Məlum olduğu kimi, ABŞ Konqresinin Nümayəndələr Palatasının spikeri Nensi Pelosi Ermənitanda səfərdə olarkən bir sıra fitnəkar fikirlər səsləndirib. Açıq-aşkar Ermənistanın tərəfini tutan Pelosi bütün diplomatik normaları pozaraq qızışdırıcı mövqedən çıxış edib.
Bütün bunlarla yanaşı, Pelosi Ermənistanın silahlandırılmasını açıq bəyan edib: “ABŞ ATƏT-in Minsk Qrupunun həmsədri kimi Ermənistan-Azərbaycan münaqişəsinin hərbi yolla həllinin mümkün olmadığını çoxdan və açıq şəkildə bəyan edib. Səfərimizin məqsədi Ermənistanın ABŞ-dan nə gözlədiyini və müdafiə sahəsində əməkdaşlıqda bizim hansı dəstəyi verə biləcəyimizi və nə edə biləcəyimizi anlamaqdır. Qərarı Ermənistan verir və qəbul edərsə, biz kömək etməyə hazırıq. Biz KTMT haqqında heç nə demirik, başa düşürük ki, Ermənistan Rusiya ilə birlikdə bu təşkilatın üzvüdür. Lakin biz Ermənistanın təhlükəsizlik məsələlərindən narahat olduğumuzu deyirik və bu məsələdə Ermənistanı daha çox dəstəkləmək istəyirik”.
Görünən odur ki, Pelosi qaşıdurmanın dərinləşməsində və genişlənməsində maraqlıdır.
“ABŞ Ermənistanla münasibətləri Ukraynada olduğu kimi, qurmaq və genişləndirmək imkanlarına malik deyil”
Sözügedən məsələni “Bakı-Xəbər”ə şərh edən politoloq Elşən Manafov bununla bağlı bir sıra məqamlara toxundu: “ABŞ ATƏT-in Minsk Qrupunun həmsədr dövlətlərindən biri kimi daim Ermənistan və Azərbaycan arasında münaqişənin hərbi yolla həllinin mümkün olmaması mövqeyindən çıxış edib. Azərbaycan 2 il əvvəl apardığı 44 günlük savaşda əldə etdiyi qələbə ilə sübut etdi ki, münaqişənin hərbi yolla həlli mümkündür. Azərbaycan BMT TŞ-nin də münaqişə ilə bağlı qətnamələrinin icrasının da təkbaşına yerinə yetirilməsinə nail olmaqla, birincisi məlum dövlətlərin xristian təəssübkeşliyi ilə bağlı mövqe nümayiş etdirdiyini əyani şəkildə sübut elədi. Beynəlxalq hüququn məhz beynəlxalq güclərin səyləri nəticəsində iflic vəziyyətə düşdüyünü göstərdi. Vaşinqton 44 günlük savaşdan sonra bölgədəki yeni geosiyasi reallıqlardan məmnun deyil. Məmnun olmadığından Ermənistandakı qərbyönümlü iqtidar vasitəsilə mövcud duruma düzəlişlər etmək istədi. Rusiyanın bölgəyə təsir imkanlarını daraltmaq, bölgədə Rusiyanı Qərb alyansı ilə hərbi qarşıdurmaya sürükləmək istəyir. Lakin Ermənistanın KTMT- nin üzvi olması, onun geocoğrafi anlamda Qərbdən uzaq olması, bölgədə Azərbaycana hər zaman dəstək ola biləcək Turkiyə faktoru, Azərbaycanla münasibətlərə Putin iqtidarının verdiyi önəm və əhəmiyyət ABŞ-ı Ermənistanla münasibətləri arzu etdiyi müstəviyə gətirməyə imkan vermir. Ermənistandakı iqtidarın ölkədaxili təzyiqlərə həssas mövqeyi, onun Qarabağdakı seperatçı rejimə təzyiq imkanlarının millətçi kəsimlə müqayisədə məhdudluğu beynəlxalq investorları bu ölkəyə ciddi sərmayələr qoymaqdan çəkindirir. ABŞ Ermənistanla münasibətləri Ukraynada olduğu kimi, qurmaq və genişləndirmək imkanlarına malik deyil. Belə ki, Ukraynadan fərqli olaraq Ermənistan KTMT- nin üzvidüdir. İkincisi, Ermənistanda Rusiyanın hərbi bazası var və bu amil ABŞ-ın burada əl-qolunu bağlayıb. Nəhayət Ermənistan iqtisadiyyatına Rusiyanın təsir imkanları ABŞ-la müqayisədə yetərincə güclüdür. ABŞ-ın burada vəziyyəti birmənalı şəkildə öz xeyrinə dəyişmək istəyi mütləq geosiyasi konteksdə dəyişikliklər doğurmalıdır ki, buna da Rusiya yol verməz”.
Bu baxımdan politoloq Pelosinin planlarının reallaşacağını ciddi hesab etmir.
Vidadi ORDAHALLI
