Sabir Şahtaxtı: "Bu bir tərəfdən ölkədə ictimai rəyi öyrənməyə, digər tərəfdən isə geniş mənada "status"un mümkünsüzlüyünə işarədir"
MHP lideri Dövlət Baxçalı terrorçu Abdullah Öcalan üçün İmralı adasında bağçası olan rahat bir ev tikildiyini, lakin Öcalanın köçməkdən imtina etdiyini bildirib. Bunu jurnalist Nagehan Alçı iki gün əvvəl Ankaradakı MHP qərargahında MHP sədri Dövlət Baxçalı ilə görüşdən sonra açıqlayıb.
Alçı bildirib ki, terrorçu lideri Abdullah Öcalan və davam edən prosesləri müzakirə edərkən Baxçalıdan ictimaiyyət arasında yayılan "İmralı adasında villa tikilir" iddiası ilə bağlı soruşub. Alçının sözlərinə görə, Baxçalı ona bu məsələ ilə bağlı dəqiq cavab verib.
Onun sözlərinə görə, MHP lideri "İmralı adasında Abdullah Öcalan üçün bir ev tikilib. Bu evin qarşısında bağ və insani yaşayış üçün hər cür şəraiti var. O, həmin evdə normal həyatın axınına uyğun şəkildə yaşaya bilər. Rahat bir ev tikilib" deyib.
Öcalan üçün tikilmiş villah haqqında təfərrüatları paylaşan Alçı deyib: "Cənab Baxçalının qeyd etdiyi ev həbsxana ərazisində yerləşir. Qarşısında bağ sahəsi var, amma bu vacibdir: Anladığım qədəri ilə, ətrafında divarlar olan tikilinin içindəki bağ da divarlarla əhatə olunub. Bağçanın bir hissəsi torpaq, bir hissəsi isə betondur. Torpaq hissəsi əkin və becərmə üçün, beton hissəsi isə başa düşdüyüm qədəri ilə idman üçündür. İçəridə iki mərtəbəli bir tikili var: alt mərtəbə iş sahəsi (ofis kimi), üst mərtəbə isə yaşayış sahəsi kimi planlaşdırılıb".
Baxçalı Öcalanın evə getməkdən imtina etməsini isə belə izah edib: "Amma o, buraya köçməkdən imtina edir. Çünki status istəyir. Çərçivə sənədinin tətbiqini və qaydalar işə düşdükdən sonra evə getmək istəyir".
"Öyrəndiyim bəzi əlavə detallar var", deyən Alçı Öcalanın müəyyən istəklərinin olduğunu da deyib: "O deyir ki, "Mən müəyyən bir yaşa çatmışam. Mən bu evdə təkbaşına yaşaya bilmərəm, idarə edə bilmərəm. Tək qalmaq da istəmirəm". O, yaxın çevrəsindən və qohumlarından bir neçə nəfərin onunla birlikdə qalmasını istədiyini öyrəndim. Hətta bir qohumu üçün müraciət edildiyini eşitdim, bu, da aldığım məlumatlar arasındadır".
Alçı həmçinin bildirib ki, görüş zamanı əldə etdiyi bu məlumatın ictimaiyyətlə paylaşıb-paylaşa bilməyəcəyini Baxçalıdan soruşub. Alçı Baxçalının bu məlumatın paylaşılmasına icazə verdiyini qeyd edərək deyib: "Düzünü desəm, bu, çox təəccüblü məlumatdır. Cənab Baxçalıdan soruşdum ki, "Bunu ictimaiyyətlə paylaşa bilərəmmi?" O, dedi ki, "Qərar sizindir; mənim üçün heç bir problem yoxdur. Paylaşa bilərsiniz".
Qeyd edək ki, bundan əvvəl Türkiyənin ədliyyə naziri Akın Gürlek "İmralı adasında Öcalana villa tikilməsi" iddialarını təkzib edərək beləbir şeyin olmadığını demişdi.
Məlumdur ki, Abdullah Öcalan PKK terror təşkilatının qurucusu və lideridir, Türkiyə və digər ölkələrdə törədilən terror aktları, o cümlədən dinc sakinlərin və uşaqların ölümünə səbəb olan qətliamlara görə rəsmi səviyyədə və cəmiyyətdə "uşaq qatili" (və ya "bebek katili") kimi tanınır.
Baxçalı deyir ki, Öcalan status istəyir. Öcalan nə status istəyə bilər?
Ona tikilən evdən imtina başqa bir məsələdir, hansısa status istəməsi başqa. Ona nə status verilə və o, nə status istəyə bilər? Yaxud Öcalana statusun verilməsi Türkiyədə daxili siyasətə nə kimi təsir göstərəcək?
Siyasi analitik, yazıçı-publisist Sabir Şahtaxtı baki-xeber.com-a bildirdi ki, Türkiyədə geniş ictimaiyyət tərəfindən Bəbək Qatili kimi tanınan və qəbul edilən Abdullah Öcalana münasibət strateji və taktiki xarakter daşıyır. "Belə ki, Türkiyənin siyasi elitası üçün strateji yanaşma, artıq 77 yaşını haqlamaqda olan PKK terror təşkilatı liderinin gələcəkdə baş verəcək təbii ölümünə hansı münasibət göstəriləcək? Onun nəşi harada və hansı şəraitdə dəfn olunacaq və sairdən ibarətdir. Mahiyyətcə İmralı sakini həbsxanada şəraitli həyat yaşayır. Bundan sonra onun adada malikanədə, yaxud mənzildə yaşayacağı heç nəyi dəyişmir".
S.Şahtaxtı "zənnimcə, "Terrorsuz Türkiyə" təşəbbüsü çərçivəsində davam edən proseslərdə "status" iddiasının ortaya çıxması məhz Öcalan və onun tərəfdarlarının PKK üçün gələcəkdə ziyarətgah axtarışı ilə birbaşa bağlıdır. Türkiyədə sabitliyin pozulmasında maraqlı olan bütün tərəflər yaxşı bilirlər ki, gələcəkdə Abdullah Öcalanın məzarı PKK və onun tərəfdarları üçün həyati əhəmiyyət daşıyır. Heç şübhəsiz ki, bu məsələdə zəngin dövlətçilik ənənələri olan Türkiyənin məxfi planı mövcuddur. Əks halda, Türkiyənin bütövlüyü ciddi risklər altına düşə bilər.
Məsələyə taktik yanaşma isə hər zaman olduğu kimi Türkiyədə keçiriləcək növbəti seçkilərə hesablanıb.
Həm AK Parti, həm də MHP rəhbərliyi yaxşı bilir ki, Türkiyə seçicilərinin təxminən 6-8 faizini ölkənin kürd əsilli elektoratı təşkil edir və onların bir qismi ölkədəki sabitlik anlayışına emosional düşüncə ilə yanaşır. Heç bir siyasi partiya bu elektoratdan imtina etmək niyyətində deyil"-deyə bildirdi.
"Terrorsuz Türkiyə" təşəbbüsü çərçivəsində hazırlanan "Milli həmrəyliyin və sosial inteqrasiyanın gücləndirilməsi haqqında" qanunun 2026-cı il avqustun 18-də Türkiyə hökumətinin mətbuat orqanı olan "Resmi Gazete"də dərc edildiyini xatırladan analitik Sabir Şahtaxtı diqqətə çatdırıb ki, terror başçısı Abdullah Öcalanın "status" iddiasının MHP sədri Devlet Bahçeli tərəfindən açıqlanması da təsadüfi deyil. "Bu bir tərəfdən ölkədə ictimai rəyi öyrənməyə, digər tərəfdən isə geniş mənada "status"un mümkünsüzlüyünə işarədir. Çünki MHP və onun tərəfdarları bütün hallarda PKK ilə mübarizədə danışıqların əleyhinə olublar".
Analitik qeyd edib ki, bütün hallarda PKK gələcəkdə də terror təşkilatı kimi mövcud olacaq və onun əsas missiyası xarici sifarişləri həyata keçirməkdir.
İradə SARIYEVA
