ABŞ Konqresinin Nümayəndələr Palatasının sədri Nensi Pelosi Ermənistanda ölkəmizin əleyhinə çox qərəzli və qəbuledilməz bəyanat verib. Spiker Pelosi Azərbaycana qarşı qətnamə hazırlandığını, ermənilərə hər zaman kömək etməyə hazır olduqlarını söyləyib,
ATƏT-in Minsk Qrupunu yenidən “diriltməyə” çağırıb. O, eyni zamanda sərhəddə baş verən toqquşmaları Azərbaycanın Ermənistanın suveren ərazisinə təcavüzü kimi qiymətləndirib.
ABŞ rəsmisinin bu sərsəm bəyanatını necə dəyərləndirmək olar?
Azərbaycan Respublikası Xarici İşlər Nazirliyinin bununla bağlı bəyanatında deyilir:
“18 sentyabr 2022-ci il tarixində Ermənistana səfəri çərçivəsində ABŞ Nümayəndələr Palatasının spikeri Nensi Pelosi tərəfindən verilmiş və bölgədəki vəziyyəti təhrif edən açıqlama ciddi təəssüf doğurur. N.Pelosi tərəfindən Azərbaycana qarşı irəli sürülən əsassız və ədalətsiz ittihamlar qəbuledilməzdir”.
Bildirilib ki, ABŞ-ın daxili siyasi gündəliyində olan siyasi intriqalar və lobbi maraqlarının Ermənistan üzərindən Cənubi Qafqaz regionuna daşınması qəbuledilməzdir:
“Təəssüflə vurğulayırıq ki, ədalətdən danışan N. Pelosi Azərbaycana qarşı Ermənistanın təcavüz siyasəti, ərazilərinin 30 ilə yaxın davam edən işğalı, yüz minlərlə azərbaycanlının etnik təmizlənməsi və Ermənistanın məsuliyyət daşıdığı digər bu kimi ağır cinayətlərlə bağlı bugünədək məqsədli şəkildə heç bir mövqe nümayiş etdirməyib.
N.Pelosinin Ermənistanda söylədikləri erməni təbliğatı əsasında verilmiş açıqlama kimi dəyərləndirilməlidir. Bu, Ermənistanla Azərbaycan arasında hal-hazırda münasibətlərin normallaşması istiqamətində atılan səylərə ciddi zərbədir. Bu kimi birtərfli addımlar və verilən əsassız açıqlamalar regionda kövrək sülhün gücləndirilməsinə deyil, əksinə gərginliyin artmasına xidmət edir”.
Rusiya Prezidentinin mətbuat katibi Dmitri Peskov da bu məsələyə münasibət bildirib. Onun sözlərinə görə, Rusiya ABŞ Konqresinin Nümayəndələr Palatasının spikeri Nensi Pelosinin Ermənistana səfərini alqışlamağa hazırdır: “ Lakin əgər bu, Ermənistan-Azərbaycan sərhədində vəziyyətin sabitləşdirilməsinə həqiqətən də töhfə verərsə. Ucadan səsləndirilən bəyanatlar reallıqda münasibətlərin normallaşmasına töhfə verə biləcəkmi? Zamanla bütün bunlar aydın olacaq”.
Digər qonşumuz İran da ABŞ Nümayəndələr Palatasının spikeri Nensi Pelosinin Ermənistana səfərinə münasibət bildirib. İran Xarici İşlər Nazirliyinin sözçüsü Nasir Kənani Cənubi Qafqaz regionunda gərginliyin və qeyri-sabitliyin artmasının heç bir region dövlətinin maraqlarına xidmət etmədiyini bildirib:
“Biz gərginliyi qızışdırmağı region ölkələrinin maraqlarına uyğun olduğunu düşünmürük, çünki regionda sülh və sabitlik iqtisadi inkişaf, ticarət əlaqələrinin və əməkdaşlığın genişləndirilməsi üçün zəruridir. Bu İslam Respublikasının prinsipial siyasətidir. Bu yanaşmadan kənar hər hansı yanaşmanı təxribat hesab edirik və regionda qeyri-sabitliyi qızışdırmağı qəbul etmirik”.
Politoloq Əhəd Məmmədli “Bakı-Xəbər”ə açıqlamasında bildirdi ki, əslində ABŞ-ın bu cür mövqeyi bizə təəccüblü görünməməlidir: “Birinci Qarabağ müharibəsini yada salaq. 1991-1994-cü illərdə gedən savaşda Ermənistan Azərbaycanın BMT tərəfindən tanınan ərazilərinə təcavüz etmişdi. Buna baxmayaraq ABŞ 907-ci düzəlişi məhz bizə, yəni təcavüzə məruz qalana qarşı etmişdi. Bu misal ABŞ-ın nə dərəcədə Azərbaycanın yanında olub-olmadığına bir sübutdur. Bəziləri illərdi yalan təbliğat aparır ki, güya ABŞ Azərbaycanın dostudur. Necə Rusiya Azərbaycanın dostu deyilsə, necə İran bə Fransa bizim dostumuz deyilsə, elə də ABŞ Azərbaycanın dostu deyil. Pelosinin səfəri və səsləndirdiyi bəyanatlar bunu bir daha təsdiqlədi. İlk dəfəydi ki, Azərbaycan özünümüdafiə məqsədilə Ermənistan ərazisində olan hədəfləri məhv etdi, həmin anda ABŞ-ın ən yüksək çinli şəxslərindən biri Ermənistana gəldi. 30 iliydi Azərbaycan əraziləri işğal altındaydı. Bir dəfə də olsun ABŞ-ın hansısa dövlət xadimi bunu əsas gətirərək Azərbaycana səfər etdimi? Xeyir etməyib. Pelosinin səgərində bir vacib nüansı da sizin diqqətinizə çatdırım. İrəvanda qondarma erməni soyqırımı abidəsini ziyarət etdi, hətda göz yaşları da tökdü. Bu, həm də Türkiyəyə verilən mesaj idi. Pelosinin səfəri və bəyanatları Azərbaycan-Türkiyə ittifaqına qarşıydı. O, yalnız Azərbaycanın deyil, eyni zamanda Türkiyənin də bostanına daş atdı. ABŞ bununla Azərbaycana deyir ki, Türkiyənin yanında olma. Bütün bunlar ABŞ-ın cənubi qafqazdakı regional siyasətinin maraqlarına cavab vermir”.
Məhəmmədəli QƏRİBLİ
