər qanunsuz varlanma, korrupsiya və ya dövlət resurslarından şəxsi məqsədlər üçün istifadə şübhəsi varsa, bunun araşdırılması dövlət institutlarının və hüquq-mühafizə orqanlarının işidir.
Amma bir məqam da vacibdir: şayiə və görüntü ilə hökm çıxarmaq olmaz. “100 milyon xərcləyib”, “bu pul dövlətindir” kimi iddialar sənədlə, maliyyə məlumatları ilə və hüquqi araşdırma ilə təsdiqlənməlidir.
Yəni məsələni nə məmurları avtomatik müdafiə etməklə, nə də dövləti avtomatik günahlandırmaqla həll etmək olar. Əsas sual çox sadədir: bu sərvətin mənbəyi nədir, gəlirlər rəsmidirmi və həmin pulların dövlət vəsaiti ilə hər hansı əlaqəsi varmı?
Bu suallara şəffaf və sənədlə cavab verilirsə, mübahisə də bitər. Verilmirsə, cəmiyyətin şübhələnməsi tamamilə başadüşüləndir.
Hər bir halda belə təmtəraqlı toyun, o toya çox böyük məbləğdə çəkilən xərcin mənbəyi, haradan qazanıldığı göstərilməlidir”-deyə Ə.Vəliyev qeyd etdi.
Sosial sahə üzrə ekspert İlqar Hüseynlinin məsələyə münasibəti belə oldu: “Məmurların dəbdəbəli, bahalı həyat tərzi, mülkləri, avtomobil kolleksiyaları, övladlarının 2 milyonluq saat taxması ilə bağlı çox danışılır. Bahalı maşın kolleksiyası olan nazirlər, nazir müavinləri barədə çox deyilir, faktlar səsləndirilir. Tutalım, dövlətin səhmlərinin sahibi olduğu bir səhmdar cəmiyyətin sədri dövlət vəsaiti hesabına Türkiyədə, digər xarici ölkələrdə bahalı mülklərə sahib olurlar. Bunlar dövlət büdcəsindən oğurluq hesabına həyata keçirilir. Dövlət qurumunda çalışan bir idarə rəsinin bu boyda məsrəflər edib övladına təmtəraqlı toy etməsi təbii ki, diqqət mərkəzində olacaq. Niyə hökumət hədəf seçilir? Çünki o məmurlar dövlətin pulunu oğurlayırlar. Dövlətin də başında dayanan güc strukturları bu məsələlərə reaksiya verməlidirlər ki, bu qədər vəsait hardandır, necə əldə olunub? Dövlət vəsaitlərinin böyük bir hissəsini bu məmurlar mənimsəyiblər. Bir də görürsən ki, elə bir məmurun övladı dövlət vəsaiti ilə həyata keçirilən tenderlərdə iştirak edib onun qalibi olurlar. Ancaq baxırsan ki, yaratdıqları şirkətin heç bir illik fəaliyyəti yoxdur. Bunlar hamısı korrupsiya mexanizmi, korrupsiya əməlləri hesabına olan varlanmalardır. Bu gün ictimaiyyəti, vətəndaşı, Azərbaycanın sadə həyat tərzi yaşayan və çox çətinliklər yaşayan insanlarını düşündürən budur ki, bu məmurlar bu qədər vəsaiti haradan alır? Dövlət məmuru var ki, bəlkə də bir neçə milyardlıq biznesi var, Bakı şəhərinin içində hektarlarla ərazini zəbt edib özlərinə biznes imperiyası qurublar. Bunlar haradan, nə ilə varlandılar? Bunlart dövlət məmurlarıdır. Bunun hesabı sorulmadığı üçün bu məsələlər özünü göstərir. Bu halda ittihamlar dövlətin idarəedicilərinə yönəlir. Təbii ki, bunun qarşısı alınmalıdır. Biznes adamları var ki, halal yolla qazandığı pulun müəyyən hissəsini övladının toyuna xərcləyə bilər. Bu başa düşüləndir.
Bir dövlət məmurunun övladının toyuna milyonlarla vəsait xərclənirsə sözsüz ki, burada korrupsiya faktoru var. Çünki o əməkhaqqı ilə bu qədər dəbdəbəli toy etmək mümkün deyil”.
Leyla QARAXANLI
