Ermənistanın aprel döyüşlərindən dərhal sonra ərazilərimizdən çıxmasına kim mane oldu...

Abutalıb Səmədov: “Burada Ermənistanın iradəsiz rəhbərlərinin də rolu böyük olub”

img

Prezident İlham Əliyev sentyabrın 21-də Laçın şəhərində Azərbaycan Bayrağını ucaltdıqdan sonra etdiyi çıxışda bildirib ki, İkinci Qarabağ müharibəsi olmaya da bilərdi, əgər Ermənistan bizim sözümüzə baxsaydı:

“Əgər öz xoşu ilə torpaqlarımızdan çıxsaydı, İkinci Qarabağ müharibəsi olmaya bilərdi. 2016-cı ilin Aprel döyüşləri bizim çox böyük qələbəmiz idi, mənəvi cəhətdən və strateji nöqteyi-nəzərdən. O döyüşlər nəticəsində azad etdiyimiz yüksəkliklər bizə əlavə imkanlar yaratdı, o cümlədən İkinci Qarabağ müharibəsində uğurlu yürüşümüzə də zəmin yaratdı”.

Ölkə başçısı qeyd edib ki, Aprel döyüşlərindən sonra Ermənistan qorxuya düşmüşdü və faktiki olaraq işğal edilmiş torpaqlardan qoşunları çıxarmağa hazır idi, hətta buna söz vermişdi:

“Ancaq ondan sonra sözünü tutmadı. Aprel döyüşləri onlar üçün dərs olmadı. Ondan iki il sonra Naxçıvanda "Günnüt" əməliyyatı keçirildi, strateji yüksəkliklər nəzarətə götürüldü. Bu da onlara dərs olmadı. Nəhayət İkinci Qarabağ müharibəsi Ermənistan ordusunun tamamilə darmadağın edilməsi ilə nəticələndi və müzəffər Azərbaycan Ordusu öz doğma torpaqlarını azad etdi. Biz hesab edirdik ki, nəhayət bu, onlara dərs olacaq. Çünki Ermənistan ordusu tamamilə dağılmış vəziyyətdədir. Müharibə dövründə 10 min fərarisi olan ölkə müharibə aparmaq iqtidarında deyil, nə fiziki cəhətdən, nə mənəvi cəhətdən”.

Maraqlıdır, Aprel döyüşlərindən sonra Ermənistanı ərazilərimizi boşaltmasına kim mane oldu?

Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, həmin dövrdə “Madrid prinsipləri” ortaya atılmışdı: “Rusiya, Fransa və ABŞ hər iki tərəfi bu prinsiplər əsasında sülh sazişi imzalamağa dəvət edirdi. “Madrid prinsipləri”nə əsasən, işğal edilmiş ərazilər azad olunmalıydı. Bu, üç həmsədr dövlətin açıq şəkildə tutduğu mövqe idi. Ancaq məlumdur ki, ən azından Rusiya əl altdan başqa siyasət yeridirdi, bunun əksinə olan addımlar atmağa çalışırdı.  Rusiyanın icazəsi olmadan Ermənistan belə davranış sərgiləyə bilərdimi? Ermənistanın Paşinyandan əvvəlki rəhbərliyinin belə addım atması qeyri-mümkün idi. Onlar Rusiyanın icazəsi olmadan heç bir addım ata bilməzdi. Paşinyan hakimiyyətə gələndən sonra müəyyən vədlər vermişdi. Möhlət istəmişdi. Konstruktiv mövqe nümayiş etdirmək istəyini ortaya qoymuşdu. Göründü ki, bir qeyri-ciddi siyasətçi kimi onun verdiyi sözün də heç bir faydası olmadı. Bunu son aylarda aparılan danışıqlar da sübut etdi. Soçi və Brüseldə götürdütü öhdəlikləri yerinə yetirmədi. Yayınmaq üçün əlində nə gəlirsə edir. Hansı ciddi diyasətçi çıxıb deyər ki, “sizin qəbul etmədiyiniz, hətta buna görə məni vəzifədən uzaqlaşdıracağınıx  sənədə qol çəkmək istəyirəm”? Paşinyanın imzalamaq fikiri olsaydı, 10 noyabrda olduğu kimi edərdi. Heç kimə məsləhət etmədən saziş imzaladı. Buna izahat vermək isə sonrakı mərhələnin işidir. İşğal olunmuş ərazilərimizin vaxtında azad olunmamasında Rusiyanın rolu çox böyükdür. Burada Ermənistanın iradəsiz rəhbərlərinin də  rolu böyük olub. Azərbaycan öz gücünə ədaləti bərpa etdi”.

Məhəmmədəli QƏRİBLİ

Peşə etikası

Son xəbərlər